1 Tesalonicenses 1:1-10
1 Bʼa sparte ja Pablo, ja Silvano* sok ja Timoteo, sbʼaja kongregasyon bʼa tesalonicenseʼik bʼa lajan aye soka Tatal Dyosi sok ja Kajwaltik Jesukristo:
Aʼajyukawujilex ja lekil kʼujolal mi xbʼajintik sok ja lamanili.
2 Tolabida wa xkatikonyi tsʼakatal ja Dyosi ja yajni wa xtaʼawextikon tiʼal awibʼanalex ja bʼa korasyontikoni,
3 yujni bʼa stiʼ sat ja jTatik Dyosi tikʼanxta wa xjul jkʼujoltikon ja tojila waʼtelexi, ja aʼtel waxa kʼulanex yuja wa snikawex ja yajalkʼujoli sok yuja wa xkuchawujilex* yuja smajlajela wiʼojex bʼa Kajwaltik Jesukristo.
4 Kala kermanoʼik bʼa yajtubʼalex yuja Dyosi, ja keʼntikon wani xnaʼatikon ke yeʼnani stsaʼawex,
5 yujni ja lekil rasonik wa xcholotikoni mi kechan kʼotabʼajex sok yaljelik, cha kʼotni abʼajex soka skoltanel ja yip ja Dyosi.* Sok jkʼuʼunejtikon lek ja jas jcholotikona wabʼyexi. Sok ja weʼnlexi waxa naʼawex jas tikʼe winike kʼotikon bʼa wa lekilalex ja yajni ti ajyitikona mokexi.
6 Chomajkil, anochowex ja sjejel katikonawilexi cha jachni sbʼaja Kajwaltiki, pes ama jel ja wokoli akʼuʼanex ja rason soka gustoʼil wa xjak bʼa yip ja Dyosi.*
7 Sok jachuk kʼotyex jun sjejel sbʼaja kʼuʼumanik* bʼa Macedonia sok bʼa Acaya.
8 Ja smeranili stsʼakatal yuj weʼnlex, mi kechan jaʼ abʼubʼal ja yabʼal ja Jyoba* ja bʼa Macedonia sok ja bʼa Acaya, cha abʼubʼalni bʼa tuktukil parte ja skʼuʼajela wiʼojex bʼa Dyos, ja yuj mini xkilatikon stʼilanil bʼa ay jas oj kaltikon.
9 Yujni ja yeʼnleʼi waneto yaljel ja sbʼajtanil ekʼele kila jbʼajtikiki sok sbʼa jastal awaʼawexkan jawa kʼulubʼal dyosexi bʼa oj kʼotanik smoso ja meran sakʼan Dyosi
10 sok bʼa oja majlayex akoʼkon ja bʼa satkʼinal ja Yunini, ja it maʼ ya kʼejan ja bʼa chamwinikeʼi, wa xkʼan alxuk, ja Jesús, ja maʼ wa xya elkotik libre ja bʼa tajkelal jakumi.
Notaʼik
^ Cha wa sbʼiʼilan Silas.
^ Ma «xtekʼxiwujilex».
^ Ma «espíritu santo». Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «kreyenteʼik».
^ Kʼela ja bʼa Yaljelik cholubʼal.
