Filemón 1:1-25
1 Bʼa sparte ja Pablo, ja maʼ tey bʼa preso yuja Kristo Jesús, sok bʼa sparte ja kermanotik Timoteo. Ja keʼn wa stsʼijbʼanawi ja weʼn Filemón ja jkoltanumtikon jel xyajtaytikoni,
2 cha jachuk ja kermanatikon Apfia sok ja Arquipo ja jmojtikon soldado bʼa Kristo, sok ja kongregasyon tey bʼa wa naji:
3 Ja jTatik Dyos sok ja Kajwaltik Jesukristo ayawilex ja lekil skʼujole mi xbʼajintik sok ja slamanile.
4 Tolabida wa xkayi tsʼakatal ja jDyos yajni wa xtaʼawa tiʼal ja bʼa korasyoni,
5 yujni wa xkabʼ yabʼalil sbʼaja skʼuʼajela wiʼoji sok ja syajala kʼujol awiʼoj sbʼaja Kajwaltik Jesús sok bʼa* yibʼanale ja matik tsaʼubʼalexa sbʼaja Dyosi.
6 Wa xkayi orasyon bʼa jachuk ja skʼuʼajela wiʼoj jastal ja tuk a-snika bʼa snajel yibʼanal ja jastik lek kiʼojtik stsʼakatal yuja Kristo.
7 Yajni kabʼ sbʼaja syajala kʼujol awiʼoji, jelni ya gustoʼaxukon sok yaʼa kulan jkʼujol. Pes stsʼakatal yuja weʼn kala hermano, aji likikuk ja skʼujole ja matik tsaʼubʼalexa sbʼaja Dyosi.
8 Ja yujil, ama wa xbʼobʼ kalawabʼ jaman lek bʼa sbʼiʼil ja Kristo sok yajelawi mandar bʼa oja kʼuluk ja bʼa toji,
9 masni lek wa xkabʼ oj jpata kʼujol yuja wa xnaʼa jela yajtani. Yujni ja keʼn, ja Pablo, jun winikon ayxa jkʼujol sok ja wego teyon bʼa preso yuja Kristo Jesús.
10 Wa xpata akʼujol yuja jkerem Onésimo, ja maʼ kʼot jastal jkerem ja bʼa preso.*
11 Ja ajyi mini xmakuni awuj, pe ja wego wanxa sok cha wanxani xmakunikuj ja keʼn.
12 Wa xka kumxukawi ja maʼ jel xkʼana.
13 Wanike xkʼana oj kan jmok bʼa jachuk yeʼn oj kanuk bʼa wa lugar sok oj skoltayon ja janekʼ tyempo oj ajyikon lutan yuja lekil rasoniki.
14 Pe mini xkʼana ay jas oj jkʼuluk ta mi jobʼunejukawi, bʼa jachuk oja kʼuluk sok spetsanila kʼujol ja lekil aʼtel it, sok mi obligadoʼuk.
15 Bʼobʼta ja yuj sjipawakan jun tyempo* yuja it: bʼa ojto kumxuka mok sok ojxa kanuka mok bʼa tolabida,
16 pe mixa kechanuk jastal jun moso, ojxani kʼot jastal jun wala wermano. Ja keʼn jelni xkʼana, pe mastoni oja kʼan ja weʼn, yuja cha lajanxa oj ajyaniki sok yuja junxa wa wermano.
17 Ja yuj, ta waxa wilawon jastal juna wamigo,* gustoxta kʼulan resibir, jastalni oja kʼulukon resibir ja keʼn.
18 Chomajkil, ta ay jas skʼulanawi ma ay sjela mok, keʼn oj jtupawi.
19 Keʼn ja Pablo, keʼn wa stsʼijbʼanawi: keʼnani oj jtupawi (pe mixani xtaʼa tiʼal yuja aya jel jmok soka wa sakʼanili).
20 Jachukniʼa kermano, kʼulanki ja pabor it yuja Kajwaltiki; alikikuk ja jkʼujol yuja Kristo.
21 Wani xnaʼa lek ojni akʼuluk, ja yuj wa stsʼijbʼanawi yujni wa xnaʼa mi kechan ita oja kʼuluk ja jas wa xkalawabʼi.
22 Chomajkil, chapaki jun lugar bʼa oj jijlukon, yujni wa xmajlay oj cha jekjukona mokex* stsʼakatal yuja wa worasyonexi.
23 Ja Epafras, ja jmoj presoʼanum bʼa lajan ay soka Kristo Jesús, wa sjeka akoltanel.
24 Cha wa sjeka akoltanel ja jmojiki: ja Marcos, ja Aristarco, ja Demas sok ja Lucas.
25 Aʼajyuka mokex ja lekil skʼujol mi xbʼajintik ja Kajwaltik Jesukristo yuja jel puesto* wala ajyiyexi.
Notaʼik
^ Ma «sbʼa».
^ Jach kanel ja bʼa griego: «ja bʼa kadenaʼik».
^ Jach kanel ja bʼa griego: «jun ora».
^ Ma «juna moj».
^ Ma «oj ajukon el libre bʼa weʼnlex».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
