Gálatas 6:1-18
6 Kermano jumasaʼ, lekbʼi jun winik mi tojuk wan yijel ja sbʼeji pe mi xyaʼa sbʼaj kuenta, ja weʼnlex matik takʼanexa,* leʼawik modo stojel ja winik jaw bʼa jun modo* laman.* Pe kada jujune a-stalna sbʼaj bʼa jachuk mi oj cha ajuk och probar.
2 Iʼajik lajan jawa kargaʼexi, sok jachuk oja kʼulukex ja ley bʼa Kristo.
3 Pes ta aykʼa maʼ wa spensaraʼan lajansok kechan yeʼna yajni mi jas kʼoteli, yeʼnxtani wan sloʼlajel sbʼaj.
4 Pe kada jujune a-spakla ja jastik wa skʼulani, sok jachuk oj ajyukyuj rason bʼa oj gustoʼaxuk yuja jas skʼuluneji, pe mokni slaj sbʼaj soka tuki.
5 Yujni kada jujune yeʼn kajan sbʼaj skʼulajel ja cholal yiʼoji.
6 Chomajkil, chikan maʼ wan jejelyi ja yabʼal ja Dyosi a-skʼep sbʼaje chikan jas lek soka maʼ wan sjejeli.
7 Moka loʼlabʼajex: mini maʼ xbʼobʼ yixtalaʼuk* ja Dyosi. Yujni chikan jas stsʼunu jun kristyano jani oj yil sat.
8 Ja maʼ wa stsʼunu spensarajel sbʼaja jastik wa xkʼankʼuniyuj ja kuerpoʼali ojni yil sat ja jas mi lekuk* wa xyiʼajan ja kʼankʼunelik mi lekuki, pe ja maʼ wa stsʼunu spensarajel sbʼaja yip ja Dyosi* ojni yil sat ja bʼa yip ja Dyos ja sakʼanil bʼa tolabida.
9 Ja yuj mok katikan skʼulajel ja jas leki, yujni oj kʼot ja styempoʼil oj kiltik sat ta mi la yajtikaxitiki.*
10 Ja yujil, yajni ay modo skʼulajel, la jkʼuluktikyi bʼa jas lek chikan machʼa, pe mastoni ja kermanotik bʼa junxta skʼuʼajel kiʼojtiksoki.
11 Kʼelawik janekʼto sniwakil ja letraʼik bʼa keʼn mismo jtsʼijbʼunejawilex.
12 Yibʼanal ja matik wa skʼanawe oj yawe gustoʼaxuk ja kristyano yeʼnleni ja matik wa stʼenawex bʼa oja wawexyi senya jawa winkilexi. Ja it wa skʼulane kechan bʼa mok ijuk spatike yuja sposte bʼa yijel wokol* ja Kristo.
13 Pes mini skʼulane tsʼikan ja Ley ja matik wa xyaweyi senya ja swinkile, pe ja yeʼnleʼi wani skʼanawe oja wawexyi senya jawa winkilexi bʼa jachuk oj stoy sbʼaje yuja jas kʼulubʼalyi jawa kuerpoʼexi.
14 Pe ja keʼn wani xmajla bʼa mini nunka ay jas oj jtoy jbʼaj, kechani sbʼaja Kajwaltik Jesukristo ja maʼ cham ja bʼa sposte bʼa yijel wokoli,* pes yuja xchamelal ja yeʼn ja luʼumkʼinali chamtani bʼa keʼna sok jaxa keʼn chamyontani sbʼaja luʼumkʼinali.
15 Yujni mi jaʼuk tʼilan ja yajelyi senya ja swinkil june ma miyuk, pes ja jas tʼilani jani kʼotel jun yajkʼachil kʼulbʼen.
16 Ja lamanil sok ja yajulal kʼujoli ti x-ajyi soka matik wane yijel jun sakʼanil jastalni ja tikʼe modoʼal jaw, jaʼi, sbʼaja Israel bʼa Dyosi.
17 Masan wego, mokxa maʼ yaki wokol, yujni tey kiʼoj bʼa jkuerpo ja markaʼik bʼa wa sjeʼa kʼotelon jun smoso ja Jesús.
18 Kermano jumasaʼ, aʼajyuka mokex ja lekil skʼujol mi xbʼajintik ja Kajwaltik Jesukristo yuja jel puesto* wala ajyiyexi. Amén.
Notaʼik
^ Ma «ja matik tojubʼalex yuja yip ja Dyosi».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «mansoxta», «kʼun».
^ Ma «skʼul burlar».
^ Jach kanel ja bʼa griego: «ja jomelal».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «mi x-el jganatiki».
^ Kʼela ja bʼa Yaljelik cholubʼal, Poste bʼa yijel wokol.
^ Kʼela ja bʼa Yaljelik cholubʼal, Poste bʼa yijel wokol.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
