1 Timoteo 3:1-16
3 Wani xbʼobʼ jipjkʼujoltik ja yaljelik it: ta jun winik wan skʼujolajel bʼa oj kʼot jun talnanum, ja yeʼn wani skʼana jun lekil aʼtel.
2 Ja yujil, ja talnanumi tʼilan mi oj ajyuk smul, kechanta jun xcheʼum oj ajyuk sok mi oj jelxuk ja bʼa jastik wa skʼulani; tʼilan tsʼikan oj ajyuk ja spensari,* toj oj skʼuluk ja jastik junuki* sok jaman skʼujol, sok chapani oj ajyuk bʼa sjejel.
3 Mini jun yakbʼumuk sok mini jun makʼwanumuk, wani x-och rason. Mini oj sleʼ tiro sok mini oj syajtay ja takʼini.
4 Tʼilani kʼotel jun winik bʼa wa stojo lek ja spamilya sok ibʼ kʼabʼal ayuj ja yuntikili sok toj aye
5 (yujni ta jun winik mi snaʼa stojel ja spamilya, ¿jastal oj stalnay ja skongregasyon ja Dyosi?).
6 Tʼilan mi jun ajkʼach nebʼumanuk, bʼa jachuk mi niwan oj yaʼ sbʼaj sok mi oj aljuk ay smul jastalni ja Dyablo.
7 Chomajkil, tʼilan lek oj tajuk tiʼal* yuja kristyanoʼik bʼa juera, bʼa jachuk mi maʼ oj tajbʼajukyuj sok mi oj koʼ bʼa jun strampa ja Dyablo.
8 Sok cha jachuk ja siervo ministerialik* tʼilan oj yil-e stʼilanil ja jastik junuki; tʼilan akʼumanuke toj, mi jel oj yuʼe vino sok mi oj okʼ skʼujole skʼulajel ganar bʼa jun modo mi sbʼejuk,
9 pes tʼilani mi oj yaʼekan ja jas jel chaʼanyabʼal wa xjak bʼa Dyos* sbʼaja skʼuʼajeli sok jun sconcienciaʼe bʼa sak.
10 Chomajkil, aʼochuke probar bʼajtan ta chapan aye; anto, ta mini jun smule taxi, aʼochuke jastal siervo ministerialik.*
11 Cha jachuk ja ixuke tʼilan oj yil-e stʼilanil ja jastik junuki sok mok abʼaltanuke. Tʼilan mi oj jelxuke ja bʼa jastik wa skʼulaneʼi sok aʼajyuke toj bʼa yibʼanal ja jastiki.
12 Jaxa siervo ministerialiki* kechanta june aʼajyuk ja xcheʼumeʼi sok a-stoje lek ja yuntikileʼi sok ja spamilyaʼeʼi.
13 Yujni ja winike wa skʼulane lek ja yaʼteleʼi wani lajxelyujile bʼa lek oj tajuke tiʼal* sok wa xbʼobʼ kʼumanuke jaman lek sbʼaja skʼuʼajel yiʼoje bʼa Kristo Jesús.
14 Ama wa xmajla ojxta waj kil-a, wa stsʼijbʼanawi ja jastik it,
15 bʼa jachuk ta albʼiyon, oja naʼ jastal oj ajyan jastal june bʼa spamilya ja Dyos, bʼa jani skongregasyon ja sakʼan Dyosi, ja yojyal sok yipalil ja smeranili.
16 Jachukniʼa, wani xkʼuʼantik lek ke jel niwan ja jas jel chaʼanyabʼal wa xjak bʼa Dyosi* bʼa ti chʼikan soka xiwelsoki: ‹Ja Jesús kʼot jun winik, alji kʼotel toj yajni cha aji paxuk ikʼ ason,* waj ja bʼay ja anjeliki, cholxi bʼa yeʼn ja bʼa chonabʼiki, ja kristyanoʼik bʼa luʼumkʼinali skʼuʼane bʼa yeʼn, kʼulaji resibir ja bʼa satkʼinal bʼa jun modo jel chaʼanyabʼal›.
Notaʼik
^ Ma «oj spensaraʼuk lek».
^ Ma «oj ajyuk ordenado».
^ Ma «jel lek oj najuk sbʼaj».
^ Ma «ja koltanumik bʼa kongregasyon».
^ Kʼela ja bʼa Yaljelik cholubʼal.
^ Ma «koltanumik bʼa kongregasyon».
^ Ma «koltanumik bʼa kongregasyoni».
^ Ma «jel lek oj najuk sbʼaje».
^ Kʼela ja bʼa Yaljelik cholubʼal.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
