2 Tesalonicenses 1:1-12
1 Bʼa sparte ja Pablo, ja Silvano* sok ja Timoteo, sbʼaja kongregasyon bʼa tesalonicenseʼik bʼa lajan aye soka jTatik Dyosi sok ja Kajwaltik Jesukristo:
2 Ja Tatal Dyos sok ja Kajwaltik Jesukristo ayawilex ja lekil skʼujole mi xbʼajintik sok ja slamanile.
3 Kermano jumasaʼ, tolabida wa xkabʼtikon tʼilan oj katikonyi tsʼakatal ja Dyos yuj weʼnlex. Sbʼejni oj jkʼuluktikon, yujni ja skʼuʼajela wiʼojexi jel wan kʼiʼel juntiro sok wanxtani kʼiʼel ja syajala kʼujolex awiʼojex awibʼanalex sok bʼa kada jujune ja weʼnlexi.
4 Ja yujil, ja keʼntikoni gustoxta wa xtaʼawextikon tiʼal ja bʼa skongregasyonik ja Dyos yuja kuchelawujilexi* sok ja skʼuʼajel waxa jeʼawex ja yajni wa x-iji apatikex sok ja wokolik wan kuchelawujilexi.
5 Spetsanil ja it wa sjeʼa ja Dyos tojni wa xkʼulwani jusgar sok yuja it wani la iljiyex waxa bʼajinex ja sGobyerno ja Dyosi, sok jani wanex yijel wokol yuja jaw.
6 Chomajkil, sbʼejni ja Dyos oj ya stupsok wokol ja matik wa xya wiʼex wokoli.
7 Pe ja weʼnlex ja matik wanex yijel wokoli ojni ajuk kulana kʼujolex, jastalni keʼntikon, ja yajni xchijkaji ja Kajwaltik Jesús masan bʼa satkʼinal soka yanjelik jel yipe
8 ja bʼa yoj yajlubʼil kʼakʼi, yajni xya stup ja matik mi snaʼa sbʼaj ja Dyosi sok ja matik mi skʼuʼane ja lekil rasonik sbʼaja Kajwaltik Jesusi.
9 Ja yeʼnleʼi ojni kʼulajuke jusgar yuja Kajwaltiki. Jaxa skastigoʼeʼi jani oj chʼaysnajele bʼa tolabida, anto jachuk oj chʼaysnajele ja bʼa stiʼ sat ja Kajwaltiki sok mixani oj skoltay soka niwan yipi,
10 yajni xjak ja Kajwaltik bʼa oj ajukyi stoyjel soka yermanoʼik tsaʼubʼalexa sbʼaja Dyosi, yibʼanal ja matik ayiʼoje skʼuʼajel bʼa yeʼn ojni stoy-e. Sok yuja akʼuʼanex ja jastik kalatikona wabʼyexi, ja weʼnlexi tini oj cha ajyanik soka yeʼnleʼi.
11 Yuja jaw, tolabida wa xkatikonyi orasyon yuj weʼnlex, bʼa jachuk ja jDyostiki oj yil waxa bʼajinex sbʼaja jas spayawexi sok jachuk oj skʼul tsʼikan lek soka yip yibʼanal ja jas lek wa skʼana oj skʼuluki sok yibʼanal ja jas wa xkʼulaxi yuja skʼuʼajeli.
12 Sok jachuk, ja sbʼiʼil ja Kajwaltik Jesús ojni toyjuk yuj weʼnlex sok jaxa weʼnlexi oj toyjanik yuja jastal wala taxyex soka yeʼni, jastalni wa xyala ja lekil skʼujol mi xbʼajintik ja Dyos sok ja bʼa Kajwaltik Jesukristo.
