2 Corintios 1:1-24
1 Bʼa sparte ja Pablo, sjekabʼanum ja Kristo Jesús yuja jach wa skʼana ja Dyosi, sok bʼa sparte ja kermanotik Timoteo sbʼaja skongregasyon ja Dyos tey bʼa Corinto sok yibʼanale ja matik tsaʼubʼalexa sbʼaja Dyos teye bʼa Acaya:
2 Ja jTatik Dyos sok ja Kajwaltik Jesukristo ayawilex ja lekil skʼujole mi xbʼajintik sok ja slamanile.
3 Aʼaxukyi stoyjel ja sDyos sok sTat ja Kajwaltik Jesukristo, ja Tatal bʼa jel syajulal skʼujoli sok ja Dyos maʼ wa xyayi kulan skʼujol ja kristyano bʼa tuktukil wokol.
4 Ja yeʼn wa xyaʼa kulan jkʼujoltik* bʼa yibʼanal ja jwokoltiki.* Bʼa jachuk, soka jastal wa xyaʼa kulan jkʼujoltik ja Dyosi, ja keʼntiki oj bʼobʼ katikyi kulan skʼujol ja matik wan ekʼel sbʼaje tuktukil tikʼe wokoli.*
5 Pes jastalni jel jitsan ja jwokoltik yuja Kristo, cha jelni x-aji kulan jkʼujoltik yuja Kristo.
6 Pe yujkʼa wa x-ekʼ jbʼajtikon wokolik,* jani bʼa oj katikon kulana kʼujolex sok bʼa oj jkoltayextikon. Sok ta wa x-aji kulan jkʼujoltikon, cha jani bʼa oj katikon kulana kʼujolex. Sok ja it wani skoltayex bʼa oj kuchukawujilex ja junxta wokol wa x-ekʼ jbʼajtikoni.
7 Wani xjipa lek jkʼujoltikon* bʼa weʼnlex, yujni wa xnaʼatikon ke jastalni ja junxta wokol wan ekʼelabʼajex jastal ja keʼntikon, cha jachni oj ajuk kulana kʼujolex jastal keʼntikon.
8 Kermano jumasaʼ, wani xkʼanatikon altanto oj ajyanik sbʼaja wokolik ekʼ jbʼajtikon ja bʼa parteʼik bʼa Asia. Jelni tsats juntiro tʼenjitikon bʼa jelxixa yuja kiptikoni, asta kalatikon ojni chamkotikon.
9 Jachukniʼa, jpensaraʼantikon ke ojni chamkotikon. Ja it ekʼi bʼa oj jipjkʼujoltikon sbʼaja Dyos maʼ wa xya kʼeʼuk ja chamwinikeʼi sok mi bʼa keʼntikon.
10 Ja yeʼn ya elkotikon libre ja jastal jel xiwela sbʼaj oj chamkotikon ajyi, sok oj cha ya elkotikon libre pilan ekʼele. Sok wani xjipa jkʼujoltikon bʼa yeʼna bʼa ojni ya elkotikon libre.
11 Ja weʼnlexi cha wani xbʼobʼa koltayotikonex bʼa spatjelyi skʼujol ja Dyos yuj keʼntikon. Yujni ta jitsan wa skʼanawe bʼa jkoltajeltikon, ja Dyosi ojni smaklay sok oj skoltayotikon. Sok yuja it jitsan oj yaʼe tsʼakatal.
12 Yujni wa xtoyo jbʼajtikon ke ay jun jconcienciatikon bʼa sak ay, pes ay kiʼojtikon jun jsakʼaniltikon bʼa sak ay sok mi chabʼ kara ayotikon ja bʼa luʼumkʼinal it pe mastoni soka weʼnlexi, yujni wa xjeʼatikon ja lekil skʼujol mi xbʼajintik bʼa Dyosi sok mi jaʼuk ja sbiboʼil ja kristyano.
13 Yujni ja smeranili mi jas wantikon stsʼijbʼajelawilex bʼa mi oj bʼobʼa kʼumukex* sok oja wabʼyex stojolil. Sok wani xjipa jkʼujol ojniʼa wabʼyex lek stojol ja jastik it,
14 jastalni jujuntik bʼa weʼnlex awabʼyexta stojol; jachukniʼa, jujuntik bʼa weʼnlex wani xa wabʼyex stojol ke yuj keʼntikon waxa toyo abʼajex, jaxa keʼntikoni ojni cha jtoy jbʼajtikon yuj weʼnlex ja bʼa skʼakʼujil ja Kajwaltik Jesús.
15 Yuja wa xjipa jkʼujol bʼa weʼnlexi, ja keʼn jkʼana oj waj kulatayex bʼajtan, bʼa jachuk oj gustoʼaxanik bʼa xchabʼil ekʼele.*
16 Ja jas wa xkʼana ajyi jani oj ekʼ kulatayex ja yajni wajumon ja bʼa Macedonia sok cha jachuk ja yajni la kumxiyon ja bʼa Macedonia, bʼa jachuk ja weʼnlexi oj cha mojtayonex jun makʼe ja bʼa sbʼejlal Judea.
17 Pes yajni jchapa ja it, ¿anke mini ajnel jomolxta jchapa? Ma ¿ay jas wa xchapa bʼa kechanta keʼn jlekilal sok ja yuj wa xkala bʼajtan «ojo» sok tsaʼan «miyuk»?
18 Pes jastalni meran lek wa xbʼobʼ jipjkʼujoltik bʼa Dyos, ja jas wa xkalatikona wabʼyexi mi yuj ojo sok tsaʼan miyuk.
19 Yujni ja Yunin ja Dyos, ja Jesukristo, ja it jcholotikona wabʼyexi, wa xkʼan kal, ja Silvano,* ja Timoteo sok ja keʼn, ja yeʼn mi wa xyala bʼajtan ojo sok tsaʼan miyuk, pes ta ja yeʼn yala ojo yujni ojoʼa.
20 Pes chikan janekʼ ja jas skʼapunej ja Dyosi, ja jastik it jachni kʼotel yuj yeʼna. Ja yujil, yuj yeʼna, ja keʼntiki wani xkalatik amén ja bʼa korasyontiki sok jachuk wa xkatikyi stoyjel ja Dyosi.
21 Ja Dyosi wani skʼapa ke ja weʼnlex soka keʼntikoni sbʼajotikni ja Kristo, sok yeʼnani stsaʼawotik.
22 Ja yeʼn cha yaʼakitik ja seyo sok yakitik ja yip* ja bʼa jkʼujoltiki jastal jun meran preba* ja bʼa jas jakumto.
23 Mitoni la wajyon ja bʼa Corinto yujni mi xkʼana oj ka och masa tristeʼilex sok wani xka och testigoʼil ja Dyos sbʼaja it.
24 Mi wa xkalatikon ke kʼotelotikon ajwalal sbʼaja skʼuʼajela wiʼojexi, yujni ja weʼnlexi yij ayex yuja skʼuʼajela wiʼojexi, pes kʼotelotikon koltanumik bʼa jachuk ja weʼnlexi gusto oj ajyanik.
Notaʼik
^ Ma «wa stsatsankʼujolanotik».
^ Ma «ja jpruebatiki».
^ Ma «prueba».
^ Ma «pruebaʼik».
^ Jach kanel ja bʼa griego: «wa xmajlaytikon».
^ Ma bʼobʼta «mi oj kʼota naʼex sbʼaj lek».
^ Ma bʼobʼta «oja wawex el slekilal chabʼ ekʼele».
^ Cha wa sbʼiʼilan Silas.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «jun prenda», «bʼajtan stsʼakol».
