Gálatas 4:1-31
4 Pe ja wego wa xkalawabʼyex, yajni chʼinto ja maʼ oj yikan ja dote, mini tukuk kʼotel yuj jun moso, ama yeʼn ajwalal sbʼa yibʼanal ja jastik junuki.
2 Pes ayni stalnanumik sok smayordomoʼik masan xkʼot ja skʼakʼujil stsaʼunejxa ja stati.
3 Cha jachni ja keʼntiki, yajni chʼinotikto, cha kʼotikni smosoʼil ja bʼa jastal wa spensaraʼan sok ja bʼa smodo ja luʼumkʼinal it.
4 Pe yajni kʼot ja tyempo tsaʼubʼali, ja Dyosi sjekakon ja yunini, bʼa tini pojki* bʼa jun ixuk sok yiʼaj ja sakʼanil jastalni wa xyala ja leyi,
5 bʼa jachuk oj sman sok oj ya el libre ja matik yiʼoj ja sakʼanile jastalni wa xyala ja leyi, sok jachuk ja keʼntiki oj kʼotkotik jastal yuntikil.
6 Yuja kʼotelex yuntikil ja Dyosi, ja yeʼn sjekunejkon bʼa jkʼujoltik ja ipal* akʼubʼalyi ja Yunini, jaxa it wa xya kaltik: «¡Abba,* Tat!».
7 Ja yuj kʼotelaxa yuntikil sok mixa mosoʼuka. Sok ta yuntikilaxa ja Dyosi, ojni cha yawi juna dote.
8 Pe ja yajni mito xa naʼawex sbʼaj ja Dyosi, kʼotelex mosoʼil ajyi sbʼaja matik mi meran dyosukeʼi.
9 Pe ja wego yuja wanxa xa naʼawex sbʼaj ja Dyosi, ma wa xkʼan kal, ja wego yuja wanxa snaʼa bʼajex ja Dyosi, ¿jas yuj wala kumxiyex ja bʼa jastik it bʼa luʼumkʼinal bʼa mey yip sok mi xmakuni sok cha waxa kʼanawex oj ochanik smoso yajkʼachil ekʼele?
10 Pes tʼilan waxa kʼintayex kʼakʼujik, ixawik, tyempoʼik* sok jabʼilik.
11 Wala xiwyon yuj weʼnlex, pes bʼobʼta lom jchʼakunej kip amokex.
12 Kermano jumasaʼ, wa xpata akʼujolex kʼotanik jastal keʼna, yujni ja keʼn cha jach wajyon jastal weʼnlex. Ja weʼnlexi jelni leka wilawonex.
13 Pes wani xa naʼawex ke yuj jun chamel bʼobʼ jcholawabʼyex sbʼajtanil ekʼele ja lekil rasoniki.
14 Sok ama ja jastal wala taxyon kʼot jun prueba bʼa weʼnlex, mini awijnayonex sok mini kistala wilawonex.* Jaʼuktoma, akʼulanonex resibir jastal jun yanjel Dyos, jastalni ja Kristo Jesús.
15 ¿Bʼaxa ay ja gustoʼil it awiʼojex ajyi? Yujni wa xkʼuʼan lek, lekbʼi bʼobʼukto, awawexni eluk jawa satexi sok awawexki.
16 Jaxa wego, ¿akontraʼonex yuja wa xkalawabʼyex ja smeranili?
17 Pe ja yeʼnleʼi jelni skʼanawe juntiro oj smona kʼujolex, pe mini sok lekil skʼujole. Wa skʼanawe oj spilex jmok bʼa jachuk oja kʼanex snochjel ja yeʼnleʼi.
18 Pe jelni lek ja tolabida aʼajyuk june maʼ sok lekil skʼujol oj sleʼ modo tarega oj smona kʼujolex, sok mi kechanuk ja yajni teyona mokexi.
19 Kala kuntikil jumasaʼ, yuj weʼnlex tʼilan oj cha kabʼ syajal yajkʼachil ekʼele jastal yajni wa x-ajyi yal jun ixuk, masan xa jeʼawex ja smodo ja Kristo.
20 Wanike xkʼana ti oj ajyukona mokex ja wego sok oj jkʼumukex b’a pilan modo, yujni mi xnaʼa jas oj jkʼuluka mokex.
21 Alawikabʼi, ja weʼnlex ja matik waxa kʼanawex oja wiʼex jawa sakʼanilex jastalni wa xyala ja leyi, ¿mi maʼ xa wabʼyex ja jas wa xyala ja Leyi?
22 Jun sjejel, tsʼijbʼunubʼalkan ke ja Abrahán ajyi chabʼ yunin: june soka aʼtijum ixuki sok june soka ixuk libre ayi.
23 Ja yal ja aʼtijum ixuki pojki jastal chikan maʼ kristyano, jaxa bʼa ixuk libre ayi pojki yuj jun skʼapjelal.
24 Spetsanil ja it wani xbʼobʼ ilxuk jastal jun loʼil bʼa ay jas wa senyaʼan, pes ja ixuke it wa senyaʼan chabʼ trato. June ti kʼulaxi bʼa wits Sinaí, spetsanil ja matik chʼikane ja bʼa trato it kʼotele mosoʼik sok ja trato it jach jastal Agar.
25 Ja Agar jani wa senyaʼan ja Sinaí, jun wits bʼa Arabia, sok jani ja Jerusalén bʼa jtyempotik, pes ja yeʼn mosoni ay soka yuntikili.
26 Pe libreni ay ja Jerusalén bʼa nalanchaʼani, sok yeʼnani ja jnantiki.
27 Pes tsʼijbʼunubʼal: «Gusto ajyan, ixuk bʼa mi xbʼobʼa wila wuntikil. Awanan yuja gustoʼil, ixuk bʼa mi awabʼunej syajal ajyela wuntikil. Yujni mas jitsan ja yuntikil ja ixuk bʼa jipubʼalkani ke yuja ixuk ay statami».
28 Ja yuj kermano jumasaʼ, weʼn kʼotelex ja yuntikil ja jas kʼapubʼali, jastalni waj ja Isaac.
29 Pe jastalni ekʼ ja bʼa tyempo jaw soka uninal pojki jastal chikan maʼ kristyanoʼil och yil kontra ja maʼ pojki yuja yip ja Dyosi,* cha jachni wa x-ekʼ ja wego.
30 Pe ¿jasa wa xyala ja Yabʼal ja Dyosi? «Nutsu-el ja aʼtijum ixuk soka skeremi. Ja skerem ja ixuk libre ayi mini tʼun oj spil ja sdote soka skerem ja aʼtijum ixuki».
31 Ja yuj kermano jumasaʼ, mi yuntikilotik jun aʼtijum ixuk, jani yuntikilotik ja ixuk libre ayi.
Notaʼik
^ Ma «manxi».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Jun yaljel bʼa kʼumal hebreo ma arameo wa stojolan ‹¡kala, tat!›.
^ Wa xkʼan alxuk, tyempoʼik pilubʼal bʼa kʼinik.
^ Ma «mini atsujbʼayonex».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
