Apocalipsis 1:1-20
1 Ja jas aji ekʼyi* ja Jesukristo yuja Dyosi, bʼa sjejelyi ja smosoʼik ja jastik tʼilan ojxta ekʼuki. Ja Jesukristo sjeka ja yanjeli, sok yuja anjel it, sjeʼayi sok senyaʼik ja smoso Juani,
2 ja maʼ xcholo ja rason yaʼa ja Dyosi sok ja jas ya ekʼuk ja Jesukristo, janiʼa, ja maʼ xcholo yibʼanal ja jastik yila.
3 Jel gusto wa x-ajyi ja maʼ wa skʼuman tsats ja jastik it alubʼalkani sok agustoʼaxuke ja matik wa smaklaye sok wa skʼuʼane ja jastik tsʼijbʼunubʼali, yujni mojanxa ja tyempo tsaʼubʼali.
4 Bʼa sparte ja Juan sbʼaja juke kongregasyon teye bʼa parteʼik bʼa Asia:
Aʼajukawilex ja lekil kʼujolal mi xbʼajintik sok ja lamanil bʼa sparte «ja Maʼ sakʼan ayi sok ja maʼ tixani sakʼani sok ja maʼ ti jakumi», bʼa sparte ja juke yip ja Dyos* bʼa teye bʼa stiʼ ja strono
5 sok bʼa sparte ja Jesukristo, ja Tojil Testigo, ja Maʼ kʼe bʼajtan ja bʼa chamwiniki sok ja sMandaranumil ja reyik bʼa luʼumi.
Ja maʼ wa syajtayotiki sok ya elkotik libre ja bʼa jmultiki stsʼakatal yuja xchikʼeli,
6 sok ya kʼotkotik jun gobyerno sok sacerdoteʼik sbʼaja sTat sok sDyosi, ja yeʼn a-sbʼajuk ja toyjelal sok ja ipal bʼa tolabida. Amén.
7 ¡Kʼelawik! Oj jak bʼa sat ason sok yibʼanale oj chʼak yil-e, asta ja matik stsʼapaweyi lansa; sok yuj yeʼna yibʼanal ja kʼoleʼik bʼa luʼum oj smakʼ* ja yaltsile yuja syajali. Jachukniʼa, amén.
8 «Keʼnon ja Alfa sok ja Omega»,* jach wa xyala ja Jyoba* Dyosi, «ja Maʼ sakʼan ayi sok ja maʼ tixani sakʼani sok ja maʼ ti jakumi, ja Maʼ kechan jel ja yipi».
9 Keʼnon ja Juan, jawa wermanoʼex sok jawa mojex bʼa yijel wokol, jawa mojex bʼa mandaraneli sok ja bʼa kuchelkujtik* jastal snochuman ja Jesús. Ja keʼn ti ajyiyon ja bʼa isla* sbʼiʼil Patmos yuj yaljel sbʼaja Dyosi sok yuj xcholjel sbʼaja Jesús.
10 Ja yip ja Dyos* yiʼajon-el masan bʼa skʼakʼujil ja Kajwaltiki, sok jaxa bʼa jpatiki ti kabʼ jun kʼumal bʼa jel ja yipi, jastal ja yokʼel jun trompeta,
11 sok yala: «Tsʼijbʼan bʼa jun royo ja jas waxa wila sok jekayi ja juke kongregasyoni: ja Éfeso, ja Esmirna, ja Pérgamo, ja Tiatira, ja Sardis, ja Filadelfia sok ja Laodicea».
12 Ja keʼn jsutu jbʼaj bʼa oj kil machun wa skʼumanon, sok yajni jsutu jbʼaji, ti kila juke kandelabro bʼa oro.
13 Ja bʼa yoj snalan ja kandelabroʼiki ti kila june jastal jun yunin winik* bʼa lapanyuj jun kʼuʼal wa xkʼot man yok, sok lapanyuj jun paja bʼa oro ja bʼa yibʼ yaltsili.
14 Chomajkil, ja yolom sok ja stsoʼotsil yolomi sakxta jastal sakal stsoʼotsil chej, jastal ja teʼew, sok jaxa sati jach jastal ja yajlubʼil kʼakʼ.
15 Sok jaxa yoki xlijpixta jastal ja lekil kobre yajni wan ulbʼel ja bʼa yoj chakal kʼakʼ, jaxa skʼumali jach jastal ja skululel jitsan yok jaʼ.
16 Ja bʼa stojol skʼabʼi ayiʼoj juke kʼanal; jaxa bʼa stiʼi wan elel jun espada bʼa xchabʼil lado ja yeji sok najat sok jayxta ja yeji, jaxa sniʼ sati jach jastal yajni xlijpixta ja kʼaʼuji.
17 Yajni kila, ti mokʼyon ja bʼa stiʼ sati sok lajansok chamyonkani.
Sok ti yaki kajan ja stojol skʼabʼi sok yalakabʼi: «Mok xiwan. Keʼnon ja Bʼajtani sok ja Último,
18 sok ja maʼ sakʼani. Ja keʼn chamyon, pe ja wego sakʼanonxa bʼa tolabida, sok ayni kiʼoj ja syabeʼil ja chamelali sok ja Kʼeʼeni.*
19 Ja yuj tsʼijbʼan ja jastika wila, ja jastik wan ekʼel ja wego sok ja jastik oj ekʼukʼ tsaʼan yajni x-ekʼ ja jastik it.
20 Jani it ja jas jel chaʼanyabʼal jakel bʼa Dyos* sbʼaja juke kʼanal awila ja bʼa stojol jkʼabʼi sok sbʼaja juke kandelabro bʼa oro: ja juke kʼanali jani wa senyaʼan ja anjelik ja bʼa juke kongregasyoni sok jaxa juke kandelabro jani wa senyaʼan ja juke kongregasyoni».
Notaʼik
^ Ja bʼa griego, apokálypsis. Ja bʼiʼilal it ti jakel bʼa jun yaljel bʼa wa stojolan ‹yajel eluk ja smajkili› ma ‹yajel eluk ja smusulabʼili›.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «oj stumtsuk».
^ Ma «ja A sok ja Z». Ja alfa sok ja omega jani ja bʼajtan sok ja último letra ja bʼa alpabeto bʼa griego.
^ Kʼela ja bʼa Yaljelik cholubʼal.
^ Ma «tekʼxelkujtik».
^ Kʼela ja bʼa Yaljelik cholubʼal.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Kʼela ja bʼa Yaljelik cholubʼal, Yunin ja Winiki.
^ Ma «Hades». Wa xkʼan alxuk, ja lugar wa senyaʼan ja bʼa wane jijlel ja chamwiniki. Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal, Ja jas jel chaʼanyabʼal wa xjak bʼa Dyosi.
