2 Tesalonicenses 3:1-18
3 Sok tsaʼanxta kermano jumasaʼ, moka waʼexkan yajelyi orasyon yuj keʼntikon bʼa jachuk wego oj pukxuk ekʼ ja yabʼal ja Jyoba* sok oj toyjuk, jastalni wanxa toyxel bʼa weʼnlex,
2 sok bʼa jachuk oj ajukotik el libre soka winike mi lekuke sok jel maloʼe, yujni mi yibʼanaluke wa xbʼobʼ ajyukyujile ja skʼuʼajeli.
3 Pe tojni ja Kajwaltiki sok yeʼni oj stsatsankʼujolukex sok oj stalnayex sbʼaja Maʼ jel malo.
4 Chomajkil, ja keʼntikoni wani xjipa lek jkʼujoltikon bʼa Kajwaltik ke wani xa kʼuʼanex sok mini oja waʼexkan skʼuʼajel ja tojelal wa xkaʼatikoni.
5 Ke ja Kajwaltiki mok yakan stojel jawa kʼujolexi bʼa jachuk ja weʼnlexi oja yajtayex ja Dyosi sok jachuk oja jeʼex wa xkuchawujilex* yuja Kristo.
6 Jaxa wego kermano jumasaʼ, wa xkatikonawilex ja tojelalik it bʼa sbʼiʼil ja Kajwaltik Jesukristo bʼa oja pilabʼajex soka hermanoʼik bʼa mi tojuk ayuke sok mi snochowe ja jastik jeʼatikonawilexi.
7 Ja weʼnlexi wani xa naʼawex jastal oja nochex ja jmodotikoni, yujni ja keʼntikoni toj aytikona mokex
8 sok mini bʼa kabʼtikon waʼelal kʼebʼubʼal.* Jaʼuktoma, mini jijlitikon aʼtel kʼakʼu akwal sok jel tsats aʼtijitikon bʼa jachuk mini june bʼa weʼnlex oj katikona kʼulex gastar.
9 Mi yuj mey kiʼojtikon derecho,* pes yujni wa xkʼanatikon oj katikonawilex ja sjejel bʼa oja nochex ja jmodotikoni.
10 Chomajkil, yajni ti ajyitikona mokexi, wa xkatikonawilex ja mandar it: «Ta ay maʼ mi skʼana oj aʼtijuk, cha mokni waʼuk».
11 Yujni kabʼunejtikon yabʼalil ay jujuntik mi toj ayuke amokex, pes mini x-aʼtijiye sok wa xchʼika sbʼaje ja bʼa jas mi yochelukeʼi.
12 Wa xkatikonyi ja mandar it ja kristyanoʼik jaw sok wa xpatatikonyi skʼujole yuja Kajwaltik Jesukristo bʼa aʼatijuke sok mok yocheluke ja tuki sok ayabʼye ja swaʼele wa staʼawe soka stikaweʼi.
13 Jaxa weʼnlex kermano jumasaʼ, moka waʼexkan skʼulajel ja bʼa jas leki.
14 Pe ta ay maʼ mi skʼuʼan ja jas wa xkalatikon ja bʼa karta it, ja weʼnlexi tʼilani oja chiktesex* sok oja waʼexkan yamigoʼajel, bʼa jachuk oj kʼixwuk.
15 Pe moka wilex jastal juna kontraʼex. Mas lek moka waʼexkan yajelyi rason jastal juna wermanoʼex.
16 Ke yeʼn mismo ja Yajwalil ja lamanili ayawilex tikʼanxta ja lamanil bʼa chikan jasa. Aʼajyuka mokex awibʼanalex ja Kajwaltiki.
17 Keʼnani ja Pablo ja maʼ wa stsʼijbʼanawilex ja koltanel it, bʼa kʼotelni jun senya bʼa yibʼanal ja jkartaʼiki. Jachni wala tsʼijbʼaniyon.
18 Aʼajyuka mokex awibʼanalex ja lekil skʼujol mi xbʼajintik ja Kajwaltik Jesukristo.
Notaʼik
^ Kʼela ja bʼa Yaljelik cholubʼal.
^ Ma «wa xtekʼxiwujilex».
^ Ma «bʼa mi jtuputikon».
^ Jach kanel ja bʼa griego: «ja cholal».
^ Ma «oja kʼulukex señalar».
