1 Timoteo 2:1-15
2 Ja yuj ja jas bʼajtan wa xkala jani apatxuk kʼujolal, aʼaxuk orasyon, akʼanxuk sok aʼaxuk tsʼakatal yuj tuktukil tikʼe kristyano,
2 yuj reyik sok yuj yibʼanal ja matik ay chaʼan xcholeʼi, bʼa jachuk mi oj katikan yijel jun jsakʼaniltik laman sok yaʼteltajel kongana ja Dyosi sok mi tajneluk.
3 Ja it jelni lek sok jelni lek xyila ja jKoltanumtiki, ja Dyosi,
4 yujni ja jas wa skʼana jani ke tuktukil tikʼe kristyano a-staʼ skoltajele sok aʼajyukyujile meran snajelil sbʼaja smeranili.
5 Yujni kechan ay jun Dyos, sok kechan ay jun koltanum bʼa jun trato* sbʼaja Dyos sok sbʼaja winikeʼi: juni winik, ja Kristo Jesús,
6 bʼa yaʼa sbʼaj jastal slokʼol* yuj tuktukil tikʼe kristyano. Ja jawi ojni cholxuk bʼa mero styempoʼil.
7 Bʼa xcholjel ja it aji ochkon cholumanil sok jekabʼanumil, wa xkala ja smeranili sok mi xleʼa abʼal, aji ochkon maestroʼil bʼa chonabʼik sbʼaja skʼuʼajeli sok sbʼaja smeranili.
8 Ja yujil, wa xkʼana ke ja winikeʼi mok yaʼekan yajel orasyon bʼa chikan bʼaʼa sok yajni wa sjachawe ja skʼabʼe bʼa satkʼinal bʼa yajelyi orasyon, ja yeʼnleʼi tʼilani oj skʼulukesok jun tojil skʼujole.
9 Chomajkil, ja ixukeʼi tʼilani oj skʼutes sbʼaje toj sok mok jelxuke ja jastal oj xchap sbʼajeʼi sok a-spensaraʼuke lek,* mok jelxuke ja jastal oj stojbʼes ja yolomeʼi sok ja slapjel oro, perlaʼik* ma kʼuʼal jel karo stsʼakol,
10 pes bʼa oj ajyuke tsamal, tʼilan oj skʼuluke jastik junuk bʼa lek jastalni sbʼej oj skʼuluke ja ixuke wa xyalawe wa xiwyeyuj ja Dyosi.
11 Jaxa ixuki aʼajyuk chʼabʼan* ja yajni wan snebʼjeli, aʼajyuk lek ibʼ kʼabʼal.
12 Mini xkaʼakan bʼa oj sjeʼ ja ixuki sok mini oj yayi mandar ja winiki; mas lek, aʼajyuk chʼabʼan.*
13 Yujni yeʼn bʼajtan kʼulaji ja Adán, sok tixa ja Eva.
14 Chomajkil, mi yeʼn loʼlaji ja Adán, pes yujni yeʼn loʼlaji lek ja ixuki sok pax mulanum.
15 Jaxa ixuki ojni staʼ skoltajel yuja oj ajyuk yuntikili, pe jani ta mi xyaʼakan* ja skʼuʼajeli, ja yajalkʼujolal sok ja ajyel sak, sok ajyel tsʼikan ja spensari.*
Notaʼik
^ Ja bʼa griego wa stojolan jun kristyano wa skoltay chabʼ kʼole bʼa akʼotuke jun akuerdo.
^ Ma «stsʼakol». Kʼela ja bʼa Yaljelik cholubʼal, Slokʼol.
^ Ma «a-sjeʼe tsʼikan ja spensareʼi».
^ Ma «laman».
^ Ma «laman».
^ Jach kanel ja bʼa griego: «ja yeʼnleʼi mi xyaʼawekan».
^ Ma «a-spensaraʼuk lek».
