1 Tesalonicenses 5:1-28
5 Ja yuj kermano jumasaʼ, mini tʼilanuk ay jas oj jtsʼijbʼuktikonawilex sbʼaja tyempoʼik sok ja kʼakʼujik,*
2 yujni ja weʼnlexi waxa naʼawex lek ke ja skʼakʼujil ja Jyoba* jachni oj jak jastal jun elkʼanum ja bʼa akwali.
3 Yajni ja yeʼnle wane yaljel «¡Ayxa lamanil sok mixa jas oj ekʼuk!», anto junta chʼaykʼujol oj jak sbʼaje ja chʼakelali sok mini tʼun oj eluke libre, jastal ja syajal wa xyabʼ jun ixuk bʼa ojxa pojkuk* ja yalatsi.
4 Pe ja weʼnlex kermano jumasaʼ, mi kʼikʼinal ayukex bʼa jachuk ja kʼakʼu jaw junta chʼaykʼujol oj staʼex jastalni ja sat kʼakʼu junta chʼaykʼujol oj staʼ ja elkʼanumiki,
5 pes yujni awibʼanal ja weʼnlexi yuntikilexni ja ijlabʼi sok yuntikilexni ja sat kʼakʼu. Ja keʼntiki mini sbʼajukotik ja akwali cha mini ja kʼikʼinali.
6 Ja yujil, mok och jwayeltik jastalni wa skʼulane ja tuki. La kankotik sakʼan sok la katik ajyuk tsʼikan ja jpensartiki.
7 Ja matik wa xwayeʼi wani xwaye bʼa akwal, sok jaxa matik wa xyakbʼiyeʼi akwalni wa xyakbʼiye.
8 Pe ja keʼntiki, ja matik sbʼajotik ja sat kʼakʼu, la katik ajyuk tsʼikan ja jpensartiki sok la jlaptik ja chaleco takʼin bʼa skʼuʼajel sok bʼa yajalkʼujoli, sok ja casco bʼa smajlajel sbʼaja koltaneli,
9 yujni ja Dyosi mi stsaʼawotik bʼa oj kitik wokol yuja stajkelali, sbʼajni oj jtaʼ jkoltajeltik yuja Kajwaltik Jesukristo.
10 Ja yeʼn cham yuj keʼntik, bʼa jachuk ti oj ajyukotik soka yeʼn, ama sakʼanotik ma wantik wayel.*
11 Ja yuj moka waʼexkan stsatsankʼujolajel abʼajex* sok skoltajela bʼajex, jastalni wanexjan skʼulajel.
12 Ja wego kermano jumasaʼ, wa xkʼanawilex oja kis-ex ja matik jel tsats wa x-aʼtijiye ja bʼa weʼnlexi, wa stojowex ja bʼa yaʼteltajel ja Kajwaltiki sok wa xyawilex rason.
13 Jeʼawik jel chaʼanyabʼalil waxa wilawex sok yajxta ilawik yuja aʼtel wa skʼulaneʼi. Cha ajyanik laman soka tuki.
14 Pe chomajkil kermano jumasaʼ, wa xpatatikona kʼujolex bʼa oja wawexyi tsatsal rason ja matik mi toj ayukeʼi, oja wawexyi kulan skʼujol ja matik tʼenan ay xyabʼi,* oja koltayex ja matik mey yipi sok aʼajyuka pasensyaʼex soka tuki.
15 Ilawik lek bʼa moka wawex stup jawa mojex ja jas mi lek wa skʼulanawilexi. Mas lek kʼujolanik bʼa tolabida oja kʼulukex ja jas lek bʼa weʼnlexi sok bʼa yibʼanal ja tuki.
16 Tolabida gusto ajyanik.
17 Tikʼanxta awikyi orasyon.
18 Aʼawik tsʼakatal yuj yibʼanal. Jani it ja jas wa skʼana ja Dyos sbʼaja snochumanik ja Kristo Jesús.
19 Moka tupex ja skʼajkʼal ja yip ja Dyosi.*
20 Moka jeʼex waxa wijnayex ja jas alubʼalkani.
21 Ilawik ta meran ja jastik junuki sok tolabida jaʼ xa kʼulanex ja jas leki.
22 Talnabʼajik bʼa chikan jas tikʼe maloʼil.
23 Ke yeʼn mismo ja Dyos bʼa lamanili aya sakbʼanik tsʼikan lek. Jaxa spetsanil jawa lekil modoʼex* waxa jeʼawex, jawa sakʼanilex sok jawa kuerpoʼex kermano jumasaʼ, mok ajyuk smul sok aʼajyuk lek bʼa yibʼanal ja yajni tixa ay* ja Kajwaltik Jesukristo.
24 Ja maʼ wa spayawexi jelni toj sok ojni skʼuluka.
25 Kermano jumasaʼ, moka waʼexkan yajelyi orasyon yuj keʼntikon.
26 Kʼulanik saludar yibʼanal ja hermanoʼik sok jun ujtsʼanel.
27 Ja keʼn wa xkawilex mandar bʼa sbʼiʼil ja Kajwaltiki, akʼumaxukyi ja karta it yibʼanal ja hermanoʼiki.
28 Aʼajyuka mokex ja lekil skʼujol mi xbʼajintik ja Kajwaltik Jesukristo.
Notaʼik
^ Jach kanel ja bʼa griego: «ja tyempoʼik tsaʼubʼalxa».
^ Kʼela ja bʼa Yaljelik cholubʼal.
^ Ma «manxuk».
^ Ma «wantik jijlel bʼa chamelal».
^ Ma «yajel kulana kʼujola bʼajex».
^ Ma «ja matik elel sgana».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, parousía. Kʼela ja bʼa Yaljelik cholubʼal.
