Apocalipsis 12:1-17
12 Anto ti ilxi ja bʼa satkʼinal jun niwan senya: tey jun ixuk sok jaxa skʼuʼi xlijpixta jastal ja kʼaʼuji, jaxa luna tey bʼa yibʼ yok sok slapunej jun korona bʼa ayiʼoj 12 kʼanal.
2 Ja yeʼn embarazada ay, sok wa x-awani yuja syajal sok yuja jel wan yijel ja wan pojkel* ja yali.
3 Sok ti ilxi pilan senya ja bʼa satkʼinali: ti sjeʼa sbʼaj jun niwan dragón bʼa jach yelaw jastal kʼakʼ sok ayiʼoj juke yolom sok lajune skacho, jaxa bʼa yolomi ayiʼoj juke korona;
4 sok skichunej soka snej ja yoxil parte ja kʼanalik bʼa satkʼinali, sok ti sjipakoʼ bʼa luʼum. Sok jaxa dragoni ti kan tekʼan bʼa stiʼ sat ja ixuk bʼa ojxta pojkuk ja yali, puestoxta ay bʼa oj skʼuxkoʼ ja yal skeremi kechan pabor xpojki.
5 Jaxa ixuki ajyiyuj jun yal skerem bʼa oj yayi mandar spetsanil ja chonabʼik sok jun takʼin bara.* Jaxa yal keremi wegoxta ijikʼe ja bʼay ja Dyosi sok ja bʼay ja strono.
6 Sok jaxa ixuki spaka ajnel man desierto, bʼa ti xchapunejyi ja Dyos jun lugar sok ti oj makʼlajuk tiw 1,260 kʼakʼu.
7 Sok kʼe jun guerra ja bʼa satkʼinali. Ja Miguel* soka yanjeliki tiroʼaniye soka dragoni. Jaxa dragón soka yanjel jumasaʼ cha tiroʼaniye,
8 pe mini bʼobʼ skʼul-e ganar,* sok mixani kʼanji tito oj ajyuke bʼa satkʼinal.
9 Ja yuj ti jipjikoʼ ja niwan dragoni, ja mero bʼitsʼbʼichani,* ja maʼ wa x-aji sbʼiʼiluk Dyablo sok Satanás, bʼa wan sloʼlajel yibʼanal ja swinkil ja luʼumi. Ja yeʼn jipjikoʼ bʼa luʼum, sok cha jipjikoʼ ja yanjeliki.
10 Sok ti kabʼ jun tsatsal kʼumal ja bʼa satkʼinali sok wan yaljel:
«¡Ja wego yiʼajtajan koltanel ja jDyostiki, chijkajita ja yipi sok kujlajita ja sGobyerno, sok stuluta ja xchol ja Kristo!* Yujni jipjitakoʼ ja maʼ wa sleʼayi smul ja kermanotik jumasaʼ, bʼa wa sleʼayi smule kʼakʼu akwal bʼa stiʼ sat ja jDyostiki.
11 Ja yeʼnleʼi skʼulane ganar stsʼakatal yuja xchikʼel ja Cheji sok stsʼakatal yuja rason xcholoweʼi, sok mi jaʼ syajtaye ja sakʼanile ama stʼaspune ja chamelali.
12 Ja yuj tak, ¡gustoʼaxan satkʼinal sok ja matik tey tiwi! Pe ¡pobre ja luʼum sok ja mari! Yujni ja Dyablo tajkel lek koʼelkoʼ ja bʼayexi, pes yujni wa snaʼa tʼusanxta tyempo wa xkanyuj».
13 Anto, yajni yila ja dragón jipjitakoʼ bʼa luʼum, yiʼaj spatik ja ixuk maʼ ajyiyuj jun yal skeremi.
14 Pe ja ixuki ajiyi chabʼ swechʼ bʼa jun niwan águila bʼa oj jujpuk man desierto, ja bʼa lugar chapubʼalyiʼi, bʼa najat oj ajyuk ja bʼa bʼitsʼbʼichani sok ti oj makʼlajuk tiw jun tyempo sok chabʼ tyempo sok nalan tyempo.*
15 Sok jaxa bʼitsʼbʼichani spekʼa och jaʼ soka stiʼi ja bʼa spatik ja ixuki, jastal jun yok jaʼ, bʼa jachuk oj sjikʼ jaʼ.
16 Pe ja luʼumi skoltay ja ixuki. Jaxa luʼumi sjama sbʼaj sok yuʼajkoʼ ja yok jaʼ, ja it spekʼa soka stiʼ ja dragoni.
17 Ja yuj ja dragoni jel tajki soka ixuki sok waj tiroʼanuksok ja janekʼ yintil wanto xkani. Ja it yeʼnleni ja matik wa skʼuʼane ja smandar ja Dyosi sok ayiʼoje ja cholal bʼa xcholjel sbʼaja Jesús.
Notaʼik
^ Ma «manxel».
^ Ma «bara bʼa yerro».
^ Wa stojolan ‹¿machun kʼotel jastal Dyos?›.
^ Ma bʼobʼta «pe ja it [wa xkʼan alxuk, ja dragoni] kʼulaji ganar».
^ Ma «ja poko bʼitsʼbʼichan jawi».
^ Ma «ja sKristo».
^ Wa xkʼan alxuk, oxe tyempo sok snalan.
