1 Juan 1:1-10
1 Sok jaxa sbʼaja maʼ yiʼajan ja yaljelik bʼa wa xyaʼa sakʼanili, bʼa tixa ay man skʼeʼulabʼil, sbʼaja it maʼ kabʼunejtikoni, sbʼaja it maʼ kilunejtikoni, sbʼaja it maʼ kanel jkʼeltikon leki sok jyamunejtikoni
2 (jachukniʼa, chiktesji ja sakʼanili, sok jaxa keʼntikoni kilunejtikon sok wantikon xcholjel sok yaljela wabʼyex sbʼaja sakʼanil bʼa tolabida ja it ti ajyi soka Tatali sok chiktesjikitikon),
3 ja jas kilunejtikon sok kabʼunejtikon, cha wantikon xcholjela wabʼyex ja weʼnlexi, bʼa jachuk oj cha ajyanik lajan jmoktikon.* Jaxa keʼntikoni lajan ayotikon soka Tatali sok ja Yunini, ja Jesukristo.
4 Wa stsʼijbʼantikonawilex ja jastik it bʼa jachuk jelxani gusto oj ajyukotik juntiro.
5 Jaʼ it ja rason kabʼtikon bʼa yeʼni sok wantikon xcholjela wabʼyex: ja Dyosi juni ijlabʼ sok mini ay kʼikʼinal ja bʼa yeʼni.*
6 Ta wa xkalatik «Lajan ayotik soka yeʼn» pe titoni ayotik ja bʼa kʼikʼinali, wanotik slejel abʼal sok mi wanotik yijel ja smeranili.
7 Pe ta ti ayotik ja bʼa ijlabʼi, jastalni ja yeʼn cha tey ja bʼa ijlabʼi, lajani oj ajyukotik kibʼanaltik, jaxa xchikʼel ja Yunin Jesús wa xya sakbʼukotik bʼa spetsanil ja mulali.
8 Ta wa xkalatik «Mey jmultik», keʼnta wantik sloʼlajel jbʼajtik sok mini teyuk jmoktik ja smeranili.
9 Ta wa xkalatik ja jmultiki, sok yuja yeʼn kʼotel toj sok wa skʼulan ja bʼa toji, wani xyaʼa perdon ja jmultiki sok wa xya elkitik spetsanil ja jas mi tojuki.
10 Ta wa xkalatik «Mi jleʼunejuk jmultik», wantikni yajel kʼotuk jastal jun leʼa abʼal sok mini teyuk jmoktik ja yabʼali.
