1 Pedro 1:1-25
1 Bʼa sparte ja Pedro, sjekabʼanum ja Jesukristo, sbʼaja matik ekʼum bʼej ita aye sok xaʼantikan aye ja bʼa Ponto, bʼa Galacia, bʼa Capadocia, bʼa Asia sok bʼa Bitinia, sbʼaja matik tsaʼubʼalex
2 yuja Tatal Dyosi sok stsaʼawex jastalni xchapunejxa bʼajtan. Ja yeʼn yawilex ja yipi* bʼa oj ya sakbʼanik, bʼa jachuk oja kʼuʼukexyi sok oj ya sakbʼanik soka xchikʼel ja Jesukristo:
Aʼajukawilex mas ja lekil kʼujolal mi xbʼajintik sok ja lamanili.
3 Aʼaxukyi stoyjel ja sDyos sok ja sTat ja Kajwaltik Jesukristo, pes yuja niwan yajulal skʼujoli ya pojkukotik yajkʼachil ekʼele bʼa ajyelkujtik jun smajlajel bʼa mi xchʼaki stsʼakatal yuja sakʼwi ja Jesukristo ja bʼa chamwiniki.
4 Sok ya pojkukotik bʼa ajyelkujtik jun dote bʼa mi xjomi,* bʼa mi kuxuk ay sok mi xchʼaysnajel. Ja it ti nolubʼalawilex bʼa satkʼinal,
5 ja weʼnlex matik wanex talnajel yuja yip ja Dyosi stsʼakatal yuja skʼuʼajela wiʼojex bʼa oja taʼex ja koltanel bʼa chapanxa oj chiktesjuk ja bʼa tsaʼanxta tyempo.
6 Ja yuj jel gustoʼayex ja weʼnlexi, ama bʼa tʼusan tyempo tʼilani oj ajyanik triste yuj tuktukil prueba,
7 bʼa jachuk ja skʼuʼajela wiʼojex bʼa ochta probari oj kʼot jun rason bʼa oj toyjanik, oj ajan lijpanik sok oj kisjanik ja yajni xjeji ja Jesukristo. Yujni ja skʼuʼajel it mastoni chaʼanyabʼalil yuja oro, pes wani xchʼaysnajel ama ajita och probar sok kʼakʼ.
8 Ama mi awilawex, waxa yajtayex. Ama mi xa wilawex ja wego, wani xa jeʼawex skʼuʼajel bʼa yeʼn sok jelni wanex gustoʼaxel juntiro bʼa mini maʼ xbʼobʼ xchol ja niwan gustoʼil jawi
9 pes yujni wan lajxelawujilex ja jas waxa kʼanawex soka skʼuʼajeli: jawa koltajelexi.
10 Sbʼaja koltanel it, spaklaye lek sok jaʼankʼujol lek sleʼawe ja alumanik matik yalawekan sbʼaja lekil kʼujolal mi xbʼajixi ja it pilubʼalawilexi.
11 Ja yeʼnleʼi mini yaʼawekan spaklajel jas mero sjutsʼinil sok jas tyempoʼil ja yip ja Dyos* ja it teysokeʼi oj xchiktes ja Kristo. Ja yip ja Dyosi yalaxani bʼajtan sbʼaja wokolik oj ekʼ sbʼaj ja Kristo sok sbʼaja jastal oj ajuk niwanbʼuk tsaʼani.
12 Ja yeʼnleʼi chiktesjiyile bʼa mi yeʼn wane yaʼteltajel sbʼaje, pes waneni aʼtel sbʼa weʼnlex. Ja alumaniki stsʼijbʼane sbʼaja jas cholubʼalawabʼyexi, jaxa weʼnlexi awabʼyex ja jastik it stsʼakatale ja matik xcholowabʼyex ja lekil rasonik soka skoltanel ja yip ja Dyosi* ja it jekubʼalkon bʼa satkʼinali. Sok jani ja junxta jastik it bʼa jel skʼanawe oj yil-e ja anjeliki.
13 Ja yujil, chapawik jawa pensarex bʼa puesto oj ajyuk bʼa oj aʼtijananik, awik ajyuk tsʼikan lek jawa pensarexi sok majlayik sok spetsanila kʼujolex ja lekil kʼujolal mi xbʼajintik bʼa oj jejukawilex ja yajni xjeji ja Jesukristo.
14 Jastal untik bʼa kʼuʼabʼal ayex, mokxa akʼulukex ja kʼankʼunelika wiʼojex ajyi ja yajni mito xa naʼawex jas sbʼeji;
15 mas lek, jastalni ja Maʼ jel sak bʼa yeʼn spayawex, ajyanik sak bʼa yibʼanal jawa modoʼexi,
16 yujni tsʼijbʼunubʼal: «Tʼilani oj kʼotanik sak yujni sakon ja keʼni».
17 Sok ta waxa kʼanawexyi jastik ja Tatali ja maʼ parejo wa skʼulan jusgar kada jujune yuja jastik wa skʼulani, jeʼawik wala xiwyexyuj ja bʼa janekʼ tyempo ekʼum bʼej ayex ja bʼa luʼumkʼinal it.
18 Yujni ja weʼnlexi waxa naʼawex ke mi wajsok jastik bʼa wa xjomi, jastal ja plata soka oro, ja jas ya elanik libre ja bʼa tikʼe sakʼanil mi xmakuni ja it ya ekanawilex ja matik ekʼpaxtawujilexi.*
19 Pes wajni sok chikʼ bʼa jel chaʼanyabʼalil, jastal bʼa jun chej bʼa lek ay lek sok asyado ay, jani ja xchikʼel ja Kristo.
20 Ja smeranili, ja Dyosi stsaʼunejxa ja Kristo bʼajtantoyuj oj kujlajuk ja luʼumkʼinali, pe titoni chiktesji ja bʼa xchʼakulabʼil ja tyempoʼik yuj weʼnlex.
21 Yuj yeʼna, ja weʼnlexi waxa kʼuʼanex bʼa Dyos, ja maʼ ya kʼeʼuk ja bʼa chamwiniki sok yayi stoyjelal bʼa jachuk oj bʼobʼa kʼuʼukex sok sjipjela kʼujolex bʼa Dyos.
22 Ja wego yuja ajita sakbʼanik yuja kʼuʼabʼal ayex soka smeranili sok jaxa jaw skoltunejex bʼa yajxta oja wilabʼajex jastal yajxta wa xyila sbʼaj jun pamilya pe mi sok chabʼ karaʼuk, yajtabʼajik lek sok spetsanila kʼujolex.
23 Yujni mi akʼubʼal pojkanik yajkʼachil ekʼele yuj jun inat* bʼa wa xjomi, sokni jun inat bʼa mi xjomi, yuja yabʼal ja Dyosi bʼa sakʼan ay sok mi xchʼaki.
24 Yujni «spetsanil ja kristyano* jachuke jastal yal kʼul, sok yibʼanal ja stsamalileʼi jach kʼotel jastal jun yal nichim bʼa yoj jobʼ; ja yal kʼuli wa xtaki jaxa snichmali wa xmokʼi,
25 pe ja yabʼal ja Jyoba* wani x-albʼi bʼa tolabida». Pes ja «yabʼal» it jani ja lekil rasonik cholubʼalawabʼyexi.
Notaʼik
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «mi xchʼaki».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «espíritu santo». Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «yuj kostumbreʼik».
^ Wa xkʼan alxuk, jun inat bʼa wa xbʼobʼ pojxuk ma wa xyaʼa sat.
^ Jach kanel ja bʼa griego: «spetsanil bʼakʼtelal».
^ Kʼela ja bʼa Yaljelik cholubʼal.
