Apocalipsis 9:1-21
9 Ja sjoʼil anjeli sjuʼu ja strompeta. Anto ti kila jun kʼanal bʼa satkʼinal mokʼelkoʼ bʼa luʼum, sok ajiyi ja syabeʼil ja sjotol ja chaʼanil kʼeʼeni.*
2 Ja kʼanali* sjama ja sjotol ja chaʼanil kʼeʼeni, sok jaxa bʼa sjotoli elkʼen tabʼ, jastal ja stabʼil jun niwan orno. Jaxa kʼaʼuj sok ja ikʼi kʼikʼbʼi-el yuja tabʼ wan elelkʼen ja bʼa sjotoli.
3 Ja bʼa yoj tabʼi elkʼen jachʼbʼenik* sok ti koʼye bʼa luʼum, sok ajiyile ipal, jastalni ja ipal yiʼoje ja tsek ja bʼa luʼumi.
4 Ajiyile mandar bʼa mok yixtaluke ja kʼul ja bʼa luʼumi, mini jun yaxal kʼul sok mini jun teʼ, kechani ja kristyanoʼik bʼa mey yiʼoje ja seyo ja Dyos ja bʼa spatane.
5 Ja jachʼbʼeniki* mi ajiyile permiso smiljel ja kristyano, kechan bʼa oj yawe yiʼ wokol joʼe ixaw. Ja wokol wa xyaʼaweʼi jach jastal ja wokol wa xyaʼa jun tsek yajni wa skʼuxu jun kristyano.
6 Ja bʼa kʼakʼujik jaw, ja kristyano oj sleʼe ja chamelali, pe mini tʼun oj staʼe; ojni skʼan-e oj chamuke, pe mini oj staʼe modo oj chamuke.
7 Ja splantaʼe ja jachʼbʼeniki* jach jastal bʼa kawujik chapane bʼa tiroʼanel. Jaxa bʼa yolomeʼi lapanyujile jun tikʼe korona bʼa oro, sok jaxa sateʼi jach jastal bʼa kristyano.
8 Jaxa stsoʼotsil yolomeʼi jach jastal bʼa ixuke sok jaxa yejeʼi jach jastal bʼa choj;
9 sok ay jas smakunej ja sniʼ yaltsile bʼa oj slaj ja chaleco takʼini.* Ja ruido wa xyaʼa ja swechʼeʼi jach jastal ja sruidoʼil wa xyaʼa ja karretaʼik jokubʼalyuj kawujik bʼa ajnelxta wajume bʼa tiroʼanel.
10 Chomajkil, ay stsʼistakʼinil ja snejeʼi, jastal ja tsek jumasaʼ; sok tini ay bʼa sneje ja ipal bʼa yixtalajel joʼe ixaw ja kristyano.
11 Ja yeʼnle ayni jun sreye: jani ja yanjelil ja chaʼanil kʼeʼeni. Ja bʼa hebreo sbʼiʼil Abadón,* sok jaxa bʼa griego sbʼiʼil Apolión.*
12 Ekʼtani ja bʼajtan wokoli. ¡Kʼelawik! Ojto jak chabʼ smoj yajni x-ekʼ ja jastik it.
13 Ja swakil anjeli sjuʼu ja strompeta. Anto ti kabʼ wan eleljan jun kʼumal ja bʼa skachoʼik ja altar bʼa oro bʼa tey bʼa stiʼ sat ja Dyosi.
14 Ti yala yabʼ ja swakil anjel yiʼoj ja trompeta: «Tuku ja chane anjel mochane bʼa stsʼeʼel ja niwan yok jaʼ Éufrates».
15 Sok jaxa chane anjelik, ja matik chapubʼale sbʼaja ora jaw, sbʼaja kʼakʼu jaw, sbʼaja ixaw jaw sok sbʼaja jabʼil jaw, tukjiye bʼa jachuk oj smil-e ja yoxil parte ja bʼa kristyanoʼiki.
16 Ja janekʼ soldadoʼik wajume sok kawuji aye 200 miyonik; ja keʼn kabʼni janekʼe.
17 Ja bʼa nakʼsat kilaʼi, ja kawujik soka matik kajaneʼi jachuke jastal it: lapanyujile chakal chaleco takʼin,* azul jastal ja yelaw ja jacinto sok kʼan jastal azufre;* ja yolom ja kawujiki jach jastal yolom choj, sok jaxa bʼa stiʼeʼi wan elel kʼakʼ, tabʼ sok azufre.
18 Ja yoxil parte ja bʼa kristyanoʼiki chamye yuja oxe plaga it: ja kʼakʼi, ja tabʼi sok ja azufre* wan elel ja bʼa stiʼ ja kawujiki.
19 Yujni ja ipal yiʼoj ja kawujiki tey bʼa stiʼe sok bʼa sneje, pes ja snejeʼi jach jastal jun bʼitsʼbʼichan sok ay yolom, sok wa xyajbʼesniye soka snejeʼi.
20 Pe jaxa tuk kristyanoʼik mi chamye yuja plagaʼik jaw, mini snaʼawe malaya ja bʼa jastik skʼulaneʼi. Mi yaʼawekan stoyjel ja pukujiki, mini ja kʼulubʼal dyosik bʼa oro, bʼa plata, bʼa kobre, bʼa ton sok bʼa teʼ ja it mi xbʼobʼ ilwanuke sok mi xyabʼye kʼinal sok mi xbʼobʼ bʼejyuke.
21 Mini snaʼawe malaya yuja milwanele, mini yuja aʼtel sok pukujik,* mini yuja koʼel mulal sok ixuk winik* sok mini yuja elkʼaneleʼi.
Notaʼik
^ Kʼela ja bʼa Yaljelik cholubʼal.
^ Ma «Ja yeʼn».
^ Ma «kʼujlubʼik».
^ Ma «kʼujlubʼiki».
^ Ma «kʼujlubʼiki».
^ Ma «bʼa yerro».
^ Wa stojolan ‹chʼakelal›.
^ Wa stojolan ‹chʼakwanum›.
^ Ma «bʼa yerro».
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal, Aʼtel sok pukuj.
^ Ja bʼa griego, pornéia. Kʼela ja bʼa Yaljelik cholubʼal.
