1 Pedro 3:1-22
3 Cha jachni junxta ja weʼnlex cheʼumalik, ajyanik bʼa yibʼ skʼabʼ jawa tatamexi, bʼa jachuk, ta jujuntik mi kʼuʼabʼal ayuke soka yabʼal ja Dyosi, ojni kʼokxuke yuja wa modoʼexi ama mi jas xa walawex,
2 yuja yeʼnle mismo wa xyilawe jawa* tojil modoʼex sok ja jastal jel lek wala kʼulwaniyex respetari.
3 Mokni jaʼ wa tsamalbʼukex ja bʼa juera, jastal jelxelxa stojbʼesel jawa wolomexi, jelxelxa slapjel oro sok lekil kʼuʼalik,
4 jani xwa tsamalbʼukex ja jas ay ja bʼa wa kʼujolexi. Ja yujil tojbʼesabʼajik soka lamanil sok ja mansoʼil* bʼa jelni chaʼanyabʼalil ja bʼa stiʼ sat ja Dyosi; chomajkil ja stojbʼesela bʼajex jachuki mini xjomi.
5 Yujni jach wa stojbʼes sbʼaje ja ixuke wa xiwyeyuj ja Dyos ja bʼa tyempo najate bʼa ayni yiʼoje smajlajel bʼa Dyos, yajni ibʼ kʼabʼal aye soka statameʼi,
6 jastalni ja Sara skʼuʼanyi ja Abrahán sok yala yabʼ kajwal. Sok weʼnlexni kʼotelex ja yakʼixuki, pe jaʼita ta mixa waʼawexkan skʼulajel ja bʼa jas leki sok mixa waʼawexkan bʼa oj skʼulukex ganar ja xiweli.
7 Cha jachni junxta ja weʼnlex tatamalik, abʼanik lek stojolil* jawa cheʼumexi bʼa lajan oj bʼobʼ ajyanik soka yeʼnleʼi. Ilawik chaʼanyabʼalil ja ixuki jastal jun oxom bʼa mas delikado, yujni ja yeʼnleʼi cha ojni ajukyile ja dote jastal weʼnlex sbʼaja majtanal mi xbʼajintik bʼa sakʼanili, bʼa jachuk mi jas oj stim jawa worasyonexi.
8 Sok bʼa xchʼakulabʼil, junxta lajan akʼotuk ja jastal modo waxa pensaranexi* sok jeʼawik waxa wabʼyex stojol, yajxta waxa wilabʼajex jastal yajxta wa xyila sbʼaj jun pamilya, yajxta waxa naʼawex syajal ja tuk sok chʼin waxa waʼabʼajex.
9 Moka wawex stup ja tuk ja jas mi lek wa skʼulanawilexi sok mokni ayajbʼesex ja tuk sok yaljelik jastalni wa skʼulanawilex. Jaʼuktoma, leʼawik modo jastal oja kʼumukex, yujni jaʼ payjiyex yuja jaw, bʼa jachuk oja bʼajukex jun slekilal.
10 Yujni «ja maʼ wa skʼana syajtajel ja sakʼanili sok gusto oj ajyuk sakʼan tʼilani oj skom ja yakʼ ja bʼa jas mi lekuki sok ja stiʼ bʼa mok yal abʼalik.
11 A-spil sbʼaj ja bʼa jas mi lekuki sok a-skʼuluk ja bʼa jas leki; a-sleʼ ja lamanili sok a-skʼujoluk bʼa mok xchʼaye.
12 Yujni ja sat ja Jyoba* tey sbʼaja matik toji sok jaxa xchikini wa xyabʼ jawa spataweyi skʼujoli, pe ja Jyoba* wani sutu ja sat bʼa mi oj skʼel ja matik wa skʼulane jastik bʼa mi lekuki».
13 Pes ¿machun ay jas oj skʼulukawilex ta jel xkʼankʼuni awujilex skʼulajel ja bʼa leki?
14 Pe ama xa wiʼajex wokol yuja bʼa jas toji, gustoni ayex. Pe mokni xiwanikyuj ja jas wa xiwyeyuj* ja yeʼnleʼi sok mok chamuka kʼujolex.
15 Mas lek, toyowik ja Kristo jastal Ajwalal ja bʼa wa kʼujolexi, tolabida chapan ajyanik bʼa oja koltabʼajex ja bʼa stiʼ sat ja maʼ wa skʼanawilex jun rason sbʼaja smajlajela wiʼojexi, pe kʼulanik bʼa jun modo laman* sok kʼulwananik respetar.
16 Aʼajyuka wujilex juna lekila concienciaʼex, bʼa jachuk chikan jas xyalawe bʼa weʼnlex, ja matik mi lek wa staʼawex tiʼali oj kʼixwuke yuja wa lekil modoʼex jastal snochumanik ja Kristo.
17 Yujni mas lek yijel wokol yuj skʼulajel ja bʼa jas leki, ta jach wa skʼana oj ekʼuk ja Dyosi, ke yuj skʼulajel ja bʼa jas mi lekuki.
18 Yujni ja Kristo jun ita buelta cham yuja mulaliki, june maʼ toj sbʼaja matik mi tojuki, bʼa jachuk oj yiʼex ja bʼay ja Dyosi. Milji jastal jun kristyano, pe ajiyi sakʼanil jach ikʼ ason.*
19 Soka tikʼe sakʼanil yiʼoji waj xcholyabʼ ja anjelik* lutaneʼi,
20 bʼa mini kʼuʼabʼaluk wajye ja bʼa tyempo najate, yajni ja Dyos wan smajlajel sok pasensya ja bʼa skʼakʼujil ja Noé, malan wan ajel kʼeʼuk ja arka sbʼaja it kechan jujuntik kristyano, wa xkʼan kaltik, waxake kristyano, ajiyekan sakʼan yuja jaʼi.
21 Ja jas ekʼi kʼotelni jun senya sok cha jani wa skoltayex ja wego, wa xkʼan alxuk, ja yijel jaʼ yuja sakʼwelal ja Jesukristo. Ja yijel jaʼi mini jaʼuk yajel eluk ja skuxil ja kuerpoʼali, jani skʼanjelyi ja Dyos jun lekil conciencia.
22 Ja yeʼn tey bʼa stojol skʼabʼ ja Dyosi, yujni waj bʼa satkʼinal, sok ajiyi bʼa yibʼ skʼabʼ ja anjelik, ja matik ayiʼoje cholalik sok ipalik.
Notaʼik
^ Ma «testigoʼe sbʼaja wa».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «naʼawik sbʼaj lek».
^ Ma «junxta yabʼalil akʼotuk jawa pensarexi».
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Ma bʼobʼta «ja xiwtanele».
^ Ma «mansoxta».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
