2 Corintios 13:1-14
13 Ja it jaxa ja yoxil ekʼele wa xchapa jbʼaj bʼa oj waj kulatayex. «Yujni soka jas oj yal-e ja chawane ma oxwane testigo oj ilxuk ja smeranili».
2 Ama ja wego mi teyukon tiw, lajansok teyonkʼot bʼa xchabʼil ekʼele. Ja yuj wanxa xkala yabʼye ja matik sleʼunej smule sok yibʼanale ja tuki ojni tojxuke ta bʼobʼ wajkoni,
3 yujni ja weʼnlexi wanex slejel jun preba ta ja Kristo wan yajel makunukon bʼa oj kʼumanuk. Sok ja Kristo mi yuj mey yip ja bʼa jas wa skʼulani, pes ja yeʼn wa sjeʼa ja yip bʼa weʼnlex.
4 Ama ja yeʼn ajini kʼe lokan ja bʼa poste ja yajni mey yipi, pe ja wego sakʼani ay yuja yip ja Dyosi. Sok meraniʼa, ja keʼntiki cha mini ay kiptik jastal yeʼn ajyi, pe tini oj ajyukotik soka yeʼn yuja yip ja Dyos wa x-aʼtiji bʼa weʼnlexi.
5 Moka waʼexkan spaklajela bʼajex bʼa oja naʼex ta yij ayex ja bʼa skʼuʼajeli. Kada jujune ja weʼnlexi moka waʼexkan skʼulajela bʼajex probar ja jastal mero kʼotelexi. ¿Yuj maʼ mixa waʼabʼajex kuenta ke ja Jesukristo lajan aya mokex? Pes mini lajan ayuka mokex ta mi lek la iljiyexi.
6 Ja keʼn meran lek wa xmajlay ke ja weʼnlexi oja waʼabʼajex kuenta bʼa lekni wala iljitikon ja keʼntikoni.
7 Wa xkʼanatikonyi ja Dyos bʼa mi jas malo oja kʼulukex. Mi wa xkʼanatikon bʼa lajansok lek aʼiljukotikon, pes jani bʼa oja kʼulukex ja bʼa jas leki, ama lajansok mini lek la iljitikon ja keʼntikoni.
8 Pes mini jas wa xbʼobʼ jkʼuluktikon bʼa skontraʼajel ja smeranili, kechani bʼa skoltajel ja smeranili.
9 Meran lek wani la gustoʼaxitikon ja yajni mey kiptikoni sok aya wipex ja weʼnlexi. Jani it ja jas wa xkʼanatikon bʼa orasyon: bʼa oja tojabʼajex.
10 Ja yuj wa stsʼijbʼanawilex ja it ja yajni mi teyukon tiwi. Bʼa jachuk ja yajni tixa ayon tiwi, mini tsatsuk oj ka makunuk ja cholal yaʼunejki ja Kajwaltiki, sok oj ka makunuk bʼa tsatsankʼujolanel, sok mi bʼa jipwanel luʼum.
11 Sok tsaʼanxta kermano jumasaʼ, moka waʼexkan ajyel gusto, stojela bʼajex, skisjel ja wa x-aji kulana kʼujolexi, aʼajyuk june ita jawa pensarexi sok laman ajyel, sok jachuk ja Dyos bʼa yajalkʼujolal sok bʼa lamanil ti oj ajyuka mokexa.
12 Kʼulanabʼajik saludar sok jun ujtsʼanel.
13 Yibʼanale ja matik tsaʼubʼalexa sbʼaja Dyosi wa sjeka akoltanelex.
14 Aʼajyuka mokex ja lekil kʼujolal mi xbʼajintik bʼa Kajwaltik Jesukristo, ja syajal skʼujol ja Dyosi sok ja yip ja Dyos* bʼa waxa wawex el slekilala wibʼanalex.
Notaʼik
^ Ma «espíritu santo». Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
