2 Timoteo 4:1-22
4 Bʼa stiʼ sat ja Dyos sok ja Kristo Jesús, bʼa oj skʼul jusgar ja matik sakʼani sok ja matik chameli, sok yuja xchijkajel ja yeʼn sok ja sGobyerno, wa xkawi ja mandar it:
2 cholo ja yabʼal ja Dyosi; moka chʼay tyempo skʼulajel* ja yajni lekto ay ja tyempo sok ja bʼa tyempoʼik wokoli; tojwanan, tsats tojwanan sok aʼa rason toj lek, pe kʼulan sok jitsan pasensya sok jastal jun lekil maestro.
3 Yujni oj ajyuk jun tyempo ja yeʼnleʼi mi oj kuchyujile ja lekil* sjejeli, pes yuja oj yiʼe ja jas wa xkʼankʼuniyujileʼi, oj sleʼe maestroʼik bʼa jaʼ oj aljukyabʼye ja jas wa skʼanaweʼi.
4 Mixa oj smaklaye ja smeranili sok jaxa oj smaklaye ja kuentoʼik mi meranuki.
5 Pe ja weʼni aʼajyuk tsʼikan jawa pensar bʼa yibʼanal ja jastik junuki, akuchukawuj ja wokoliki, kʼulan jawa waʼtel bʼa cholumani* sok kʼulan tsʼikan lek jawa waʼteli.
6 Pes wanonxa pekʼjel jastal majtanal bʼa vino, sok jelxa mojan ja tyempo bʼa oj elkon libre.
7 Tiroʼanelon ja lekil tiroʼaneli, ajnelon man xchʼakulabʼil, mini kaʼunejukan ja skʼuʼajeli.
8 Man wego pilubʼalki ja korona bʼa tojili ja it oj yaki jastal jtsʼakol ja bʼa kʼakʼu jaw ja Kajwaltik, ja tojil juesi. Pe mini kechan keʼn oj ajuki, cha jachni yibʼanal ja matik gustoxta smajluneje* ja xchijkajeli.
9 Kʼulan ja janekʼ xbʼobʼawuji bʼa mas wegoxa oj jaka wilon.
10 Yujni ja Demas sjipawonkan yuj syajtajel ja jastal wa xtax ja tyempo* it, tini waj bʼa Tesalónica; jaxa Crescente waj bʼa Galacia, sok jaxa Tito ti waj bʼa Dalmacia.
11 Kechan tey jmok ja Lucasi. Iʼajan ja Marcosi, yujni wa xmakunikuj ja bʼa aʼtel bʼa xcholjeli.
12 Jaxa Tíquico ti jeka bʼa Éfeso.
13 Yajni la jaki, iʼajan ja kapa ti kaʼakan bʼa Troas ja bʼa snaj ja Carpo sok cha jachni ja royoʼiki, pe mokni chʼayuka kʼujol ja pergaminoʼiki.*
14 Ja Alejandro, ja maʼ wa xyaʼteltay ja kobre, ixta yilawon. Ja Jyoba* ojni ya stupe.
15 Cha aʼa kuidado soka yeʼn, yujni kongana skontraʼan ja rason wa xcholotiki.
16 Ja bʼa sbʼajtanil ekʼele jkoltay jbʼaji mini maʼ ti ajyi jmok, pes chʼakni sjiponekan. Wa xkʼana mokni kʼanjukyile kuenta yuja jawi.
17 Pe tini ajyi jmok ja Kajwaltiki sok stsatsankʼujolanon, bʼa jachuk yuj keʼna oj cholxuk tsʼikan lek sok oj yabʼye yibʼanal ja chonabʼiki, sok aji elkon libre ja bʼa stiʼ ja choji.
18 Ja Kajwaltiki oj ya elkon libre bʼa spetsanil jastik mi lekuk sok ojni skoltayon bʼa oj yiʼon ja bʼa sGobyerno bʼa satkʼinali. Aʼaxukyi stoyjel bʼa tolabida. Amén.
19 Tixa wawexkiyi skoltanel ja Prisca* soka Áquila sok ja matik tey bʼa snaj ja Onesíforo.
20 Ja Erasto ti kan bʼa Corinto, jaxa Trófimo maloʼay kaʼakan ja bʼa Mileto.
21 Kʼulan ja janekʼ xbʼobʼawuj bʼa oj julan bʼajtanto oj kʼeʼuk ja styempo cheʼeji.*
Ja Eubulo wa sjeka akoltanel, sok cha jachuk ja Pudente, ja Lino, ja Claudia sok yibʼanal ja hermanoʼiki.
22 Aya koʼuka lekilal ja Kajwaltik ja jastal jel puesto* wala ajyi. Aʼajyuka mokex ja lekil skʼujol mi xbʼajintiki.
Notaʼik
^ Ma «kongana kʼulan».
^ Ma «meran».
^ Ma «moka wakan xcholjel ja lekil rasoniki».
^ Ma «skʼanuneje».
^ Kʼela ja bʼa Yaljelik cholubʼal.
^ Wa xkʼan alxuk, ja tsʼuʼum royoʼik. Kʼela ja bʼa Yaljelik cholubʼal, Pergamino.
^ Kʼela ja bʼa Yaljelik cholubʼal.
^ Cha wa sbʼiʼilan Priscila.
^ Ma «invierno».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
