2 Corintios 6:1-18
6 Jastal skoltanumotikon ja yeʼn, ja keʼntikoni cha wa xpatatikona kʼujolex ke moka kʼulukex aseptar ja lekil skʼujol mi xbʼajintik ja Dyos sok tsaʼan mixa oj wajuka satex ja xchol yiʼoji.
2 Yujni ja yeʼn wa xyala: «Jmaklaya bʼa jun lekil tyempo sok jkoltaya bʼa jun skʼakʼujil bʼa koltanel». ¡Ja wego jani ja mero lekil tyempo! ¡Ja wego jani ja skʼakʼujil bʼa koltanel!
3 Mini jas wantik skʼulajel bʼa oj katik slok yok ja tuki, bʼa jachuk mi maʼ oj staʼ spaltaʼil ja bʼa kaʼteltikoni.
4 Pes wa xjeʼa jbʼajtikon jastal yaʼtijumik ja Dyos bʼa spetsanil ja jas wa xkʼulantikon: wa xkuchkujtikon jitsan pruebaʼik, wokolik, ekʼeleʼik bʼa nesesida, chamkʼujolik,
5 wala makʼjitikon, wala ochtikon preso, wa snikawekitikon kʼumal ja kristyanoʼiki, tsatsal aʼtelik, akwalik mi la waytikon, ekʼeleʼik mi la waʼtikon;
6 sak aytikon, wa xkiʼajtikon jun jsakʼaniltikon jach sok snajelil, ay jpasensyatikon sok lekil jkʼujoltikon, wa xkaʼatikonkan a-stojotikon ja yip ja Dyosi,* wa xjeʼatikon jun yajalkʼujolal bʼa mi chabʼ karaʼuk,
7 wa xkalatikon ja smeranili, wa xjipa jkʼujoltikon ja bʼa yip ja Dyosi, lajansok ay kiʼojtikon armaʼik ja bʼa stojol jkʼabʼtikon* sok ja bʼa jsurdatikon* bʼa wa skoltayotikon skʼulajel ja bʼa toji;
8 ja wala toyjitikon ma wa x-aji kʼixwukotikon, ja lek wa xnaji jbʼajtikon ma mi lek wa xnaji jbʼajtikon. Wala iljitikon jastal loʼlanumik, ama wa xkalatikon ja smeranili;
9 jastal maʼ mi xnaji sbʼaje, ama wa xnaji jbʼajtikon lek; lajansok wantikon chamel,* ama sakʼanotikon; lajansok kʼulubʼalotikon kastigar,* ama mito akʼubʼalukotikon bʼa oj chamkotikon;
10 lajansok triste aytikon, ama tolabida gusto aytikon; lajansok pobreʼotikon, ama jitsan wa xkatikon rikoʼaxuke; lajansok mi jas kiʼojtikon, ama ayni kiʼojtikon yibʼanal.
11 Corintio jumasaʼ, jamunejtikon ja jtitikon bʼa oj jkʼumukextikon* sok jamunejtikona wilex lek ja jkʼujoltikoni.
12 Ja keʼntikoni mi kaʼunejtikonyi stikʼanil ja jastal yajxta wa xkilawextikoni, pe ja weʼnlexi awaʼunejexyi stikʼanil ja jastal yajxta waxa wilawonextikoni.
13 Ja yujil, wa xkʼumanex jastal kuntikilex: cha yajtayotikonex jastalni wa xyajtayextikon sok jamawikitikon lek jawa kʼujolexi.
14 Mok ochanik soka matik mi kʼuʼumanuke* bʼa junxta yuko* mi slaja sbʼaj.* Pes ¿wan maʼ slaja sbʼaj ja bʼa toj sok ja bʼa malo? Ma ¿wan maʼ slaja sbʼaj ja ijlabʼ sok ja kʼikʼinali?
15 Chomajkil, ¿wan maʼ slaja sbʼaj ja Kristo sok ja Satanás?* Ma ¿jasa wa slaja sbʼaj jun kʼuʼuman* sok june mi kʼuʼumanuk?*
16 ¿Wan maʼ xbʼobʼ ajyuk ja kʼulubʼal dyosik ja bʼa stemplo ja Dyosi? Yujni keʼn kʼotelotik ja stemplo ja sakʼan Dyosi. Jastalni yala ja Dyosi: «Ja keʼn ti oj ajyukon soka yeʼnleʼi sok ti oj ajyukon ekʼsoke, jaxa keʼn oj kʼotkon sDyose, sok jaxa yeʼnleʼi oj kʼotuke jchonabʼ».
17 «‹Ja yuj elanik ja bʼa yeʼnleʼi sok pilabʼajik›, jach wa xyala ja Jyoba,* ‹sok aʼawikan syamjel ja jas kuxi›», «jaxa keʼni oj kʼulukex resibir».
18 «‹Sok jaxa keʼni oj kʼotkona tatex, sok jaxa weʼnlexi oj kʼotanik jkeremtik sok kakʼixuk›, jach wa xyala ja Jyoba,* ja Maʼ kechan jel ja yipi».
Notaʼik
^ Ma «espíritu santo». Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Bʼobʼta bʼa oj tiroʼanukotikon.
^ Bʼobʼta bʼa skoltajel jbʼajtikon.
^ Ma «wa xbʼajintikon oj chamkotikon».
^ Ma «tojubʼalotikon».
^ Ma «jaman lek kalunejtikona wabʼyex».
^ Ma «mi kreyenteʼuke».
^ Kʼela ja bʼa Yaljelik cholubʼal.
^ Ma «Moka wiʼabʼajex soka matik mi kʼuʼumanuki».
^ Jach kanel ja bʼa griego: «Belial». Ja bʼiʼilal it ti jakel bʼa jun yaljel hebreo wa stojolan ‹mi jas xmakuni›.
^ Ma «june maʼ toj».
^ Ma «mi kreyenteʼuk».
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
