2 Corintios 10:1-18
10 Jaxa keʼn, ja Pablo, wa xpata akʼujolex yuja smansoʼil sok ja lekil skʼujol ja Kristo, bʼa lajansok jel jkoʼelal jkʼeljel ja yajni teyona mokexi pe mini tʼun la xiwyon ja yajni mi teyona mokexi.
2 Wani xmajlay ja yajni la kʼotyoni, stukbʼesta sbʼaje ja matik wa spensarane jaʼ wa xkiʼajtikon ja spensar ja kristyano, bʼa jachuk mi tsats oj toj-e.
3 Pes ama kristyanoʼotikon,* mini la tiroʼanitikon jastal wa skʼulane ja kristyano jumasaʼ.
4 Yujni mi bʼa kristyanoʼuk ja armaʼik wala tiroʼanitikonsoki, pes ja armaʼik it jani wa x-ajiyi yip yuja Dyosi bʼa sjipjel luʼum ja jastik yij lek tsʼunani.
5 Pes yujni wantikon sjipjel luʼum pensarik sok spetsanil ja jas wa stima ja snajelil bʼa Dyosi. Wantikon yajel kʼokxuk chikan jas pensar bʼa jachuk oj ajyuk kʼuʼabʼal soka Kristo.
6 Sok chapani aytikon bʼa yajelyi kastigo ja maʼ wa skʼoko chikan jas abʼal, pe jatoni yajni jelxa lek xa kʼuʼanex abʼal ja weʼnlexi.
7 Ja weʼnlexi waxa kʼulanex jusgar ja jastik yuja jas waxa wilawexi. Ta ay maʼ skʼuʼunej lek kʼotel snochuman ja Kristo, a-spensaraʼuk jun ekʼele smoj sbʼaja it: jastalni ja yeʼn kʼotel snochuman ja Kristo, cha jachni ja keʼntikoni.
8 Pes ja keʼn mini tʼun oj kʼixwukon ama la jelxiyon tʼusan stoyjel jbʼaj sbʼaja cholal yakitikon ja Kajwaltik bʼa stsatsankʼujolajelex sok mi bʼa oj jipextikon luʼum.
9 Pe mi xkʼana oja pensaraʼukex bʼa wa xleʼa modo yajel xiwanik soka jkartaʼiki.
10 Ay jujuntik wa xyalawe: «Jel tsats xyala ja skartaʼiki sok jel ja yipi, pe ja yajni tey jmoktiki mini chaʼanyabʼaluk sok jel kistal ja jastal wa xkʼumani».
11 Ja maʼ jach wa xyala, aya tʼabʼan skʼujol ja jas wa xkalatikon ja bʼa kartaʼik ja yajni mi teyotikoni jachni oj cha jkʼuluktikon ja yajni ti oj ajyukotikona mokexi.
12 Yujni mi xkʼana oj kaltikon junxta kabʼaltikon soka matik yeʼnta wa stoyo sbʼaje sok cha mi xlaja jbʼajtikonsoke. Ja yeʼnleʼi yeʼnta wa skʼulan sbʼaje jusgar pe jani ja jastal lek wa xyilaweʼi, soka it wa sjeʼawe mi jas xyabʼye stojol.
13 Pe ja keʼntikoni mi oj jelxukotikon ja bʼa jastal wa xtoyo jbʼajtikoni. Jaʼitani oj jtoy jbʼajtikon ja bʼa jas oj bʼobʼ lajxukujtikon ja bʼa cholal yaʼunejkitikon ja Dyosi. Jaxa weʼnlexi cha tini chʼikanex ja bʼa cholal iti.
14 Ja keʼntikoni mi jelxitikon ja bʼa stikʼanil ja cholal kiʼojtikon ja yajni wajtikon ja bʼayexi, pes yujni ti chʼikanex ja bʼa cholal akʼubʼalkitikoni. Iday, keʼnto bʼajtan kʼotikon ja bʼayex soka lekil rasonik sbʼaja Kristo.
15 Miniʼa, mi wanukotikon stoyjel jbʼajtikon bʼa jastik wa xjelxi ja bʼa stikʼanil ja cholal kiʼojtikoni, wa xkʼan kal, ja bʼa yaʼtele ja tuki. Pes ayni kiʼojtikon ja smajlajel ja jas jkʼulunejtikoni ojni cha kʼiʼuk ja bʼa yojol ja cholal akʼubʼalkitikoni, pe jani ja jastal wan kʼiʼel ja skʼuʼajela wiʼojexi. Anto ojtoni bʼobʼ jkʼuluktikon mas.
16 Ojni bʼobʼ jcholtikon ja lekil rasonik ja bʼa lugarik ekʼxelto mas ja bʼa wa bʼajexi, bʼa jachuk mi oj jtoy jbʼajtikon ja bʼa jas kʼulaxita ja bʼa xchol yiʼoje ja tuki.
17 «Pe ja maʼ wa stoyo sbʼaji, a-stoy sbʼaj bʼa Jyoba».*
18 Ja Jyoba* lekni wa xyila ja winik maʼ wa stoyo, pe miyuk ja maʼ yeʼnta wa stoyo sbʼaji.
Notaʼik
^ Jach kanel ja bʼa griego: «bʼakʼtelalotikon».
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
