1 Timoteo 4:1-16
4 Pe ja yip ja Dyos* wa xyala jaman lek ke ja bʼa tyempo jakumi jujuntik oj sjipekan ja skʼuʼajeli yuja oj smaklaye rasonik bʼa lajansok ti jakel bʼa Dyos bʼa wa xloʼlani sok sjejelik bʼa pukujik,
2 yuja chabʼ kara aye ja winike matik wa xyalawe abʼalik sok chamelxa ay ja sconcienciaʼe bʼa lajansok akʼubʼalxayi smarkaʼil sok jun takʼin.*
3 Ja yeʼnleʼi wa xtimwaniye nupanel sok wa skomowe ja kristyano bʼa mok yabʼye waʼelik bʼa yeʼn skʼulan ja Dyosi bʼa jachuk ayabʼye sok ayaʼe tsʼakatal ja matik ayiʼoje skʼuʼajel sok wani snaʼawe stojolil lek ja smeranili.
4 Yujni jel lek yibʼanal ja jas skʼulunej ja Dyosi, sok jelni tʼilan oj kisxuk yibʼanal ta wa x-axi tsʼakatal ja yajni wa xkʼulaxi resibiri,
5 pes wa x-axi sakbʼuk yuja yabʼal ja Dyos sok ja orasyon.
6 Yajni xa wayile ja rasonik it ja hermanoʼiki, ojni kʼotan jun lekil yaʼtijum ja Kristo Jesús, june maʼ makʼlubʼal lek soka yaljelik bʼa skʼuʼajeli sok ja bʼa lekil sjejelik bʼa akisunej leki.
7 Pe moka kis ja kuentoʼik mi meranuk bʼa kontra ay soka Dyosi, ja it jastal wa xcholowe jujuntik ixuk bʼa ayxa skʼujole. Mas lek, chapa bʼaj sok aʼajyuka kʼelsat bʼa sjejel xiwel soka Dyosi.
8 Yujni ja yajelyi ejersisio ayni yiʼoj tʼun slekilal, pe ja xiwel soka Dyosi ayni yiʼoj slekilal bʼa yibʼanal ja jastik junuki, pes wa xyaʼa jun skʼapjelal ja bʼa jsakʼaniltik ja wego sok ja bʼa tyempo jakumi.
9 Wani xbʼobʼ kʼuʼaxuk lek sok wani xbʼobʼ kisxuk lek ja yaljelik jaw.
10 Ja yuj jel tsats wantik aʼtel sok wantik skʼujolajel, yujni ja smajlajel kiʼojtiki tey bʼa sakʼan Dyos, bʼa kʼotel jun Koltanum bʼa tuktukil tikʼe kristyano, pe masto sbʼaja matik toj aye.
11 Nocho yajel sok sjejel ja mandarik it.
12 Moka wakan ay maʼ oj yila menos yuja keremato. Mas lek, kʼotan jun lekil sjejel sbʼaja matik toj aye yuja jastal wala kʼumaniʼi, jawa modo, ja syajala kʼujoli, ja skʼuʼajela wiʼoji, ja jastal sak aya.
13 Malan la kʼotyon, moka wakan skʼujolajel ja skʼumajel ja yabʼal ja Dyos bʼa stiʼ sat ja kristyano, bʼa yajel rason* sok bʼa sjejel.
14 Talnay ja don awiʼoji sok ajiwi yuja jas alubʼal bʼa weʼni yajni ja tsome ansyanoʼik yaʼawe kajan ja skʼabʼe bʼa weʼna.
15 Pensaraʼan sbʼaja jastik it; jaʼ xwaja kʼujol lek ja jastik it, bʼa jachuk yibʼanale ayil-e lek wana takʼanbʼel jastal jun snochuman Kristo.
16 Talnay lek jawa modo sok ja jastal waxa jeʼa. Moka wakan skʼulajel ja jastik it, pes jachuk ojni ataʼ akoltajel sok cha jachuk ja matik wa smaklaya.
Notaʼik
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «yerro».
^ Ma «tsatsankʼujolanel».
