Efesios 5:1-33
5 Ja yujil, nochowik ja Dyos jastal yuntikilex bʼa jel syajtayex
2 sok ti la ajyiyex bʼa sbʼejlalil ja yajalkʼujoli, jastalni cha syajtayotik* ja Kristo sok yaʼa sbʼaj yuj keʼntik* jastal majtanal jel x-ajbʼani yikʼil wa x-axiyi ja Dyosi.
3 Mokni tʼun ataʼex tiʼal ja koʼel mulal sok ixuk winik,* chikan jas tikʼe bʼa jastik jel kux ma bʼa okʼel kʼujolal, jastalni sbʼej sbʼaja matik tsaʼubʼalexa sbʼaja Dyosi.
4 Cha mokni ajyuk modoʼal bʼa jel kʼixwela sbʼaj, mini ja kʼumanel bʼa mey stojoli sok mini ja osado tajnel loʼili, jastik junuk bʼa mi sbʼejuk. Mas lek, aʼawik tsʼakatal.
5 Pes yujni ja weʼnlexi waxa naʼawex lek sok waxa wabʼyex lek stojol ke mini xbʼobʼ sbʼajuk ja sGobyerno ja Kristo sok ja Dyos ja maʼ wa xkoʼ mulal sok ixuk winik,* ja maʼ wa skʼulan jastik jel kux sok ja maʼ ay jas wa x-okʼ skʼujol, bʼa kʼotelni jun modo bʼa stoyjel kʼulubʼal dyosik.*
6 Mokni maʼ sloʼlayex sok yaljelik bʼa mi meranuk, pes yuja jastik jaw wa xjak sbʼaje ja stajkelal ja Dyos ja yuntikil ja kʼoka abʼaliki.
7 Ja yuj, mok lajan ataʼ abʼajex;
8 yujni ajyi jun tyempo ja weʼnlexi jachukex jastal kʼikʼinal ajyi, pe ja wego kʼotelexa jastal ijlabʼ bʼa lajanxa ayex soka Kajwaltiki. Mokni awawexkan ajyel jastal yuntikil ijlabʼ,
9 yujni ja satinel ja ijlabʼi jani kʼotel tuktukil tikʼe lekil kʼujolal, stojolil sok smeranil.
10 Moka waʼexkan yiljel lek ja jas lek wa xyila ja Kajwaltiki
11 sok awikxakan skʼulajel ja jastik mi xmakuni bʼa jani sbʼaj ja kʼikʼinali. Mas lek, chiktesik jaman lek.
12 Pes asta stajel tiʼal ja jastik nakʼul wa skʼulaneʼi wani xyaʼa kʼixwel.
13 Pes yibʼanal ja jastik wa xchiktesji* jani wa sjeʼa ja ijlabʼi, yujni yibʼanal ja jas jeʼubʼali kʼotelni ijlabʼ.
14 Ja yuj wa x-alxi: «Kʼeʼan, ja weʼn maʼ wana wayel, sok kʼeʼan ja bʼa chamwinikeʼi, sok jaxa Kristo oj lijpukabʼaj».
15 Ja yuj talnabʼajik lek bʼa mi oj ajyanik jastal matik sonso, mas lek ajyanik jastal matik bibo,
16 yajel makunuk lek ja tyempo ja janekʼ wa xbʼobʼi,* yujni jel malo ja kʼakʼujiki.
17 Yuja jaw, naʼawikxa tʼun kʼinal sok abʼyik stojol ja jas wa skʼana ja Jyoba.*
18 Chomajkil, mok yakbʼanik sok vino, yujni wa x-ikʼwani bʼa yijel jun kistal sakʼanil;* mas lek, bʼutʼubʼajik soka yip ja Dyosi.*
19 Tsatsankʼujolanabʼajik* sok salmoʼik, tsʼebʼojik sok kʼinik bʼa stoyjel ja Dyosi; tsʼebʼantayik sok skʼijnal ja Jyoba* sok spetsanila kʼujolex,
20 yajelyi tolabida tsʼakatal ja jTatik Dyos yuj yibʼanal bʼa sbʼiʼil ja Kajwaltik Jesukristo.
21 Kada jujune ja weʼnlexi aʼabʼajik ibʼ kʼabʼalajel yuja jel xa kisawex ja Kristo.
22 Ja cheʼumaliki aʼajyuke ibʼ kʼabʼal soka statameʼi jastalni ibʼ kʼabʼal aye soka Kajwaltiki,
23 yujni ja tatamali yeʼn kʼotel olomal sbʼaja xcheʼumi, jastalni ja Kristo yeʼn olomal ja bʼa kongregasyon, koltanum ja bʼa kuerpoʼal it.
24 Pes jastalni ja kongregasyon ibʼ kʼabʼal ay soka Kristo, ja cheʼumaliki cha tʼilani oj ajyuke ibʼ kʼabʼal soka statame bʼa spetsanil.
25 Tatamalik, moka waʼexkan syajtajel jawa cheʼumex, jastalni ja Kristo cha syajtay ja kongregasyon sok yaʼa sbʼaj yuj yeʼna
26 bʼa yajel sakbʼuk yuja sakʼjel soka jaʼ bʼa yabʼal ja Dyos,
27 bʼa jachuk ja kongregasyon jel tsamal oj kʼotuk ja bʼa stiʼ sat, mey yiʼoj manchaʼik, mini swochʼelal sok mini june ja bʼa jastik jaw, sak oj kʼotuk sok mini jun spaltaʼil.
28 Cha jachni ja tatamaliki, tʼilani oj syajtaye ja xcheʼumeʼi jastalni wa syajtaye ja skuerpoʼeʼi. Ja winik bʼa wa syajtay ja xcheʼumi cha wani syajtay sbʼaj ja yeʼni,
29 yujni mi maʼ yilkʼujolanunej ja skuerpo,* pes wani smakʼlay sok yajxta wa stalnay, jastalni wa skʼulan ja Kristo soka kongregasyon,
30 yujni kʼotelotik parteʼik ja bʼa skuerpo.
31 «Ja yuj ja winiki ojni yakan ja stat soka snani, sok jaxa oj ajyuk* soka xcheʼumi sok june ita oj kʼotuke xchawanile».
32 Ja jasunuk it bʼa jel chaʼanyabʼal wa xjak bʼa Dyosi* jelni niwan. Ja wego jaʼ xa wanon yaljel sbʼaja Kristo soka kongregasyoni.
33 Pe kada jujune ja weʼnlexi, tʼilani oj syajtay ja xcheʼumi jastalni wa syajtay sbʼaj ja yeʼni. Sok jaxa cheʼumali, tʼilani oj skis lek ja statami.
Notaʼik
^ Ma bʼobʼta «syajtayex».
^ Ma bʼobʼta «weʼnlex».
^ Ja bʼa griego, pornéia. Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal, Koʼel mulal sok ixuk winik.
^ Ma «jastik junuk».
^ Ma «ja jastik wa x-alji mi lekuki».
^ Jach kanel ja bʼa griego: «smanjel ja tyempo tsaʼubʼali».
^ Kʼela ja bʼa Yaljelik cholubʼal.
^ Ma «mi skomo sbʼaj».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma bʼobʼta «weʼnlex mismo».
^ Kʼela ja bʼa Yaljelik cholubʼal.
^ Jach kanel ja bʼa griego: «ja sbʼakʼtel».
^ Kʼela ja nota bʼa Mateo 19:5.
^ Kʼela ja bʼa Yaljelik cholubʼal, Ja jas jel chaʼanyabʼal wa xjak bʼa Dyosi.
