Apocalipsis 4:1-11
4 Tsaʼan ja bʼa jastik it ti kila jaman jun puerta ja bʼa satkʼinali, sok jaxa bʼajtan kʼumal wa skʼumanoni kabʼ jach jastal yokʼel jun trompeta. Yalakabʼi: «Kʼeʼankʼen ili, sok ojni jeʼawi ja jastik tʼilan oj ekʼuki».
2 Tsaʼan ja bʼa it, tixta och jbʼaj ja yip ja Dyosi.* Anto ti kila jun trono ja bʼa satkʼinali, sok ayni maʼ kulan ekʼ ja bʼa trono.
3 Jaxa Maʼ kulan ekʼi jachni ja splanta jastal ja ton jaspe sok ja sardio,* sok jaxa bʼa sjoyanal ja trono ay jun kʼintum bʼa oj slaj jastal jun esmeralda.
4 Jaxa bʼa sjoyanal ja trono ay 24 trono, sok jaxa bʼa tronoʼik it kila kulane 24 ansyanoʼik. Jaxa yeʼnleʼi sak ja skʼuʼeʼi sok lapanyujile jun korona bʼa oro ja bʼa yolomeʼi.
5 Jaxa bʼa trono wa x-el slijpelal chawuk, kʼumalik sok chawuk; sok ay juke niwak kandil wan ajlel ja bʼa stiʼ ja trono. Sok jaxa it jaʼ wa senyaʼan ja juke yip ja Dyosi.*
6 Ja bʼa stiʼ ja trono ayni jastal jun paman jaʼ bʼa oj slaj jastal ja bidrio ma jastal ja kristali.
Jaxa bʼa snalan ja bʼay ja trono sok ja bʼa sjoyanali ay chane querubín bʼutʼel satalik ja bʼa stiʼ sateʼi sok ja bʼa spatikeʼi.
7 Ja bʼajtan querubini jach jastal jun choj, ja xchabʼil querubini jach jastal jun yal toro,* ja yoxil querubini jachuk ja sniʼ sat jastal bʼa jun winik sok jaxa xchanil querubini jach jastal jun águila wan jujpel.
8 Kada jujune ja chane querubini ay wake swechʼe, bʼa bʼutʼel satalik ja bʼa yibʼeli sok ja bʼa spatiki. Sok kʼakʼu akwal wa xyalawe: «Jel sak, jel sak, jelni sak ja Jyoba* Dyosi, ja Maʼ kechan jel ja yipi, ja Maʼ tixani sakʼani sok ja maʼ sakʼan ayi sok ja maʼ ti jakumi».
9 Kada ekʼele ke ja querubinik wa xyawe niwanbʼuk, wa stoyowe sok wa xyaweyi tsʼakatal ja Maʼ kulan ekʼ ja bʼa trono, ja Maʼ sakʼan ay bʼa tolabida,
10 ja 24 ansyano wa xkoye mekʼan bʼa stiʼ sat ja Maʼ kulan ekʼ ja bʼa trono sok wa stoyowe ja Maʼ sakʼan ay bʼa tolabida. Wa xyaʼawe och ja skoronaʼe bʼa stiʼ ja trono sok wa xyalawe:
11 «Kala Dyostikon Jyoba,* ja maʼ jel jawa wipi, weʼn waxa bʼajin oj ajuk niwanbʼanan sok oj ajuka toyjelal, yujni weʼna kʼulan yibʼanal ja jastik junuki, sok yuja jach akʼana kʼot ajyuke sok kʼulaxiye».
Notaʼik
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «jun tsamal chakal ton».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «yawal toro».
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
