Apocalipsis 10:1-11
10 Ti kila jun pilan anjel jel ja yipi sok ti koʼumkon bʼa satkʼinal bʼechʼansok jun ason, sok ay jun kʼintum ja bʼa yolomi. Ja sati jach jastal ja kʼaʼuji, sok jaxa yoki jach jastal snililel kʼakʼ.
2 Sok syamunej jun yal chʼin royo bʼa paʼelxa. Ti yaʼa ja stojol yok bʼa sat mar, jaxa surda ti yaʼa bʼa sat luʼum.
3 Anto ti awani tsats lek jastal wa x-awani jun choj. Sok yajni awani, kʼumaniye ja juke chawuki.
4 Yajni kʼumaniye ja juke chawuki, ja keʼn ojxta jtsʼijbʼuk ajyi ja jas yalaweʼi, pe ti kabʼ elkon jun kʼumal ja bʼa satkʼinali sok yala: «Bʼukʼukan ja jastik yalawe ja juke chawuki sok moka tsʼijbʼuk».
5 Sok jaxa anjel kila tekʼan ekʼ ja bʼa sat mari sok ja bʼa sat luʼumi sjacha ja stojol skʼabʼ bʼa satkʼinal
6 sok ya och testigoʼil ja Maʼ sakʼan ay bʼa tolabida, ja maʼ skʼulan ja satkʼinali sok ja jastik ay ja tiwi, ja luʼumi sok ja jastik ay ja tiwi, ja mari sok ja jastik ay ja tiwi. Sok yala: «Mixani ojto albʼuk mas.
7 Jaʼuktoma, ja bʼa kʼakʼujik yajni ojxta ya okʼuk ja strompeta ja sjukil anjeli, ojni kʼot smeranil ja jas jel chaʼanyabʼal wa xjak bʼa Dyosi* ja it ya ekʼyi ja smosoʼik alumanik jastal lekil rasonik».
8 Cha ti kabʼ wa skʼumanon pilan ekʼele ja kʼumal bʼa satkʼinali. Yalakabʼi: «Kaʼax sok iʼaj ja royo jaman ayi sok tey bʼa skʼabʼ ja anjeli ja it tekʼan ekʼ bʼa sat mari sok ja bʼa sat luʼumi».
9 Jaxa keʼn wajyon ja bʼay ja anjeli sok jkʼanayi ja yal chʼin royo. Sok jaxa yeʼn sjakʼaki: «Iʼaj ja royo sok kʼuxukoʼe. Ojni snik syajal* jawa lukumi, pe ja bʼa yoja tiʼi chiʼ oja wabʼ jastal yalel chabʼ».
10 Ja yuj kiʼaj ja yal chʼin royo ja bʼa skʼabʼ ja anjeli sok jkʼuxukoʼe. Ja bʼa yoj jtiʼi chiʼxta kabʼ jastal yalel chabʼ, pe yajni jkʼuxutakoʼi och yajbʼuk* ja jlukumi.
11 Sok ti yalawekabʼa: «Tʼilan oja wal yajkʼachil ekʼele ja jas oj ekʼ sbʼaj ja lugariki, ja chonabʼiki, ja kʼumaliki sok ja jitsan reyiki».
Notaʼik
^ Kʼela ja bʼa Yaljelik cholubʼal.
^ Jach kanel ja bʼa griego: «Ojni ya kʼajbʼuk».
^ Jach kanel ja bʼa griego: «och kʼajbʼuk».
