1 Pedro 5:1-14
5 Ja yujil, yuja cha kʼotelon jun ansyano ja keʼn, jun testigo sbʼaja swokolik ja Kristo sok cha kʼoteloni june ja bʼa matik oj ajukyi ja toyjelal ojto chijkajuki, wa xpatayi skʼujol ja matik kʼotel ansyano ja bʼa weʼnlexi:
2 talnayik ja yal xchejik ja Dyos tey bʼa wa kʼabʼexi, aʼtijananik jastal talnanumik;* mi obligadoʼuk oja kʼulukex, kʼulanik sok spetsanila kʼujolex bʼa stiʼ sat ja Dyosi; cha mokni akʼulukex yuj syajtajel ja skʼulajel ganar bʼa jun modo mi sbʼejuki, mas lek kongana kʼulanik,
3 cha moka kʼulukex bʼa lajansok weʼn kʼotelex ja yajwale ja matik yeʼn sbʼaj ja Dyosi, mas lek kʼotanik lekil sjejelik sbʼaja chejiki.
4 Sok yajni chiktesjita ja mero talnanumi, ja weʼnlexi oj ajukawilex ja tsamal korona bʼa mi xtaki.
5 Cha junxtani ja weʼnlex winike bʼa masto keremex, ibʼ kʼabʼal ajyanik soka winike bʼa mas ayxa skʼujole.* Pe awibʼanalex chʼin aʼabʼajik ja* jastal waxa wilabʼajex soka tuki, yujni ja Dyosi kontrani aysok ja matik jel niwan wa xyaʼa sbʼajeʼi pe wa sjeʼayi lekil skʼujol mi xbʼajixi ja matik chʼin wa xyaʼa sbʼajeʼi.
6 Ja yujil, chʼin aʼabʼajik ja bʼa yibʼ skʼabʼ ja Dyos maʼ jel yipi, bʼa jachuk ja yeʼn oj ya niwanbʼananik ja bʼa mero styempoʼili,
7 malan waxa wawex ekʼyi spetsanil jawa chamkʼujolex ja yeʼni, yujni ja yeʼni wa xcham skʼujola mokex.
8 ¡Awik ajyuk tsʼikan jawa pensarexi sok ajyanik kʼelan jakan! Jawa kontraʼexi, ja Dyablo, tixta ay ekʼ bʼa wa joyanalex jastal jun choj wan awanel bʼa wan slejel modo bʼa ay maʼ oj skʼuxe.*
9 Pe kontraʼanik ja yeʼni, ajyanik yij ja bʼa skʼuʼajel, pes wani xa naʼawex spetsanil ja kermanotik bʼa junxta skʼuʼajel kiʼojtiksoki wani ekʼel sbʼaje ja junxta wokoliki.
10 Pe yajni awiʼajexta wokol bʼa tʼusan tyempo, ja Dyos bʼa wa sjeʼa lekil kʼujolal mi xbʼajixi bʼa tuktukil modoʼik, ja it maʼ spayawex bʼa oj ajyanik lajan soka Kristo sok oj toyjanik bʼa tolabida, yeʼn mismo oj chʼak xchapex. Ja yeʼn oj ya ajyanik yij, ja yeʼn oj ya ajyanik tsats, ja yeʼn oj yaʼex bʼa jun skujlayubʼil tsʼunan ay lek.
11 Yeʼnani sbʼaj ja ipal bʼa tolabida. Amén.
12 Stsʼakatal ja Silvano,* ja maʼ wa xkila kʼotel jun tojil hermano, jtsʼijbʼunejawilex jujuntik yaljelik bʼa stsatsankʼujolajelex sok xcholjela wabʼyex jaman lek bʼa jani it ja meran lekil skʼujol mi xbʼajintik ja Dyosi. Ajyanik yij sbʼaja it.
13 Wa sjeka akoltanelex ja ixuk* maʼ tey bʼa Babilonia, ja maʼ tsaʼubʼal jastal weʼnlex, cha jachni ja Marcosi, bʼa kʼotel jastal jkerem.
14 Kʼulanabʼajik saludar sok jun ujtsʼanel.*
Aʼajyukawujilex lamanil awibʼanalex ja weʼnlexi, ja matik lajan ayex soka Kristo.
Notaʼik
^ Ma «ilawik lek».
^ Ma «soka ansyanoʼiki».
^ Ma «lapawik weʼnlex mismo ja yajela bʼajex chʼinil jastal jun kʼuʼal ja bʼa».
^ Ma «slejel machun oj skʼuxe».
^ Cha wa sbʼiʼilan Silas.
^ Ja il ja yaljel ixuki jani wa senyaʼan ja kongregasyon bʼa Babilonia.
^ Jach kanel ja bʼa griego: «ujtsʼanel bʼa yajalkʼujol».
