1 Timoteo 1:1-20
1 Bʼa sparte ja Pablo, sjekabʼanum ja Kristo Jesús yuja jach yaʼunej mandar ja Dyosi ja jKoltanumtiki sok ja Kristo Jesús, ja jmajlajeltiki,
2 sbʼaja Timoteo,* jun tojil uninal ja bʼa yaʼteltajel ja Kajwaltiki:
Ja jTatik Dyos sok ja Kajwaltik Jesukristo ayawi ja lekil skʼujole mi xbʼajintiki, ja syajulal skʼujole sok ja slamanile’i.
3 Yajni ojxta wajkon ja bʼa Macedonia, jkʼanawi ti oj kanan bʼa Éfeso, ja wego cha junxta wa xkʼanawi bʼa oja wayi mandar jujuntik kristyano bʼa mok sjeʼe tuk sjejelik,
4 mok smaklaye kuentoʼik bʼa mi meranuk sok mini ja bʼa lameʼik intilali. Ja jastik it mini tʼun xkoltani, kechani wa xyaʼakan bʼa oj yal-e jastik junuk ja kristyano bʼa mi xbʼobʼ sjeʼe ta meran sok mini tʼun chʼikansok ja bʼa jas wa xyaʼa ja Dyos sbʼaja skʼuʼajeli.
5 Ja smeranili, ja jas wa xkʼanxi oj lajxuk soka tojelalik* it jani bʼa oj ajyukujtik syajal jkʼujoltik ti jakel bʼa jun kʼujolal jel sak, bʼa jun lekil conciencia sok bʼa jun skʼuʼajel mi chabʼ kara ayuk.
6 Yajni wa spila sbʼaje ja b’a jastik jaw, jujuntik xchʼikunej sbʼaje bʼa loʼilik mey sbʼej.
7 Wani skʼana oj kʼotuke maestroʼik ja bʼa leyi, pe mini xyabʼye stojol ja jastik wa xyalawe sok cha mini ja jastik mi xiwye yaljeli.
8 Pe ja keʼntiki, wani xnaʼatik ke jelni lek ja Leyi ta wa x-axi makunuk stojolil lek
9 sok wani xnaxi lek ja leyi mini wa x-axi kujlajuk sbʼaja ma’ toji, jani sbʼaja matik wa skʼokowe ja leyi sok ja matik kaprechudo’e’i, sbʼaja matik mi xiwyeyuj ja Dyosi sok ja mulanumiki, sbʼaja matik mi tojuki* sok mi skisawe ja jastik saki, sbʼaja matik wa smilawe ja stateʼi sok ja matik wa smilawe ja snaneʼi, sbʼaja milwanumiki,
10 sbʼaja kristyanoʼik matik wa xkoʼ mulal sok ixuk winik,* sbʼaja winike wa xway soka smoj winikileʼi,* sbʼaja elkʼa kristyanoʼik, sbʼaja matik wa sleʼawe abʼal sok ja matik lom wa staʼawe tiʼal ja Dyos, sok sbʼa chikan tuk jas sjejelil bʼa kontra aysok ja meran* sjejeli,
11 bʼa akuerdoni ay soka lekil rasonik jel chaʼanyabʼal sbʼaja Dyos maʼ jel gustoʼayi, ja it aji bʼa jkʼabʼi.
12 Wa xkayi tsʼakatal ja Kajwaltik Kristo Jesús, bʼa yaki ipal, yujni yila toj ayon ja yajni yaki jun aʼteli,
13 ama ja ajyi wala kʼumaniyon kistal, wa xkiʼaj spatik ja tuki sok jel xtoyo jbʼaj. Pe jejiniki yajulal kʼujol yujni mi xnaʼa jas sbʼej ja jas wanon skʼulajel ajyi sok mey kiʼoj skʼuʼajel.
14 Pe jel jitsan juntiro waj ja lekil skʼujol mi xbʼajintik ja Kajwaltiki soka skʼuʼajeli sok ja yajalkʼujolal tey bʼa Kristo Jesús.
15 Wani xbʼobʼ kʼuʼaxuk lek sok wani xbʼobʼ kisxuk lek ja iti: ja Kristo Jesús jak ja bʼa luʼumkʼinal bʼa skoltajel ja mulanumiki. Bʼa yibʼanal ja mulanumik jaw, keʼnani ja mas ekʼxeloni.
16 Pe jejiki yajulal kʼujol bʼa jachuk yuj keʼna, bʼa masni ekʼxiyon yuj yibʼanale, ja Kristo Jesús sjeʼaki yibʼanal ja spasensya bʼa yajelon jastal sjejel sbʼaja matik oj skʼuʼuke bʼa yeʼn sok jachuk oj staʼ sakʼanile bʼa tolabida.
17 Ja Rey bʼa tolabida, ja maʼ mi xchʼaki, ja maʼ mi x-ilxi, ja único Dyosi, akisjuk sok atoyxuk bʼa tolabida. Amén.
18 Timoteo, kala kerem, wa xkawi ja tojelal* it pe jani ja jastal alubʼal bʼa weʼni, bʼa jachuk yuja jastik it mi oja wakan ja lekil tiroʼaneli,
19 mi oja chʼay ja skʼuʼajeli sok oj wa ajyuk juna lekil conciencia, ja it yaʼunejekan jujuntik, sok jaxa skʼuʼajel yiʼoje ochel chʼayuk jastal yajni wa xmukxikoʼ bʼa yoj jaʼ jun barko.
20 Jachni ekʼel sbʼaj ja Himeneo sok ja Alejandro, ja yeʼnleʼi kaʼuneje bʼa skʼabʼ Satanás bʼa jachuk soka tojelali oj snebʼ-e mi oj kʼumanuke kistal.
Notaʼik
^ Wa stojolan ‹ja maʼ wa stoyo ja Dyosi›.
^ Ma «mandarik».
^ Ma «sbʼaja matik mi sjeʼawe yajal kʼujolal mi xchʼaki».
^ Kʼela ja bʼa Yaljelik cholubʼal, Koʼel mulal sok ixuk winik.
^ Ma «ja winike wa staʼa sbʼaj soka smoj winikileʼi».
^ Ma «lekil».
^ Ma «mandar».
