1 Tesalonicenses 3:1-13
3 Ja yuj, yajni mixa kuchkujtikon mas, jpensaraʼantikon masni lek ti oj kankotikon jtuchʼiltikon bʼa Atenas,
2 sok jekatikonawilex ja Timoteo, ja kermanotik sok yaʼtijum* ja Dyos b’a wa xcholo ja lekil rasonik b’a Kristo. Jekatikon b’a oj stsatsankʼujolukex sok bʼa oj ya kulana kʼujolex bʼa slekilal ja skʼuʼajela wiʼojexi,
3 bʼa jachuk mi maʼ oj chʼak yip yuja wokolik it. Yujni ja weʼnlexi waxa naʼawex mi libre ayukotik sbʼaja wokolik it.
4 Sok yajni ti ajyitikona mokexi, kʼajyelni wa xkalatikona wabʼyex ojni jtʼaspuntik wokolik, sok jastalni wanxa xa naʼawex, jachni ekʼela.
5 Ja yujil, yajni kabʼ mixa xkuchkuj, jeka ja Timoteo bʼa oj kabʼ ta tojto ayex, bʼaxama lek ja Dyablo* yawexta ochanik probar sok lom chʼay ja kaʼteltikoni.
6 Pe ja Timoteo kumxelto yulatajelex sok yiʼajan lekil rasonik sbʼaja toj ayexi sok ja syajala kʼujolexi. Cha wa xyala gustoxta wa xjula kʼujolex bʼa keʼntikon sok jel waxa kʼana oja wilotikonex jastalni jel xkʼana oj kilextikon ja keʼntikoni.
7 Ja yuj kermano jumasaʼ, ama ay jnesesidatikon sok wan ekʼel jbʼajtikon wokolik, ja weʼnlexi sok ja jastal toj ayexi jelni yaʼunej kulan jkʼujoltikon.
8 Yujni ja keʼntikoni wa stsatsankʼujolanotikon* ta ja weʼnlex toj ayex soka Kajwaltiki.
9 Sok jelni wa xkatikonyi tsʼakatal ja Dyos yuj weʼnlex sok yuja jel xa wawex gustoʼaxukotikoni.
10 Kʼakʼu akwal kongana wa xpatatikonyi skʼujol ja Dyos bʼa oj bʼobʼ kilextikon* sok yajelawilex ja jas ayto skʼanayuj ja skʼuʼajela wiʼojexi.
11 Ja jTatik Dyos sok ja Kajwaltik Jesús a-sjamekitikon ja bʼej bʼa oj bʼobʼ waj kulatayextikon.
12 Jaxa Kajwaltik aya kʼiʼuk, jaʼi, aya jitsanbʼuk ja syajala kʼujol awiʼoja bʼajexi sok awiʼojex sbʼaja tuki, jastalni jel wa xyajtayextikon ja keʼntikoni,
13 bʼa jachuk ja yeʼn oj ya ajyuk yij jawa kʼujolexi sok mi oj ya ajyuka mulex sok sak oj ya ajyanik ja bʼa stiʼ sat ja jTatik Dyosi ja yajni tixa ay* ja Kajwaltik Jesús soka yaʼtijumik bʼa sak ayeʼi.
Notaʼik
^ Ma «skoltanum».
^ Jach kanel ja bʼa griego: «ja Maʼ wa x-akʼwani och probar».
^ Jach kanel ja bʼa griego: «sakʼanotikon».
^ Jach kanel ja bʼa griego: «kiltikon jawa satexi».
^ Ja bʼa griego, parousía. Kʼela ja bʼa Yaljelik cholubʼal.
