2 Timoteo 1:1-18
1 Bʼa sparte ja Pablo, sjekabʼanum ja Kristo Jesús yuja jach wa skʼana ja Dyosi jastalni ja skʼapjelal bʼa sakʼanil kiʼojtik stsʼakatal yuja Kristo Jesús,
2 sbʼaja Timoteo, jun jkerem jel xkʼana:
Ja jTatik Dyos sok ja Kajwaltik Jesukristo ayawi ja lekil skʼujole mi xbʼajintiki, ja syajulal skʼujole sok ja slamanile’i.
3 Jel xkayi tsʼakatal ja Dyos, ja maʼ wa xkaʼteltay jastal skʼulane ja matik ekʼpaxtakuji sok jun jconciencia bʼa sak, sok tolabida wa xjul jkʼujol bʼa weʼna ja yajni wa xpatayi skʼujol kʼakʼu akwal.
4 Yajni wa xjul jkʼujol ja waxa pekʼa ja yalela sati, jelni xyaki gana oj kil-a bʼa oj gustoʼaxukon ele.
5 Yujni wa xjul jkʼujol ja skʼuʼajela wiʼoj bʼa mi chabʼ kara ayuk, ja it ajyiyuj bʼajtan jawa mexep Loida sok jawa nan Eunice, sok wani xkʼuʼan lek cha aya wiʼoj ja weʼni.
6 Ja yujil, wa xka juluka kʼujol aʼajluk mas jastal jun kʼakʼ ja don awiʼoj bʼa Dyos masan kawi kajan ja jkʼabʼi.
7 Yujni ja yip* wa xyakitik ja Dyosi mi wa xya xiwkotik, pes wani xyakitik ipal, yajalkʼujol sok bʼa aʼajyuk tsʼikan ja jpensartiki.
8 Ja yuj mok kʼixwan xcholjel sbʼaja Kajwaltiki sok sbʼaja keʼn, bʼa lutubʼalon yuj yeʼna. Mas lek, kʼulan aseptar ja wokolik tʼilan oj ekʼukabʼaj yuja lekil rasoniki sjipjela kʼujol bʼa yip ja Dyosi.
9 Yeʼn skoltayotik sok spayawotik bʼa oj spilotik,* pe mi jaʼuk yuja kaʼteltiki jani yuja jas wa skʼana sok yuja lekil skʼujol mi xbʼajintiki. Ja it ayxa lek tyempo jejikitik yuja Kristo Jesús.
10 Pe ja wego ilxita jaman lek yuja xchijkajel ja jKoltanumtik, ja Kristo Jesús. Ja yeʼn xchʼayunej snajel ja chamelali sok xchiktesnejkitik yuja lekil rasonik jastal oj ajyuk jun jsakʼaniltik sok jun jkuerpotik bʼa mi xjomi,
11 sbʼaja it aji ochkon choluman, jekabʼanum sok maestro.
12 Ja yuj ja keʼn cha wanon yijel yibʼanal ja wokolik it, pe mini la kʼixwiyon. Yujni wa xnaʼa sbʼaj ja it Maʼ wa xkʼuʼani, sok wani xjipa jkʼujol ja yeʼn ojni stalna ja jas kaʼunejkan bʼa skʼabʼi masan bʼa kʼakʼu jaw.
13 Moka wakan yijel ja smuestraʼil sbʼaja lekil* yaljelik awabʼ bʼa keʼni, sok moka wakan sjejel ja skʼuʼajel sok ja yajalkʼujola wiʼoji jastal june maʼ lajan ay soka Kristo Jesús.
14 Sok ja skoltanel ja yip ja Dyos* bʼa tey jmoktiki, talnay ja jas jel chaʼanyabʼal akʼubʼal bʼa wa kʼabʼi.
15 Wanxa xa naʼa yibʼanal ja winike bʼa parteʼik bʼa Asia spilata sbʼaje jmok, cha tini ay ja Figelo sok ja Hermógenes.
16 Ja Kajwaltiki a-sjeyi syajulal skʼujol ja matik tey bʼa snaj ja Onesíforo, yujni ja yeʼni tikʼanxta stsatsankʼujolanon sok mini kʼixwi yuja mochanon kadena ja bʼa preso.
17 Jaʼuktoma, yajni ti ajyi bʼa Roma, kongana sleʼawon ekʼe man staʼawon.
18 Ja Kajwaltiki ayakan ajejukyi yajulal kʼujol bʼa sparte Jyoba* ja bʼa kʼakʼu jaw. Anaʼunejxa lek ja janekʼto koltani ja bʼa Éfeso.
Notaʼik
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «bʼa lek oj yilotik».
^ Ma «meran».
^ Ma «espíritu santo». Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Kʼela ja bʼa Yaljelik cholubʼal.
