1 Juan 3:1-24
3 ¡Kʼelawik janekʼto wa syajtayotik ja Tatali yuja wa x-aljikabʼtik yuninotik Dyosi! Sok jachni kʼotelotika. Ja yuj mi snaʼa jbʼajtik ja luʼumkʼinali, yujni ja luʼumkʼinali mito xkʼot snaʼ sbʼaj ja yeʼn.
2 Kala kermano jumasaʼ, ja wego yuntikilotikxa ja Dyosi, pe mito xchiktesji jastal oj kʼotkotik. Wani xnaʼatik ja yajni xchiktesji jach oj kʼotkotik jastal yeʼna, yujni oj kiltik ja jastal mero kʼoteli.
3 Sok yibʼanal ja matik ayiʼoj ja smajlajel it bʼa yeʼna tʼilani oj yiʼ jun sakʼanil bʼa sak, pes yujni kʼotel sak ja yeʼni.
4 Spetsanil ja maʼ mi xyaʼakan slejel smuli wani skʼokjel ja leyi; ja mulali jani skʼokjel ja leyi.
5 Ja weʼnlexi cha wani xa naʼawex ke ja yeʼn chiktesji bʼa yajel eluk ja jmultiki, sok jaxa yeʼni mini ayiʼoj mulal.
6 Chikan maʼ lajan ay soka yeʼn wani xyaʼakan slejel smul; chikan maʼ mi xyaʼakan slejel smul mini yilunejuk sok mini kʼoteluk snaʼ sbʼaj.
7 Kala kuntikil, mok maʼ sloʼlayex. Ja maʼ wa skʼulan ja bʼa jas toji kʼotelni toj, jastalni kʼotel toj ja yeʼni.
8 Ja maʼ mi xyaʼakan slejel smuli tini wa xjak bʼa Dyablo, yujni ja Dyablo mi xyaʼakan slejel smul man skʼeʼulabʼil. Ja Yunin ja Dyos jani chiktesji yuja it: bʼa xchʼayjel snajel* ja jastik skʼulunej ja Dyablo.
9 Ja ma’ kʼotel yunin Dyos wani xyaʼakan slejel smul, yujni ja yip ja Dyosi tey soka yeʼn, sok ja yeʼn wani xyaʼakan slejel smul yujni kʼotel yunin Dyos.
10 Ja yuntikil ja Dyos sok ja yuntikil ja Dyablo wani xnaji sbʼaje yuja it: ja maʼ mi skʼulan ja bʼa jas toji mini ti wa xjak bʼa Dyos, cha mini ja maʼ mi syajtay ja yermano.
11 Yujni jaʼ it ja rasona wabʼunejex man skʼeʼulabʼili: ke yajxta oj kil jbʼajtikik;
12 mini jachukuk jastal Caín, pes ja yeʼn tini jak bʼa Maʼ jel malo sok smila ja yermano. ¿Sok jas yuj smila? Yujni puro malo ja jastik wa skʼulani pe ja jastik wa skʼulan ja yermano puro toj.
13 Kermano jumasaʼ, mok chama wabʼyex ja wa xyilkʼujolanex ja luʼumkʼinali.
14 Ja keʼntiki wani xnaʼatik chamelotik ajyi, pe ja wego sakʼanotikxa yujni wa xyajtaytik ja kermanotik jumasaʼ. Ja maʼ mi xyajtani lajansok chameltoni ay.
15 Yibʼanal ja maʼ wa xyilkʼujolan ja yermano kʼotelni jun milwanum, sok jaxa weʼnlexi wani xa naʼawex ke mini jun milwanum oj ajukyi sakʼanil bʼa tolabida.
16 Sok yuja it kʼotel jnatik ja yajalkʼujolali: yujni ja yeʼni yaʼa ja sakʼanil yuj keʼntik, sok jaxa keʼntiki obligadoni aytik bʼa oj katik ja jsakʼaniltik yuja kermanotik jumasaʼ.
17 Pe ta ay maʼ yiʼoj ja jastik junuk yiʼoj ja luʼumkʼinal it sok wa xyila wan ekʼel sbʼaj nesesida ja yermano pe mi skʼana oj snaʼyi syajal, ¿jastal oj bʼobʼ ajyuk soka yeʼn ja syajal skʼujol ja Dyosi?
18 Kala kuntikil, mok kechanta ajeʼex syajala kʼujolex soka jas waxa walawexi, pes tʼilani oj chijkajuk soka jas waxa kʼulanexi sok tʼilani oja jeʼex sok spetsanila kʼujolex.
19 Jach oj jnatik ke tini jakelotik bʼa smeranil sok jaxa keʼntiki oj jkʼuʼuktik lek ke wa syajtayotik ja Dyosi,
20 ama ja jkʼujoltik wa xyala ay jmultik, pes yujni ja Dyosi masto ekʼxel yuja jkʼujoltiki sok wa snaʼa yibʼanal.
21 Kala kermano jumasaʼ, ta ja jkʼujoltik mi xyala ay jmultik, wani xbʼobʼ jkʼumuktik sok spetsanil jkʼujoltik ja Dyosi;
22 sok yibʼanal ja jas wa xkʼanatikyiʼi yeʼnani wa xyakitik, yujni wanotik skʼuʼajel ja smandari sok skʼulajel ja jas lek wa xyila ja yeʼni.
23 Chomajkil, jani it ja smandari: ke la jkʼuʼuktik ja bʼa sbʼiʼil ja Yunini, ja Jesukristo, sok la jyajtay jbʼajtik, jastalni yala kabʼtik ja yeʼni.
24 Sok jaxa maʼ wa skʼuʼanyi ja smandari lajani ay soka yeʼni, jaxa yeʼn lajani wa x-ajyi soka kristyano jaw. Sok yuja yip* yaʼakitiki, wani xnaʼatik ke ja yeʼn lajani ay jmoktik.
