2 Corintios 9:1-15
9 Sbʼaja aʼtel it bʼa skoltajel ja matik tsaʼubʼalexa sbʼaja Dyosi, mini yajnaluk oj jtsʼijbʼukawilex,
2 yujni wa xnaʼa jel puesto ayex bʼa yajel ja jastika wi’ojex sok wa xtoyowex sbʼaja jaw ja bʼa stiʼ sat ja macedonioʼik yaljel ke ja hermanoʼik bʼa Acaya desde jujnabʼe chapanxa aye bʼa oj koltanuke. Ja jastal jela ganaʼexi snikunej skʼujole tʼusan mi yibʼanaluke.
3 Pe wa xjeka ja hermanoʼiki bʼa jachuk ja weʼnlexi chapanxani oj ajyanik, jastalni kala, sok jachuk mi lomuk jtoyunejtikon ja jastal jel puesto ayexi.
4 Yujni ta wajye jmok ja macedonioʼiki sok mi chapan ayukex, ja keʼntikoni ojni kokotikon kʼixwel yuja jipa jkʼujoltikona mokexi, sok mastoni oj kʼixwanik ja weʼnlexi.
5 Ja yuj kila stʼilanil skʼanjelyi pabor ja hermanoʼik bʼa ojxa wajuke bʼajtan ja bʼayexi sok ojxa achapex ja donasyon akʼapunejexi. Sok jachuk ojxa ajyuk chapan jun donasyon bʼa akʼubʼal sok spetsanil kʼujolal, sok mi obligadoʼuk.
6 Ja jas wa xkʼan kali jani it: ja maʼ tʼusan wa stsʼunu cha tʼusani oj stul, jaxa maʼ jitsan wa stsʼunu cha jitsani oj stul.
7 Ke kada jujune a-skʼuluk ja jas yalunej ja skʼujoli, sok mi mala ganaʼuk sok mi obligadoʼuk, yujni ja Dyosi wa syajtay ja maʼ gustoxta wa xyaʼa.
8 Chomajkil, ja Dyosi wani xbʼobʼ sjeʼawilex niwan lekil kʼujolal mi xbʼajixi bʼa jachuk mini oj skʼulukawilex palta ja jas tʼilani sok ojni ajyukawujilex jitsan bʼa jachuk oja kʼulukex tuktukil tikʼe lekil aʼtel.
9 (Jastalni tsʼijbʼunubʼal: «Ja yeʼn skʼepunej sok spetsanil skʼujol; yaʼunejyi ja pobreʼiki. Jaxa stojili ojni ajyuk bʼa tolabida».
10 Ja Maʼ wa xyayi jitsan inat ja tsʼunuman sok pan bʼa oj yabʼi ojni yaʼ sok oj ya pojxuk ja inati. Sok jachuk ja weʼnlexi oja tsʼunex sok ojni jitsanbʼuk ja sat ja bʼa jas toj oja kʼulukexi).
11 Ja weʼnlexi wanex ajel rikoʼaxel bʼa yibʼanal bʼa jachuk oj ajyuk jamana kʼujolex bʼa chikan jasa. Sok yuja jas wa xkʼulantikoni, ja jaman kʼujolal jaw wa xnikjiye ja tuk kristyano bʼa oj yaweyi tsʼakatal ja Dyosi.
12 Yujni ja aʼtel it wan kʼulaxeli mini kechanuk bʼa yajelyile ja jas wa xmakuniyujile ja matik tsaʼubʼalexa sbʼaja Dyosi, cha jani bʼa oj bʼobʼ yaʼeyi tsʼakatal ja Dyos jitsan kristyano yuja koltanel it.
13 Sok jachuk ja yeʼnleʼi oj stoy-e ja Dyosi yujni ja aʼtelik it bʼa koltanel wa xchiktes ke ja weʼnlexi kʼuʼabʼal ayex soka lekil rasonik sbʼaja Kristo, jastalni awalawex jaman lek, sok jelni jamana kʼujolex sbʼaja jastal waxa koltayex ja yeʼnle soka tuki.
14 Sok yajni spataweyi skʼujol ja Dyos yuj weʼnlex, ojni yal-e janekʼto wa syajtayex yuja niwan lekil skʼujol mi xbʼajintik bʼa Dyos bʼa jeʼubʼalawilex ja weʼnlexi.
15 Wani xkatikyi tsʼakatal ja Dyos yuja niwan majtanali.*
Notaʼik
^ Ma «majtanal kʼebʼubʼali».
