1 Pedro 2:1-25
2 Ja yuj aktayikan ja tuktukil tikʼe bʼa jas mi lekuki, ja loʼlanel, ja ajyel chabʼ karaʼanel, ja imbidiaʼanel sok ja tuktukil tikʼe abʼaltanel.
2 Jastal matik pojkeleto,* akʼankʼunukawujilex ja mero lech* bʼa yabʼal ja Dyosi, bʼa jachuk stsʼakatal yuja jaw oj kʼiʼanik bʼa oja taʼ akoltajelex,
3 pe jaʼitani ta awilawexta jastal jel lek skʼujol ja Kajwaltiki.
4 Yajni wanex mojxel soka yeʼn, jun ton bʼa sakʼan ay bʼa mi skisawe ja winikeʼi pe tsaʼubʼal yuja Dyosi sok chaʼanyabʼal bʼa yeʼna,
5 ja weʼnlex jastal tonik bʼa sakʼan ay, wanex kʼotel jun naʼits bʼa wan ajel kʼeʼuk yuja yip ja Dyosi, bʼa jachuk oj kʼotanik jun kʼole sacerdoteʼil bʼa tsaʼubʼalex sbʼaja Dyosi sok jachuk oja kʼap-ex majtanalik jastalni wa skʼana ja yip ja Dyosi sok lek wa xyila ja yeʼn yuj spabor ja Jesukristo.
6 Yujni jun parte ja bʼa Yabʼal ja Dyosi wa xyala: «¡Kʼelawik! Wa xkaʼa ja bʼa Sion jun ton tsaʼubʼal, jun ton bʼa mero skujlayubʼil* bʼa jel chaʼanyabʼal, sok jaxa maʼ wa sjeʼa skʼuʼajel bʼa yeʼna mini nunka oj ajuk kʼixwuk».*
7 Ja yujil, ja weʼnlexi jelni chaʼanyabʼal xa wilawex ja yeʼni, yujni ja weʼnlexi kʼotelex kʼuʼumanik.* Pe sbʼaja matik mi skʼuʼaneʼi, «ja ton mi skisawe ja kʼulumaniki, jani kʼotel ja mero ton bʼa xchikin ja yolom naʼitsi»,*
8 sok «jun ton wa xyaʼa lok okil sok jun ton bʼa wa xya mokʼuk ja kristyano». Ja yeʼnleʼi wa sloko yoke yujni mi kʼuʼabʼal ayuke soka yabʼal ja Dyosi. Pes yujni jaʼ tsajiye sbʼaja iti.
9 Pe ja weʼnlexi kʼotelex «jun rasa tsaʼubʼalex, jun kʼole sacerdoteʼik bʼa wanex aʼtel jastal reyik, jun chonabʼ tsaʼubʼalex sbʼaja Dyosi, jun chonabʼ tsaʼubʼalex yuja Dyosi, bʼa jachuk oja cholex bʼa tuktukil lado ja lekil smodoʼik» ja Maʼ spayawex ja bʼa kʼikʼinal sok skʼulanex resibir ja bʼa tsamal yijlabʼi.
10 Pes ajyi jun tyempo mi kʼotelukex jun chonabʼ, pe ja wego kʼotelex xchonabʼ ja Dyos; ajyi jun tyempo ja weʼnlexi mi jejiwilex yajulal kʼujol, pe ja wego jejitawilex yajulal kʼujol.
11 Kala kermano jumasaʼ, wa xpata akʼujolex jastal matik sbʼaje bʼa pilan país sok ekʼum bʼej ita aye nochowik stekʼjel ja jas wa xkʼankʼuniyuj ja bʼakʼtelali, bʼa wan tiroʼanela mokex.
12 Aʼajyuk jun lekila modoʼex ja bʼa chonabʼiki bʼa jachuk yajni xleji amulex bʼa ay jas mi lek wanex skʼulajel, ja yeʼnle akʼotuke testigo ja bʼa jastik lek wanex skʼulajeli. Sok yuja it, ja yeʼnleʼi oj stoye ja Dyos ja bʼa styempoʼil xjak paklanuki.
13 Yuja Kajwaltiki ajyanik ibʼ kʼabʼalsok chikan jas yaʼunej kujlajuk ja kristyano, ama reyuk, jastal june maʼ chaʼan xchol,
14 ma ja matik mandaranume, jastal sjekabʼanume ja yeʼn bʼa skʼulajel kastigar ja matik wa skʼulane bʼa mi lekuk sok stoyjel ja matik wa skʼulane bʼa leki.
15 Yujni ja jas wa skʼana ja Dyosi, ke yajni lek ja jas waxa kʼulanexi, oj smakyi ja stiʼ* ja matik jel sonsoʼe bʼa wa staʼawex tiʼal mi lekuk yuja mi snaʼawe sbʼeji.
16 Ajyanik jastal kristyanoʼik bʼa libre ay, pe mok wa makunukex ja libreʼil jaw jastal jun manya bʼa skʼulajel ja bʼa mi lekuki, pes jani bʼa kʼotel smosoʼik ja Dyosi.
17 Kisawik ja tuktukil tikʼe kristyanoʼiki, yajtayik spetsanil ja hermanoʼik bʼa junxta skʼuʼajel kiʼojtiksoki, aʼajyukawujilex xiwelal bʼa Dyos, kisawik ja reyi.
18 Ke ja aʼtijumiki aʼajyuke ibʼ kʼabʼal soka yajwaleʼi sok a-skise ja jastalni wa sbʼajineʼi, mi kechanuk ja matik lek sok ja matik wa x-ochye rasoni, cha jachni soka matik wokol yajel gustoʼaxuke.
19 Pes ta ayni maʼ wa xkuchyuj wokolik* sok ama mi stojoluk wa x-aji yiʼ wokol yuja jastal wa xtax ja sconciencia bʼa stiʼ sat ja Dyosi, ja jaw jelni xyaʼa gustoʼil.
20 Pes ta makʼjiyex yuj slejela mulex, ¿jas yaʼtel ja oj kuchukawujilex? Pe ta wa xkuchawujilex ja wokolik yuj skʼulajel ja bʼa leki, ja jaw jelni xya gustoʼaxuk ja Dyosi.
21 Sok jani payjiyex yuja it, yujni ja Kristo yiʼaj wokol yuj weʼnlex sok jachuk yaʼakanawilex ja sjejel bʼa jachni mero oja tsajlayex ja weʼnlexi.
22 Ja yeʼn mini jun smul sleʼa sok mini el abʼal ja bʼa stiʼi.
23 Yajni wan aljelyabʼ jastik bʼa wa xyajbʼesni, ja yeʼn mini ya kumxuk. Yajni wan yijel wokol, mini yala oj ya stupe. Jaʼuktoma, ja yeʼn yaʼakan bʼa skʼabʼ ja Maʼ toj wa xkʼulwani jusgari bʼa atalnajukyuj.
24 Yeʼn mismo skuchu ja jmultik soka skuerpo ja bʼa poste,* bʼa jachuk oj elkotik libre ja bʼa mulaliki sok ajyel sakʼan bʼa skʼulajel ja bʼa toji. Sok «yuja syajbʼeliki ja weʼnlexi tojbʼiyex».
25 Yujni ja weʼnlexi kʼotelex jastal chejik bʼa apiluneja bʼajex ajyi, pe ja wego kumxiyexta soka talnanum maʼ kajan sbʼaj wa skʼelawexi.*
Notaʼik
^ Ma «manxeleto».
^ Ma «ja lech bʼa mi jas sokubʼalsok».
^ Ja ton it tini wa xwaj bʼa mero xchikin ja smuroʼil ja bʼa yibʼel ja naʼitsi bʼa oj staʼ yip.
^ Ma «mini nunka oj loʼlajuk».
^ Ma «kreyenteʼik».
^ Ja ton it tini wa xwaj bʼa mero xchikin ja smuroʼil ja yolom naʼitsi bʼa oj staʼ yip.
^ Jach kanel ja bʼa griego: «awik ochyi smakbʼal stiʼ».
^ Ma «syajalik».
^ Ma «teʼ».
^ Ma «jawa sakʼanilexi».
