Apocalipsis 8:1-13
8 Yajni ja Chej sjama ja sjukil seyo, xchʼabʼabʼixta kan ja satkʼinal junuk nalan ora.
2 Sok ti kila ja juke anjel tekʼane ekʼ bʼa stiʼ sat ja Dyosi, sok jaxa yeʼnleʼi ajiyile juke trompeta.
3 Sok ti kʼot pilan anjel sok jun spachulabʼil oro bʼa stsikjel incienso,* sok ti kan tekʼan bʼa stsʼeʼel ja altar. Tixa ajiyi jitsan incienso bʼa oj skʼap ja bʼa altar bʼa oro ja it tey bʼa stiʼ ja trono sok bʼa skʼapjel lajan soka yorasyone ja matik tsaʼubʼalexa sbʼaja Dyosi.
4 Sok masan bʼa skʼabʼ ja anjeli, ja stabʼil ja incienso* kʼotkʼe bʼa stiʼ sat ja Dyosi lajan soka yorasyone ja matik tsaʼubʼalexa.
5 Pe ja anjeli wegoxta yiʼaj och ja spachulabʼil ja incienso,* sbʼutʼusok ja chakal kʼakʼ tey bʼa altari sok sjipakoʼ bʼa luʼum. Sok ajyi chawuk, kʼumalik, slijpelal chawuk sok ekʼ jun terremoto.
6 Sok jaxa juke anjeli xchapa sbʼaje bʼa sjujel ja juke trompeta.
7 Ja bʼajtani sjuʼu ja strompeta. Anto ajyi bʼat sok kʼakʼ bʼa sokan sok chikʼ, sok tixa jipjikoʼ bʼa luʼum. Sok tsik ja yoxil parte ja bʼa luʼumi; cha tsik ja yoxil parte ja bʼa teʼaltiki, sok tsik yibʼanal ja yaxal kʼuli.
8 Ja xchabʼil anjeli sjuʼu ja strompeta. Anto ti jipjikoʼ bʼa mar jun jasunuk bʼa oj slajtik jastal jun niwan wits bʼa wan ajlel. Sok jaxa yoxil parte ja bʼa mari pax chikʼ;
9 sok jaxa yoxil parte ja b’a jastik sakʼan ay ja b’a mari chʼak chamuk, sok jaxa yoxil parte ja bʼa barkoʼiki pedaso chʼak wajuk.
10 Ja yoxil anjeli sjuʼu ja strompeta. Anto ja bʼa satkʼinali mokoʼ jun niwan kʼanal bʼa wan ajlel jastal jun antorcha. Ti koʼ bʼa yoxil parte ja bʼa yok jaʼ jumasaʼ sok ja bʼa olom jaʼ jumasaʼ.
11 Ja kʼanali sbʼiʼil kʼajal kʼul. Sok jaxa yoxil parte ja bʼa jaʼi kʼajbʼi. Jelni jitsan cham ja kristyano yuj smul ja jaʼi, pes yujni kʼajbʼi.
12 Ja xchanil anjeli sjuʼu ja strompeta. Anto jomji ja yoxil parte ja kʼaʼuji, ja yoxil parte ja luna sok ja yoxil parte ja kʼanaliki. Sok jachuk ojni kʼikʼbʼuk ja yoxil parte ja bʼa yeʼnleʼi sok mini oj ajyuk ijlabʼ ja bʼa yoxil parte ja bʼa sat kʼakʼu, sok cha jachni oj ekʼ soka akwali.
13 Sok ti jkʼelaʼa, sok ti kabʼ tsatsxta wan yaljel jun águila bʼa wan jujpel bʼa snalan ja satkʼinali: «¡Ja matik tey bʼa luʼumi ojni ekʼ sbʼaje niwak wokolik ja yajni x-okʼ ja trompetaʼik ja it ojxta yawe okʼuk ja oxwane anjeli!».
Notaʼik
^ Ma «pom». Kʼela ja bʼa Yaljelik cholubʼal.
^ Ma «pom». Kʼela ja bʼa Yaljelik cholubʼal.
^ Ma «pom». Kʼela ja bʼa Yaljelik cholubʼal.
