1 Timoteo 6:1-21
6 Ja matik teye bʼa yibʼel ja yuko* bʼa mosoʼili tolabida a-skise sok spetsanil skʼujole ja yajwaleʼi, bʼa jachuk mini nunka oj tajuk tiʼal malo ja sbʼiʼil ja Dyosi sok cha mini ja jastik wa sjeʼa.
2 Jaxa matik ay yajwale kʼuʼumaniki* a-skʼule respetar yuja kʼotele hermanoʼiki. Pes jelni tʼilan masto lek oj yaʼteltaye, yujni ja matik wa xya el slekilal ja lekil yaʼteleʼi kʼoteleni kʼuʼumanik sok yajtubʼale.
Ja weʼni moka wakan sjejel ja jastik it sok yajel ja rasonik it.
3 Ta jun winik wa sjeʼa tuk sjejel sok mi akuerdoʼayuk soka lekil* tojelal bʼa Kajwaltik Jesukristo sok cha minisok ja sjejelik bʼa ti chʼikan soka xiwel yuja Dyosi,
4 ja yeʼn jel niwan wa xyaʼa sbʼaj juntiro sok mi jas xyabʼ stojolil. Jaxta wajel skʼujol* ja kʼeʼel kʼumal sok kʼeʼel tiro sok yaljelik. Ja jastik it wa xya ajyuk imbidia, kʼeʼel kʼumal, abʼaltanel,* spensarajel mi lekuk sbʼaja tuki
5 sok tikʼanxta wa xya ajyuk kʼumal yuj jastik mey stʼilanil bʼa snikunej winike jomel spensare bʼa mey yiʼoje ja smeranili, pes wa spensarane ke wa xbʼobʼ yawe el slekilal ja xiwel yuja Dyosi.
6 Sok meraniʼa, ja xiwel yuja Dyosi wani xyaʼa jitsan slekilal yajni june gusto ay soka jas yiʼoji.*
7 Yujni mini jas kiʼajtikjan ja yajni pojkitik* ja bʼa luʼumkʼinal it, sok cha mi jas oj kitik och ja yajni la chamtiki.
8 Ja yuj tak, ta ay jwaʼeltik sok jkʼutik,* la ajyukotik gusto soka jawi.
9 Pe ja matik tarega wa skʼanawe oj paxuke riko mini xkuchyujile ja prebaʼiki sok wa xkoye bʼa trampaʼik sok bʼa jitsan kʼankʼunelik bʼa mi jas xmakuni sok bʼa wa xyajbʼesni, soka it wa x-ijiye bʼa jomelal sok chʼayelal.
10 Yujni ja syajtajel ja takʼini jani yechalil bʼa tuktukil jastik malo, sok yuja kʼankʼunel yiʼoje bʼa syajtajel ja takʼini, jujuntik spilata sbʼaje ja bʼa skʼuʼajeli sok jelxa syajbʼesta sbʼaje.
11 Pe ja weʼn yaʼtijum Dyos, paka ajnel sbʼaja jastik jaw. Mas lek, leʼa ja jas toji, ja xiwel yuja Dyosi, ja skʼuʼajeli, ja yajalkʼujoli, ja kuchelawuji* sok ja mansoʼili.
12 Tiroʼanan ja bʼa lekil tiroʼanel bʼa skʼuʼajeli. Moka sijpuk ja sakʼanil bʼa tolabida sbʼaja it payjiyayuji sok sbʼaja it awala jaman lek bʼa stiʼ sat jitsan testigoʼik.
13 Bʼa stiʼ sat ja Dyos, ja it maʼ wa xya ajyuk sakʼan yibʼanal, sok bʼa Kristo Jesús, ja maʼ jastal jun testigo bʼa jel lek xcholo ja bʼa stiʼ sat ja Poncio Pilato, wa xkawi mandar
14 bʼa oja kʼuʼuk ja mandar bʼa jun modo toj lek sok bʼa mey spaltaʼil masan yajni xchijkaji ja Kajwaltik Jesukristo,
15 ja Ajwalal Maʼ jel yipi sok ja maʼ gusto ayi ojni xchiktes ja bʼa mero styempoʼil tsaʼubʼalxa. Yeʼnani kʼotel ja Rey ja bʼa matik wa xyaʼawe mandar jastal reyik sok Ajwalal ja bʼa matik wa xyaʼawe mandar jastal ajwalalik,
16 ja único maʼ mi xchami, bʼa tey bʼa jun ijlabʼ mi maʼ xbʼobʼ mojxuk, bʼa mini jun kristyano maʼ yilunej sok mini xbʼobʼ yil. Akisjuk sok jaxa yipi aʼajyuk bʼa tolabida. Amén.
17 Ayi ja tojelalik* it ja matik rikoʼe ja bʼa jastal wa xtax ja tyempo* it: mok skʼuʼuke mas ekʼxele* ja yeʼnleʼi sok mok sjip skʼujole ja bʼa rikesaʼik wa xchʼaki, masni lek a-sjip skʼujole bʼa Dyos, bʼa wa xyakitik jitsan lek yibʼanal ja jas wa xkabʼtik stsamalil.
18 Ala yabʼye a-skʼuluke ja bʼa jas leki, akʼotuke riko skʼulajel ja jastik leki, aʼajyuk jaman skʼujole sok puesto aʼajyuke bʼa skʼepjel,
19 sok jachuk ja yeʼnleʼi oj ajyukyujile ja jas chaʼanyabʼal bʼa Dyosi, jun lekil skujlayubʼil ja bʼa tyempo jakumi, bʼa jachuk mi oj sijpuke ja sakʼanil bʼa kʼotelni mero sakʼanili.
20 Timoteo, talnay ja jas akʼubʼal bʼa wa kʼabʼi: mokni akis ja yaljelik mi xmakuni bʼa wa xyijnay ja bʼa jas saki sok ja snajelil mi meranuk bʼa wa sjomo ja jas merani.
21 Yuja wa stoyo sbʼaje yuja snajelil jaw, jujuntik yaʼunejekan ja skʼuʼajeli.
Aʼajyuka mokex ja lekil kʼujolal mi xbʼajintiki.
Notaʼik
^ Kʼela ja bʼa Yaljelik cholubʼal.
^ Ma «kreyenteʼiki».
^ Ma «meran».
^ Ma «Jel swaʼel».
^ Ma «yaljelik wa xyajbʼesni».
^ Ma «smalbʼen ja jas yiʼoji».
^ Ma «manxitik».
^ Ma «bʼa oj ajyukotik».
^ Ma «ja tekʼxelawuji».
^ Ma «mandarik».
^ Kʼela ja bʼa Yaljelik cholubʼal, Ja jastal wa xtax ja tyempo.
^ Ma «mok stoy sbʼaje».
