2 Pedro 3:1-18
-
Ja matik wa xkʼulwaniye burlari mi skisawe ja chʼakelal bʼa jelxa mojani (1-7)
-
Ja Jyoba mini wanuk albʼel (8-10)
-
La jpensaraʼuktik ja jas tikʼe kristyano oj kʼotkotik (11-16)
-
Jun yajkʼachil satkʼinal sok jun yajkʼachil luʼum (13)
-
-
Tʼilani oj ajyukotik kʼelan jakan bʼa jachuk mi oj piljukotik (17, 18)
3 Kala kermano jumasaʼ, jaʼxa it ja xchabʼil karta wa stsʼijbʼanawilexi. Sok junxtani soka sbʼajtanili, wa xka juluka kʼujolex ja jastik it bʼa oj skoltayex spensarajel jaman lek,
2 b’a jachuk oj juluka kʼujolex ja jastik yalunejexekan ja tojik alumaniki sok ja mandar ya’a ja Kajwaltik sok jKoltanumtik yuja wa jekabʼanumexi.
3 Pe cha tʼilani oja naʼex ke ja bʼa tsaʼanikxta kʼakʼu oj sjeʼ sbʼaje ja matik wa xkʼulwaniye burlari sok jachni oj skʼuluke jastalni wa xkʼankʼuniyujile,
4 sok oj yal-e: «¿Bʼaxa ay ja skʼapjelal ja yajni tixa oj ajyuk* ja yeʼni? Yujni man kʼakʼu jijliye bʼa chamelal ja matik ekʼpaxtakujtiki, junxta naka ay yibʼanal ja jastik junuki man kʼejan ja luʼumkʼinali».
5 Ja yeʼnleʼi gana mi skisawe ja jasunuk iti: bʼa ayxa jitsan tyempo ajyi jun satkʼinal sok cha ajyi jun luʼum kulan ay lek ja bʼa sat jaʼi sok bʼa yoj snalan ja jaʼi yuja jas yalunej ja Dyosi,
6 sok yuja jastik jaw ja luʼumkʼinal ja bʼa tyempo jaw chʼayji snajel yajni bʼutʼ jaʼi.
7 Pe yuja jas yalunej ja Dyosi, ja satkʼinal sok ja luʼum tey ja wego pilubʼalexa bʼa oj chʼakuke sok kʼakʼ sok nolubʼalexa masan ja bʼa skʼakʼujil yajelyi kuenta ja Dyos sok ja oj chʼayjuk snajele ja matik mi xiwyeyuji.
8 Pe kala kermano jumasaʼ, mokni chʼayuka kʼujolex ja it: jun kʼakʼu sbʼaja Jyoba* kʼotel jastal mil jabʼil sok mil jabʼil kʼotel jastal jun kʼakʼu.
9 Ja Jyoba* mini x-albʼi bʼa yajel kʼotuk ja jas wa skʼapa, jastalni wa spensarane jujuntik kristyano. Jaʼuktoma, ja yeʼn ayni spasensya amokex yujni mini june wa skʼana oj chʼaysnajel, pes wani skʼana asutxuk skʼujol yibʼanal ja kristyano.
10 Pe ja skʼakʼujil ja Jyoba* oj jak jastal jun elkʼanum. Ja kʼakʼu jaw ja satkʼinali oj chʼayuk sok jun tsatsal snililel,* sok jaxa jastik kʼulubʼalsok ja luʼum sok ja satkʼinali ojni ulbʼuk yuja jel kʼakʼ juntiro. Jaxa luʼumi sok ja jastik yiʼoji ojni chʼak chiktesjuk.
11 Yuja jach oj chʼak ulbʼuk yibʼanal ja jastik it, ¡pensaraʼanik ja jas tikʼe kristyano oj kʼotanik! Tʼilani oja wiʼ jawa modoʼex bʼa jun modo sak sok sjejel wala xiwyexyuj ja Dyos soka jastik waxa kʼulanexi
12 malan wanex smajlajel sok altantoxta ayex* ja oj eljul ja skʼakʼujil ja Jyoba,* bʼa ojni chʼakuk ja satkʼinal yuja kʼakʼi sok jaxa jastik kʼulubʼalsok ja luʼum sok ja satkʼinali ojni ulbʼuk yuja jel kʼakʼ juntiro.
13 Pe ay jun yajkʼachil satkʼinal sok jun yajkʼachil luʼum bʼa wantik smajlajel jastalni skʼapunej ja Dyosi, sok jaxa tiw ojni ajyuk ja bʼa toji.
14 Ja yujil kala kermano jumasaʼ, yuja wanex smajlajel ja jastik it, kʼulanik ja janekʼ wa xbʼobʼawujilex bʼa jachuk ja bʼa xchʼakulabʼili meya kuxil oj staʼex, meya paltaʼilex sok laman ayex.
15 Chomajkil, pensaranik ke ja spasensya ja Kajwaltiki wa stojolan koltanel, jastal cha stsʼijbʼantawilex ja kala kermanotik Pablo jastalni ja biboʼil ajiyiʼi.
16 Ja yeʼn staʼa tiʼal ja jaw bʼa spetsanil ja skartaʼiki. Pe ja tiw ay jastik jel wokol yabʼjel stojolil sok jaxa matik mi xyabʼye lek stojoli* sok ja matik mito yij ayukeʼi wani stukbʼese, jastalni wa skʼulane soka tuk parteʼik ja bʼa Yabʼal ja Dyosi, bʼa wa x-ijiye bʼa xchʼakelale.
17 Ja yujil kala kermano jumasaʼ, yuja wanxa xnaʼatik ja it, ajyanik kʼelan jakan bʼa jachuk mi oj piljanik jastal yeʼnle yuj smul ja matik jel maloʼe* sok oja chʼayex ja jastal yijxa ayexi.*
18 Mas lek, kʼiʼanik mas ja bʼa lekil kʼujolal mi xbʼajintik sok ja snajelil ja bʼa Kajwaltik sok jKoltanumtik Jesukristo. Aʼaxukyi stoyjel ja wego sok bʼa tolabida. Amén.
Notaʼik
^ Ja bʼa griego, parousía. Kʼela ja bʼa Yaljelik cholubʼal, Ja yajni tixa ay.
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Wa xkʼan alxuk, soka yokʼel jun jasunuk bʼa wego wa x-ekʼi.
^ Ma «jel xa kʼanawex».
^ Kʼela ja bʼa Yaljelik cholubʼal.
^ Ma «matik mi chapanuke».
^ Ma «ja matik wa skʼokowe ja leyi».
^ Ma «kulanxa ayexi».
