1 Corintios 3:1-23
-
Ja corintioʼik jachuketo jastal matik tojubʼale yuja jas wa xkʼankʼuniyujileʼi (1-4)
-
Yeʼn wa xya kʼiʼuk ja Dyosi (5-9)
-
Skoltanumik aʼtel ja Dyosi (9)
-
-
Yajel kʼeʼuk sok jastik bʼa wa xkuchyuj ja kʼakʼi (10-15)
-
«Weʼn kʼotelex ja stemplo ja Dyosi» (16, 17)
-
Ja sbiboʼil ja luʼumkʼinal it mini ay sbʼej sbʼaja Dyosi (18-23)
3 Ja yuj kermano jumasaʼ, mini bʼobʼ jkʼumukex jastal kristyanoʼik bʼa jani tojubʼale yuja yip ja Dyosi, jachni jkʼumanex jastal matik tojubʼale yuja jas wa xkʼankʼuniyujileʼi, jastal yal alatsik ja bʼa jastal wala taxyex soka Kristo.
2 Ja keʼn jmakʼlayex sok lech, mi sok mero waʼelaluk, yujni mito yijukex lek. Iday, ja wego cha mitoni yijukex lek,
3 pes yujni jachukexto jastal ja matik tojubʼale yuja jas wa xkʼankʼuniyujileʼi. Yuja ayawiʼojex imbidia sok wala kʼeyex tiro, ¿mi maʼ jaʼ tojubʼalukex yuja jas wa xkʼankʼuni awujilexi? ¿Sok mi maʼ jach wanex sjejel jawa modoʼex jastal ja kristyanoʼik bʼa luʼumkʼinali?
4 Yajni june wa xyala «Ja keʼn jaʼ teyon soka Pablo», pe jaxa jun wa xyala «Ja keʼn jaʼ teyon soka Apolos», ¿mi maʼ jach wanex sjejel jawa modoʼex jastal ja kristyanoʼik bʼa luʼumkʼinali?
5 Anto ¿machunkiluk ja Apolos? ¿Machunkiluk ja Pablo? Kʼotele aʼtijumik bʼa wa skʼulane ja aʼtel yakitik ja Kajwaltiki. Sok yuj yeʼnle, ja weʼnlexi ochyex kʼuʼumanil.*
6 Keʼn jtsʼunu, yeʼn ya och yalel ja Apolos, pe yeʼn ya kʼiʼuk ja Dyosi,
7 ja yuj mini wa sbʼajin oj toyjuk ja maʼ wa stsʼunu sok mini ja maʼ wa xya och yaleli, jani wa sbʼajin ja Dyos maʼ wa xya kʼiʼuki.
8 Pes ja maʼ wa stsʼunu sok ja maʼ wa xya och yaleli junxtani ja jas wa skʼanaweʼi, pe kada jujune oj ajukyi ja stsʼakole ja jastalni aʼteleʼi.
9 Yujni ja keʼntiki kʼotelotik skoltanumik aʼtel ja Dyosi. Weʼnlexni ja yalaj ja Dyos bʼa yeʼn wan yaʼteltajel, weʼnlexni ja naʼits bʼa wan yajel kʼeʼuk ja Dyosi.
10 Jastalni sjeʼunejki ja slekil skʼujol mi xbʼajixi ja Dyosi, keʼn ka ochuk ja simientoʼil jastal jun maestro bʼa skʼulajel naʼits,* pe pilan ja maʼ wan yajel kʼeʼuki. Ke kada jujune ayil jastal wan yajel kʼeʼuk ja bʼa sat simientoʼili.
11 Yujni mi maʼ wa xbʼobʼ ya och pilan simientoʼil yuja it ochelxa, bʼa yeʼnani ja Jesukristo.
12 Pe ja bʼa sat ja simientoʼili ayni maʼ oj bʼobʼ ya kʼeʼuk sok oro, plata, tsamalik ton, teʼ ma sok takin ak.
13 Ojni ilxuk jas kʼulubʼalsok ja yaʼtel kada jujune. Ojni xchiktes ja bʼa skʼakʼujil ja preba, yujni oj kʼot chijkajuk soka kʼakʼi; pes yujni ja kʼakʼi oj ya och probar jas tikʼe aʼtelil skʼulunej kada jujune.
14 Ta ja kʼakʼi mi stsika ja jas yaʼunej kʼeʼuk jun kristyano ja bʼa sat simientoʼili, ojni ajukyi ja stsʼakoli.
15 Ta ay maʼ tsik ja yaʼteli, ojni yabʼ syajal ja jas oj chʼayuji, pe ja yeʼn ojni staʼ skoltajel; pes jachni oj kʼotuk jastal june maʼ wa x-el libre ja bʼa kʼakʼi.
16 ¿Mi maʼ xa naʼawex weʼn kʼotelex ja stemplo ja Dyosi sok jaxa yip ja Dyosi tini aya mokex?
17 Ta ay maʼ wa xchʼaya snajel ja stemplo ja Dyosi, ja Dyosi ojni xchʼaysnajel ja yeʼn, yujni jel sak ja stemplo ja Dyosi,* sok weʼn kʼotelex ja templo jawi.
18 Mokni maʼ sloʼlay sbʼaj: Ta june ja bʼa weʼnlex wa spensaraʼan jel bibo ja bʼa jastal wa xtax ja tyempo* it, akʼot jastal june maʼ sonso bʼa jachuk oj pax biboʼil.
19 Pes yujni sbʼaja Dyosi ja sbiboʼil ja luʼumkʼinal it mini ay sbʼej, pes tsʼijbʼunubʼal: «Ja Dyosi wa xyaʼakan yeʼnta akoʼuk ja bʼa strampa’e ja matik jel bibo».
20 Cha tsʼijbʼunubʼal: «Ja Jyoba* wa snaʼa lomni ja pensarik yiʼoj ja matik jel bibo».
21 Ja yuj tak, moka toyabʼajex yuja jas wa skʼulane ja winikeʼi, yujni yibʼanal ja jastik junuki weʼnani abʼajex:
22 sea yeʼn ja Pablo, ja Apolosi, ja Cefasi,* ja luʼumkʼinali, ja sakʼanili, ja chamelali, ja jastik bʼa jtyempotiki ma ja jastik bʼa tyempo jakumi. Naka weʼnani abʼajex yibʼanal.
23 Jaxa weʼnlexi sbʼajexni ja Kristo, sok jaxa Kristo sbʼajni Dyos.
Notaʼik
^ Ma «kreyenteʼil».
^ Ma «jastal june maʼ jel bibo bʼa stojel aʼtel».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Kʼela ja bʼa Yaljelik cholubʼal, Ja jastal wa xtax ja tyempo.
^ Kʼela ja bʼa Yaljelik cholubʼal.
^ Cha wa sbʼiʼilan Pedro.
