1 Timoteo 5:1-25
5 Mok jel tsats atoj jun winik b’a ayxa skʼujol. Jaʼuktoma, ayi rason jastal juna tat; jaxa matik mas keremto, jastala wermano;
2 jaxa ixuke bʼa ayxa skʼujoli, jastal anan, jaxa matik mas akʼixto, jastala wermana, pe bʼa jun modo toj.
3 Kisa sok talnay ja biudaʼiki, ja matik meran biudaʼeʼi.*
4 Pe ta ay jun biuda ay yuntikil sok yij, ja yeʼnleʼi a-sjeʼe bʼajtan wa xiwyeyuj ja Dyos ja bʼa snajeʼi sok stupjelyi ja snantate sok ja smexepe sok ja stataweloʼe ja sjeleʼi, yujni ja it jel lek ja bʼa stiʼ sat ja Dyosi.
5 Pe ja ixuk bʼa merani biuda sok mi jas yiʼoj* wani sjipa skʼujol bʼa Dyos sok mi xyaʼakan spatjelyi skʼujol sok yajelyi orasyon kʼakʼu akwal.
6 Pe ja biuda bʼa jaʼita wajel skʼujol yajel ekʼuk ja kʼankʼunelik* yiʼoji chamelxani ay ama sakʼanto.
7 Ja yujil, moka wakan yajel ja tojelalik* it, bʼa jachuk yibʼanale mini oj tax smule.
8 Pes yujni ta ay maʼ mi smakʼlay ja matik kajan sbʼaj stalnajeli, pe mastoni ja matik tey bʼa snaji, yijnayta ja skʼuʼajeli sok masto peor ke yuj jun kristyano bʼa mey yiʼoj skʼuʼajel.
9 Ja biuda ma’ oj ochuk ja b’a lista tʼilani ayiʼoj junuk 60 jabʼil, bʼa kechanta jun statam ajyelyuj
10 sok naʼubʼal sbʼaj yuja jastik chaʼanyabʼal skʼuluneji, ta yaʼunej kʼi yuntikil, ta jel jaman skʼujol, ta sakʼunejyi yok ja matik tsaʼubʼalexa sbʼaja Dyosi, ta skoltunej ja matik wane wokoli sok ta yaʼunej sbʼaj bʼa skʼulajel tuktukil tikʼe aʼtel.
11 Pe mok wa ochuke ja bʼa lista ja biudaʼik bʼa mas akʼixeto, pes yajni ja skʼankʼunele bʼa stajel sbʼaje sok winik xkʼot timjuke ja bʼa yaʼteltajel ja Kristo, wani skʼana oj nupanuke.
12 Ja yeʼnle ojni aljuk ay smule yuja mi yawe kʼotuk ja jas skʼapunejeʼi.*
13 Chomajkil, wani xkʼajyiye bʼa mi jas oj skʼuluke sok wa xwajye ekʼ bʼa naʼitsaltik. Jaʼi, mini kechanuk bʼa mi jas oj skʼuluke, cha wani xloʼiltaniye sok wa xchʼika sbʼaje bʼa jastik mi xyochelane, yaljel jastik mi sbʼejuk oj yal-e.
14 Ja yuj wa xkʼana anupanuke ja biudaʼik mas akʼixeto, aʼajyuk yuntikile, ayil-e ja yoj snajeʼi sok mok yaweyi lugar ja kontraʼal bʼa oj kʼenanuk.
15 Pes ayni jujuntik spilata sbʼaje b’a snochjel ja Satanás.
16 Ta jun ixuk kʼuʼuman* ay spamilya bʼa biudaʼe, a-skoltay bʼa mi oj kʼotuke jun karga sbʼaja kongregasyoni, sok jachuk ja kongregasyon oj skoltay ja matik meran biudaʼeʼi.*
17 Akisjuke lek ja ansyanoʼik bʼa wa stojowe lek ja kongregasyoni, pe mastoni ja matik jel tsats wa x-aʼtijiye bʼa yaljel ja yabʼal ja Dyosi sok sjejel.
18 Pes jun parte ja b’a Yabʼal ja Dyos wa xyala: «Mok wa ochyi smakbʼal stiʼ ja toro ja yajni wan sbʼuyjel trigo». Sok bʼa pilan parte wa xyala: «Ja aʼtijumi sbʼejni oj tupjuk».
19 Moka kis ta wan lejelyi smul jun ansyano,* kechantani ta wane yaljel chawane ma oxwane testigo.
20 Tojo bʼa stiʼ sat ja tuk ja matik wane slejel smuleʼi, bʼa jachuk oj xiwuke ja tuk bʼa mi oj skʼuluke.
21 Ja keʼn wa xkawi mandar bʼa stiʼ sat ja Dyos, bʼa Kristo Jesús sok ja bʼa anjelik tsaʼubʼaleʼi bʼa oja noch ja tojelalik it jach mi oj tsawanan sok mi maʼ menos oja wile.
22 Mok wegoxta awa kajan jawa kʼabʼ bʼa jun winik.* Cha mok ochan alkawetoʼil sbʼaja smul ja tuki. Ajyan sak.
23 Mokxa awuʼ mas jaʼ;* mas lek, ukʼan tʼun vino yuja wa lukumi sok yuja jel tikʼan wala koʼ chameli.
24 Ja smule jujuntik winike wa xchijkaji jaman lek sok wegoxta wa x-ijiye bʼa oj kʼulajuke jusgar, pe ja bʼa tuk winikeʼi masto tsaʼan wa xchijkaji.
25 Cha jachni junxta ja lekil aʼteliki wani xchijkaji jaman lek sok jaxa bʼa mi xchijkaji mini xbʼobʼ ajyuk nakʼan.
Notaʼik
^ Ma «ja biudaʼik bʼa meran ay snesesidaʼe». Wa xkʼan alxuk, mi maʼ yiʼoje bʼa oj makʼlajukeyuj.
^ Ma «mixa jas staʼa».
^ Bʼobʼta jani wa xkʼan yal sbʼaja stajel sbʼaj sok winik.
^ Ma «mandarik».
^ Jach kanel ja bʼa griego: «ja bʼajtan skʼuʼajeleʼi».
^ Ma «kreyente».
^ Ma «ja biudaʼik bʼa meran ay snesesidaʼe». Wa xkʼan alxuk, mi maʼ yiʼoje bʼa oj makʼlajukeyuj.
^ Ma «june maʼ ayxa skʼujol».
^ Wa xkʼan alxuk, mok wegoxta awayi xchol jun winik.
^ Ma «Mokxa kechan awuʼ jaʼ».
