2 Corintios 7:1-16
7 Ja yujil, kala kamigo jumasaʼ, yuja ay kiʼojtik ja skʼapjelik it, la katik eluk yibʼanal ja jas wa xya kuxbʼuk ja kuerpoʼal* sok ja kʼujolali,* yajel sakbʼuk ja kʼujolal soka xiwelal bʼa Dyosi.
2 Leʼawik jlugartikon ja bʼa wa kʼujolexi. Ja keʼntikoni mi ma’ jkʼulunejtikonyi bʼa mi tojuk, mi maʼ jomunejtikon sok mi maʼ jloʼlunejtikon bʼa jlekilal keʼntikon.
3 Mi wa xkalawabʼyex ja it bʼa skʼulajelex jusgar bʼa lajansok aya mulex, yujni kalunejxa awabʼyex ke teyex bʼa jkʼujoltikon, bʼa oj chamkotik lajan ma bʼa oj ajyukotik sakʼan lajan.
4 Ja keʼn wa xkʼumanex jaman lek. Jelni wa xtoyowex ja weʼnlexi. Jelni wa xyaki kulan jkʼujol sok jel gustoʼayon juntiro ja bʼa yojol ja jwokoltikoni.
5 Ja smeranili ja yajni kʼotikon ja bʼa Macedonia mini ajyitikon* laman, ekʼtoni jbʼajtikon tuktukil tikʼe wokolik: jel tsats wane ilwanel kontra ja bʼa juera, sok wa xcham jkʼujoltikon sbʼaja kongregasyoniki.
6 Pe ja Dyosi, ja maʼ wa xyayi kulan skʼujol ja matik elel sgana, yaʼa kulan jkʼujoltikon soka yulatanel* ja Tito.
7 Sok mi kechanuk ja yulataneli, cha jachuk ja jastala wawexyi kulan skʼujoli. Ja yeʼn yala kabʼtikon ja jastal jel xa kʼana oja wilonexi, ja jastal jel triste ayexi sok ja jastal jel xchama kʼujolex jmoki, sok ja jawi mastoni ya gustoʼaxukon.
8 Ja yujil, ta ka tristeʼaxanik soka jkarta, mini xnaʼa malaya. Ama jnaʼani malaya ja bʼajtanto (ja yajni kila ya ochuka tristeʼilex ja karta, ama kechan tʼusan tyempo),
9 ja wego wala gustoʼaxiyon pe mi jaʼuk yuja ka tristeʼaxaniki, jani yuja ya sutxuka kʼujolex ja tristeʼil jaw. Ochni wa tristeʼilex ja jastal modo lek wa xyila ja Dyosi, ja yuj mini jas ekʼabʼajex yuj jmul keʼntikon.
10 Yujni ja tristeʼil bʼa lek wa xyila ja Dyosi wani xya sutxuk jkʼujoltik bʼa wa x-ikʼwani och bʼa oj jtaʼ jkoltajeltik, sok sbʼaja it mini maʼ snaʼa malaya. Pe ja tristeʼil wa xyabʼ ja luʼumkʼinali wani x-ikʼwani och bʼa chamelal.
11 ¡Ilawik jastal jel skoltunejex ja tristeʼil bʼa lek wa xyila ja Dyosi! Ja it yaʼunej sakbʼuk jawa bʼiʼilexi, yaʼunej tajkanik yuja jas mi lek kʼulaxeli, yaʼunej xiwanik, yaʼunejkan bʼa oj kʼankʼunuka wujilex bʼa oj sutxuka kʼujolex meran lek, bʼa oja kʼujolukex, bʼa oja tojbesex ja jas mi lek kʼulaxeli. Ja bʼa it ajeʼunejex sak ajyelex* bʼa chikan jasa.
12 Ama jtsʼijbʼana wilex, mini jaʼuk jkʼulan yuja maʼ skʼulan ja jas mi lekuki sok mini jaʼuk yuja maʼ kʼulajiyiʼi. Ja keʼn jtsʼijbʼana wilex bʼa jachuk ja janekʼto akʼujolanex bʼa oja kʼuʼukexkitikon achijkajuk lek bʼa weʼnlex sok bʼa stiʼ sat ja Dyosi.
13 Jani jaw ja jas yaʼunej kulan jkʼujoltikoni.
Pe mi kechan yaʼa kulan jkʼujoltikon, masto jel yaʼunej gustoʼaxukotikon yuja jastal jel gusto jul ja Tito, yujni awibʼanalex awawex likikuk ja skʼujoli.*
14 Yujni ta jtoyunejex bʼa stiʼ sat, mi awaʼunejukex kʼixwukon. Jastalni meran lek kʼotel ja jas kalatikona wabʼyexi, cha ilxel kʼotelni smeranil ja jastik jtoyotikon ja bʼa stiʼ sat ja Tito.
15 Chomajkil, ja jastal yajxta wa xyilawexi mastoni wa xkʼiʼel ja yajni wa xjul skʼujol ja jastal jel kʼuʼabʼalexi sok ja jastal jela kisawex ja yajni akʼulanex resibiri.
16 Wa xyaki gusto yuja wa xbʼobʼ jipjkʼujol chikan jasunuk bʼa weʼnlex.*
Notaʼik
^ Jach kanel ja bʼa griego: «bʼakʼtelal».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Jach kanel ja bʼa griego: «ja jbʼakʼteltikoni mini ajyi».
^ Jach kanel ja bʼa griego: «ja yajni tixa ay».
^ Ma «meyuka mulex».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma bʼobʼta «yuja wa xbʼobʼa tsatsankʼujolanonex bʼa chikan jasunuk».
