3 Juan 1:1-14

  • Wa sjeka koltanel ja Juan sok ja orasyon wa skʼulani (1-4)

  • Wa stoyo ja Gayo (5-8)

  • Ja Diótrefes, ja maʼ jel skʼana stajel jastik junuk (9, 10)

  • Jelni lek staʼawe tiʼal ja Demetrio (11, 12)

  • Wa xchapa b’a oj waj yil ja Gayo sok wa sjekawe koltanel (13, 14)

1  B’a sparte ja ansyano* sbʼaja Gayo, ja kala kermano, ja ma’ meran jel xyajtayi. 2  Kala kermano, wa xkayi orasyon bʼa lek awajukawuj bʼa yibʼanal sok bʼa lek oj ajyan, jastalni lek wan wajelawuj ja wego. 3  Pes jelni yaki gusto yajni jakye ja hermanoʼiki sok yalawe toj ajyela ja b’a smeranili, ke me xa waʼakan ajyel ja bʼa sbʼejlalil ja smeranili. 4  Mini ay pilan jasunuk wa xyaki mas gustoʼil* ke yuja it: ke ja kuntikili me xyaʼawekan ajyel ja bʼa sbʼejlalil ja smeranili. 5  Kala kermano, wana sjejel toj aya soka jastik junuk waxa kʼulan yuja hermanoʼiki, ama mixa naʼa sbʼaje. 6  Ja yeʼnleʼi yaluneje yabʼ ja kongregasyon sbʼaja syajala kʼujoli. Awa pabor, koltaye soka jas wa xmakuniyujile ja bʼa sbiajeʼe sok kʼulan bʼa jun modo lek wa xyila ja Dyosi. 7  Yujni ja yeʼnleʼi jaʼ wajye yuja sbʼiʼil ja yeʼn, sok mini jas smajlaye oj ajukyile yuja kristyano bʼa chonabʼiki. 8  Ja yuj ja keʼntiki obligadoni aytik bʼa sjejelyile jaman jkʼujoltik ja hermanoʼik jastal yeʼnleʼi, bʼa jachuk oj jkoltaytik ja smeranili. 9  Ayni jas jtsʼijbʼanyi ja kongregasyoni, pe ja Diótrefes, ja maʼ wa xyiʼaj gusto yeʼn bʼajtan oj ajyuk ja bʼa yeʼnleʼi, mini tʼun skisa ja jas wa xkalatikoni. 10  Ja yujil, ta wajyon ja tiwi, ojni jchiktes ja jas wan skʼulajeli, b’a wani sloʼiltayotikon ekʼ sok yaljelik bʼa malo. Sok mini xmalxi soka jawi, pes cha mini skisa sok mini skʼulan resibir ja hermanoʼiki. Sok jaxa matik wa skʼanawe oj skʼule resibiri, ja yeʼn wa sleʼa modo skomjele sok yajel eluke ja bʼa kongregasyoni. 11  Kala kermano, moka nebʼ ja b’a jas mi lekuki, mas lek nebʼa ja b’a jas leki. Ja maʼ wa skʼulan ja bʼa jas leki tini jakel bʼa Dyos. Ja maʼ wa skʼulan ja bʼa jas mi lekuki mito snaʼunejuk sbʼaj ja Dyosi. 12  Yibʼanal ja yeʼnle’i jelni lek staʼuneje tiʼal ja Demetrio sok jaxa jastik alubʼal it wani xchiktes bʼa akuerdoni ay soka smeranil ja jastal yiʼoj ja sakʼanili. Sok cha jachuk ja keʼntikoni wani xtaʼatikon tiʼal, sok ja weʼn wani xa naʼa ke meran ja jas wa xkalatikoni. 13  Jelni ja jas oj jtsʼijbʼukawi ajyi, pe mini xkʼana oj jtsʼijbʼukawi ja it b’a jun karta. 14  Jaʼuktoma, wani xkʼana ojxta kil-a sok oj loʼilanukona mok bʼa stiʼ asat. Aʼajyuka lamanil. Wa sjekawe akoltanel ja kamigotiki. Ayi skoltanel kada jujune ja kamigotik b’a jparte keʼna.

Notaʼik

^ Ma «ja maʼ ayxa skʼujoli».
^ Ma bʼobʼta «rasonik bʼa yajel tsʼakatal».
TRADUCCIÓN DEL NUEVO MUNDO DE LAS SANTAS ESCRITURAS
3 Juan 1
tojol-abʼal
Kʼuman ja Biblia bʼa Internet
https://cms-imgp.jw-cdn.org/img/p/1011208/univ/wpub/1011208_univ_sqr_xl.jpg