Gálatas 1:1-24
1 Bʼa sparte ja Pablo, jun jekabʼanum bʼa mi sparteʼuk kristyano sok mini bʼa jun winik, jani bʼa sparte ja Jesukristo sok ja Tatal Dyosi, ja maʼ ya kʼeʼuk ja bʼa chamwiniki,
2 sok bʼa sparte yibʼanale ja hermanoʼik tey jmoki wa stsʼijbʼantikonawilex ja matik teyex bʼa kongregasyonik bʼa Galacia:
3 Ja jTatik Dyos sok ja Kajwaltik Jesukristo ayawilex ja lekil skʼujole mi xbʼajintik sok ja slamanileʼi.
4 Ja Kristo yaʼa ja sakʼanil yuja jmultiki bʼa yajel elkotik libre sbʼaja jastal jel malo wa xtax ja tyempo* it jastalni wa skʼana ja jTatiki sok ja jDyostiki,
5 ja maʼ atoyxuk bʼa tolabida. Amén.
6 Jelni cham xkabʼ yuja jel wego wanex jitsel* sbʼaja Maʼ spayawex yuja lekil skʼujol mi xbʼajintik ja Kristo sok wanex snochjel pilan tik’e lekil rasonik.
7 Mi yuj ay tuk lekil rasonik, pes yujni ay jujuntik wa xyawilex wokol sok wa skʼanawe oj sjom-e ja lekil rasonik sbʼaja Kristo.
8 Pe ta ay june wa xcholowabʼyex tuk jasunuk sbʼaja lekil rasonik jcholunejtikona wabʼyexi, ama june bʼa keʼntikon ma jun anjel bʼa satkʼinal, achʼay snajel.
9 Wa xkalawabʼyex yajkʼachil ekʼele ja jas kalunejtikonxa awabʼyex bʼajtani: chikan maʼ xcholowabʼyex tuk jasunuk sbʼaja lekil rasonika kʼuʼunejexi, achʼay snajel.
10 ¿Wanon maʼ slejel modo skʼulajel ganar ja winikeʼi, ma jaʼa Dyosi? ¿Yuj maʼ wanon slejel modo bʼa yajel gustoʼaxuk ja winikeʼi? Lek yuj jato wanon yajel gustoʼaxuk ja winikeʼi, mini kʼotelukon smoso ja Kristo.
11 Pes wa xkʼana oja naʼex kermano jumasaʼ, ke ja lekil rasonik jcholo wabʼyexi mini ti jakeluk bʼa kristyano.
12 Pes mini yaki jun winik sok mini jejiki, kʼotni ajyukuj stsʼakatal yuja jas sjeʼaki ja Jesukristo.
13 Merani’a, ja weʼnlexi awabʼyex yabʼalil sbʼaja jastalon ajyi ja yajni wa xkʼulan ja jas wa sjeʼawe ja judíoʼiki. Awabʼyex yabʼalil kongana kiʼajyi spatik ja skongregasyon ja Dyosi sok jleʼa modo xchʼayjel snajel.
14 Chomajkil, mastoni wanon snebʼjel ajyi ja jas wa sjeʼawe ja judíoʼik ke yuj jitsane ja bʼa jchonabʼ bʼa junxta jabʼilsoke, pes yujni wa xkʼujolan bʼa oj jkʼuluk sok spetsanil jkʼujol ja skostumbre ja matik ekʼpaxtakuji.
15 Pe yajni ja Dyos, ja maʼ ya pojkukoni* sok spayawon yuja lekil skʼujol mi xbʼajintiki, lek yila
16 xchiktesel ja Yunini sok yajel makunukon bʼa xcholjel yabʼ ja chonabʼik ja lekil rasonik sbʼaja Yunini, ja keʼn mini wegoxta waj jobʼyi jun kristyano.
17 Cha mini wajyonkʼe ja bʼa Jerusalén bʼa oj kil ja matik ochelexa jekabʼanumil bʼajtanto yuja keʼn. Pes tini wajyon bʼa Arabia sok tixa cha kumxiyon bʼa Damasco.
18 Sok oxe jabʼil tsaʼan, wajyonkʼe bʼa Jerusalén bʼa yulatajel ja Cefas* sok ti kanyonsok 15 kʼakʼu.
19 Pe mini kila ja tuk jekabʼanumiki; kechani ja Santiago, ja yermano ja Kajwaltiki.
20 Wani xkalawabʼyex bʼa stiʼ sat ja Dyos ke mini abʼaluk ja jas wanon stsʼijbʼajelawilexi.
21 Tsaʼan tixa wajyon ja bʼa parteʼik bʼa Siria sok bʼa Cilicia.
22 Pe ja skongregasyonik ja Kristo tey bʼa Judea mini bʼa snaʼawe jbʼaja.
23 Kechan wa xyabʼye yabʼalil: «Ja winik maʼ wa xyiʼaj jpatiktik ajyi ja wego wanxa xcholjel ja lekil rasonik sbʼaja skʼuʼajel wa sleʼa modo xchʼayjel snajel ajyi».
24 Ja yuj kʼe stoy-e ja Dyos yuj keʼna.
Notaʼik
^ Kʼela ja bʼa Yaljelik cholubʼal, Ja jastal wa xtax ja tyempo.
^ Ma «piljel».
^ Ma «ya manxukoni». Jach kanel ja bʼa griego: «spilawon ja bʼa smatriz ja jnani».
^ Cha wa sbʼiʼilan Pedro.
