2 Corintios 12:1-21
12 Tʼilani oj jtoywanukon. Oj kalawabʼyex nakʼsatik sok jastik sjeʼa ja Kajwaltiki, ama mini jas x-axi el slekilal.
2 Wa xnaʼa sbʼaj jun winik bʼa kʼotel snochuman ja Kristo bʼa ayxa 14 jabʼil, junta chʼaykʼujol iji bʼa yoxil satkʼinal, mi nabʼen ta jaʼ soka skuerpo ma miyuk; ja jawi yeʼnani wa snaʼa ja Dyosi.
3 Jachukni’a, wani xnaʼa sbʼaj ja winik jaw bʼa junta chʼaykʼujol iji bʼa tsamal lugar, mi nabʼen ta jaʼ soka skuerpo ma miyuk; ja jawi yeʼnani wa snaʼa ja Dyosi.
4 Sok yajni tey ja bʼa tsamal lugari yabʼ yaljelik bʼa mi xbʼobʼ alxuk sok mini jun winik akʼubʼalyi permiso oj yale.
5 Ojni jtoy ja winik jaw, pe sbʼaja keʼni kechani oj jtoy jbʼaj sbʼaja mey kipi.
6 Ama wani xkʼana oj toywanukon, mini biboʼuk oj kʼotkon, pes ojni kal ja smeranili. Pe mini oj toywanukon bʼa jachuk mi maʼ oj spensaraʼuk bʼa ayto jas mas jkʼulunej yuja janekʼ wa xyila wa xkʼulani ma ja jas wa xyabʼ wa xkala
7 kechan yuja jastik wa xjejiki bʼa jel chaʼanyabʼali.
Bʼa mi oj kaʼ jbʼaj niwan, ajiki jastal jun kʼiʼix ja bʼa jbʼakʼteli, jachni jastal jun yanjel ja Satanás, bʼa mi xyaʼakan spochjelki bʼa jachuk mi oj kaʼ jbʼaj niwan.
8 Jpatayi skʼujol oxe ekʼele ja Kajwaltik aya elki.
9 Pe ja yeʼn yalakabʼi: «Malanta soka lekil jkʼujol mi xbʼajixi jeʼunejawiʼi, yujni ja kipi wa xchijkaji lek* ja yajni mey ipali». Ja yuj gustoxta oj jtoy jbʼaj ja yajni mey kipi, bʼa jachuk ja yip ja Kristo ti oj ajyuk bʼa keʼna jastal jun naʼits bʼa karpa.
10 Ja yujil, jelni xyaki gusto ja mey kipi, ja wala kʼakʼlajiyon sok ja yajni ay jnesesida, jawa x-iji jpatiki sok ja wokolik wa x-ekʼ jbʼaj yuja Kristo. Pes yajni mey kipi, anto mastoni jel ja kipi.
11 Yuj weʼnlex wanon kʼumal jastal maʼ mi biboʼuk, pe lekukxta kʼumaniyex lek bʼa keʼna, mini jachukuk wanon kʼumala. Ama mini jas kʼotelon, pe mini tʼun jkoʼelaluk ke yuja wa jekabʼanumex bʼa lajansok jelxa leke juntiro.
12 Ja smeranili, kuchelnikuj sjejelawilex jitsan senyaʼil sbʼaja jekabʼanumili, jkʼulan milagroʼik,* jastik cham yiljel sok jastik jel chaʼanyabʼalil.
13 Ja keʼn mini kʼotyon jun karga bʼa weʼnlex, kechan yuja it ja weʼnlexi mi junxta kʼotelukex jastal ja tuk kongregasyoni. ¿Jleʼa maʼ jmul? Ta jachkʼa, aʼawonik perdon.
14 Kʼelawik, ja it jaxani ja yoxil ekʼele bʼa chapanxa ayon bʼa oj waj kulatayex, sok mini oj kʼotkon jun karga bʼa weʼnlex. Yujni mi wanukon slejel ja jasa wiʼojexi, weʼni waxa leʼawex. Yujni mi xmajlaxi ke ja untiki oj kʼe snol-e jastik junuk bʼa oj yaweyi ja nantataliki, yeʼnleni oj kʼe snol-e ja nantatalik bʼa oj yaweyi ja untiki.
15 Pe bʼa keʼna, gustoxta oj jchʼak yibʼanal ja jas kiʼoji sok oj jchʼak jbʼaj lek yuj weʼnlex. Ta ja keʼn jel xyajtayex juntiro, ¿sbʼej maʼ jel tʼusan oja yajtayonex ja keʼni?
16 Chikani jastal, mini kʼotyon jun karga bʼa weʼnlex. Pe ja weʼnlexi awalawex jelbʼi xnaʼa manya sok kawilex trampa bʼa oj jloʼlayex.
17 ¿Yuj maʼ jloʼlunejex bʼa jlekilal keʼna ja yajni jekawilex jujuntiki?
18 Jpatayi skʼujol ayulatayex ja Tito sok jekasok ja pilan hermano. ¿Sleʼa maʼ modo bʼa oj sloʼlayex ja Tito bʼa slekilal? ¿Anke junxtani ja smodo* sjeʼa jastal keʼna? ¿Anke junxtani ja jas jkʼulantikoni?
19 ¿Apensaraʼunejex maʼ yibʼanal ja tyempo it ke wantikon skoltajel jbʼajtikon bʼa stiʼ asatex? Tini bʼa stiʼ sat Dyos wantikon kʼumal jastal snochumanik Kristo. Ama jachuk, kala kermano jumasaʼ, yibʼanal ja jas wa xkʼulantikon sbʼajni oj jtsatsankʼujolukextikon.
20 Yujni wala xiwyon ke ja yajni la kʼotyon ja tiw, mi oj jtaʼex ja jastalni wa xkiʼaj gusto sok mi jachukukon ja keʼn ja jastalni waxa wiʼajex gusto. Bʼaxama lek oj taʼex kʼeʼelex kʼumal, aya wiʼojex imbidia, koraja, tiroʼanel, abʼaltanel, loʼiltanel, jel niwan xa waʼa bʼajex juntiro sok mi laman ayukex.
21 Yajni la wajyon pilan ekʼele, bʼobʼta ja jDyos oj yakan oj kʼixwukon bʼa stiʼ asatex sok ja keʼn tʼilan oj mebʼa okon yuja jitsan maʼ sleʼa smul bʼajtanto sok mito snaʼawe malaya yuja jastik kux skʼulaneʼi, yuja koʼye mulal sok ixuk winik* sok ja kistal modoʼal jel kʼixwela sbʼaji.*
Notaʼik
^ Ma «tsʼikan lek».
^ Jach kanel ja bʼa griego: «senyaʼik».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pornéia. Kʼela ja bʼa Yaljelik cholubʼal, Koʼel mulal sok ixuk winik.
^ Ja bʼa griego, asélgueia. Kʼela ja bʼa Yaljelik cholubʼal.
