1 Corintios 4:1-21
4 Spetsanile tʼilan ayilotike jastal skoltanumotik ja Kristo sok mayordomoʼik ja bʼa jastik jel chaʼanyabʼal wa xjak bʼa Dyosi.*
2 Sok sbʼaja iti, ja jas wa xmajlaxi ja bʼa mayordomoʼiki jani aʼajyuke toj.
3 Ja keʼn mini jel xkila stʼilanil ke weʼn oja kʼulukonex jusgar ma jaʼa juesiki. Pes asta ja keʼn mini wa xkʼulan jbʼaj jusgar.
4 Yujni sak ay ja jconciencia, pe ja jawi mini wa xkʼan yal ke kʼotelon toj. Pes yeʼnani wa skʼulanon jusgar ja Jyoba.*
5 Ja yujil, mok jasa kʼulukex jusgar bʼajtanto oj eljul ja styempoʼili, masanto yajni xjak ja Kajwaltiki. Yeʼnani oj ya chijkajuk ja jastik nakʼan ay ja bʼa kʼikʼinali sok oj xchiktes ja jas wa xyala ja skʼujole ja kristyano jumasaʼ. Anto kada jujune oj ajukyi ja stoyjel wa sbʼajin yuja Dyosi.
6 Kermano jumasaʼ, bʼa wa lekilalex, jtsʼijbʼunejawilex stajel tiʼal bʼa keʼna sok bʼa Apolos, bʼa jachuk oja noch-ex ja sjejel wa xkaʼatikoni bʼa oj bʼobʼa tsajlayex jastalni wa xyala ja yaljelik it: «Mok jelxanik soka jastik kanel tsʼijbʼunubʼali». Pes jachuk mi oja waʼabʼajex niwan sok mi oj ajyanik bʼa sparte june sok jaxa juni kontra oj ajyaniksok.
7 ¿Jasa awiʼoj ja weʼn yuja waxa jeʼa mas ekʼxela yuja tuki? ¿Mi maʼ naka yeʼn yaʼunejawi ja Dyosi? Ta yeʼn naka yaʼunejawi, ¿jas yuj waxa toyo abʼaj bʼa lajansok weʼn naka ataʼunej?
8 ¿Ayxa maʼ awiʼojex yibʼanal ja jastik waxa kʼanawexi? ¿Rikoʼexa maʼ? ¿Kʼeta maʼ awaʼex mandar ama mi teyukotikon? Lekxani ta wanexa yajel mandari, bʼa jachuk ja keʼntikoni oj cha jmojtayextikon yajel mandar.
9 Yujni wa xkila ke ja Dyosi yiʼonejotikonjan ja jekabʼanumik jastalni wa x-aji ochuke bʼa jun teatro* ja tsaʼanxta tsome matik oj miljuki. Bʼa jachuk oj yilotikon yibʼanal ja kristyano, ja anjelik sok ja winikeʼi.
10 Ja keʼntikoni mini biboʼukotikon yuja Kristo, pe ja weʼnlexi biboʼexni stsʼakatal ja Kristo; ja keʼntikoni mini ay kiptikon, pe ja weʼnlexi jelni jawa wipexi; ja weʼnlexi wala toyjiyex, pe ja keʼntikoni mini la kisjitikon.
11 Masan wego wanotikon stekʼjel waʼin sok takin tiʼ, mey lek jkʼutikon,* wala makʼjitikon,* mey jnajtikon
12 sok kongana wala aʼtijitikon soka jkʼabʼtikoni. Yajni wala kʼakʼlajitikoni, tsamalxta wa xjakʼatikon; yajni wa x-iji jpatiktikoni, wani xkuchkujtikon lek;
13 yajni wala abʼaltajitikoni, kʼunxta wa xjakʼatikon.* Masan wego, ja kristyano wa xyilawotikon jastal stsʼilelal ja luʼumkʼinali, ja sobraʼil* bʼa yibʼanal ja jastik junuki.
14 Mini wa stsʼijbʼanawilex ja jastik it bʼa oj ka kʼixwanik, jani bʼa yajelawilex rason jastal kuntikil bʼa jel xyajtay.
15 Pes ama aya wiʼojex 10,000 talnanumik* sbʼaja jastal wala taxyex soka Kristo, ja smeranili mey jitsana tatex; pes yuja Kristo Jesús, ja keʼn kʼotelona tatex yuja lekil rasoniki.
16 Ja yujil, wa xpata akʼujolex bʼa oja nochexki ja jmodo.
17 Ja yuj wa xjekawilex ja Timoteo, yujni yeʼn kʼotel ja kunin jel xkʼana sok toj ajyel soka Kajwaltiki. Ja yeʼn oj ya juluka kʼujolex ja jastal wa xkʼulan ja jastik junuk bʼa yaʼteltajel ja Kristo Jesusi, jastalni wanon skʼulajel ja keʼn bʼa kada kongregasyon.
18 Jujuntik jelni niwan wa xyaʼa sbʼaje juntiro, yujni wa spensarane mi oj waj kulatayex.
19 Pe ta jach wa skʼana ja Jyoba,* ojxta waj kulatayex sok mini oj cham jkʼujol yabʼjel ja jastik wa xyalawe ja matik jel niwan wa xyaʼa sbʼaje juntiro, ojni kil ta ayiʼoje ja yip ja Dyosi.
20 Yujni ja sGobyerno ja Dyosi mi jaʼ wa xchijkaji yuja jastik wa x-alxi, jani yuja ipal ti jakel bʼa Dyosi.
21 ¿Jasa waxa kʼanawexi? ¿Ja maʼ oj wajkonsok jun bara, ma oj wajkonsok yajalkʼujol sok jun modo mansoxta?*
Notaʼik
^ Kʼela ja bʼa Yaljelik cholubʼal, Ja jas jel chaʼanyabʼal wa xjak bʼa Dyosi.
^ Kʼela ja bʼa Yaljelik cholubʼal.
^ Ja it jun lugar bʼa wa xbʼobʼ stsom sbʼaje ja kristyano. Ja lugar it setantik, kʼulubʼalsok ton sok wa xbʼobʼ ochuk junuk 25,000 kristyano.
^ Jach kanel ja bʼa griego: «bʼasan aytikon».
^ Ma «ixta wala iljitikon».
^ Jach kanel ja bʼa griego: «wa xpatatikon kʼujolal».
^ Ma «ja stsʼilelal».
^ June maʼ wa stojo sok wa xyila ja yal untiki.
^ Kʼela ja bʼa Yaljelik cholubʼal.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
