Efesios 6:1-24
6 Untik jumasaʼ, kʼuʼabʼal ajyanik soka wa nantatexi jastalni wa skʼana ja Kajwaltiki, yujni stojolil ja it.
2 «Kisa jawa tat sok jawa nani». Jani jaw ja bʼajtan mandari ja it aji sok jun skʼapjelal:
3 «Bʼa oj wajukawuj lek sok oj ajyan jitsan tyempo ja bʼa luʼumi».
4 Tatalik, mok loma wawex kʼe skoraja jawa wuntikilexi, mas lek awik kʼiʼuke soka tojelal sok ja rasonik wa xyaʼa ja Jyoba.*
5 Moso jumasaʼ, kʼuʼabʼal ajyanik sok spetsanila kʼujolex soka matika wajwalex ja bʼa luʼumi, kisawik lek sok xiwanikyujile, bʼa lajansok jaʼ kʼuʼabʼal ayex soka Kristo.
6 Moka kʼulukex yajni kechan wanex iljeli, bʼa lek oj yilex ja winikeʼi, mas lek kʼulanik jastal smosoʼik ja Kristo bʼa wa skʼulane sok spetsanil skʼujole sok yipe ja jas wa skʼana ja Dyosi.
7 Kʼotanik mosoʼik pe sok juna lekila modoʼex bʼa puesto ajyel, bʼa lajansok ja wanex yaʼteltajel ja Jyoba* sok mi jaʼuk ja winikeʼi,
8 yujni ja weʼnlexi waxa naʼawex ke kada jujune oj ajuk kumxukyi yuja Jyoba* chikan jas lek skʼulan, ama jun moso ma jun winik libre.
9 Jaxa weʼnlex ajwalal jumasaʼ, tolabida ilawik lek ja yeʼnleʼi, moka wawex xiwuk, pes wani xa naʼawex tanto yeʼnle sok weʼnlex junxta wa Wajwalex ja bʼa satkʼinali, jaxa yeʼni mini june maʼ menos wa xyila.
10 Sok tsaʼanxta, moka waʼexkan stsatsankʼujolajel abʼajex bʼa Kajwaltik sok ja bʼa tsatsal yipi.
11 Lapawik yibʼanal ja yamkʼabʼalik wa xyaʼa ja Dyosi, bʼa oj bʼobʼ ajyanik yij soka strampaʼik jel xloʼlani ja Dyablo;
12 yujni mi wanukotik tiroʼanel sok kristyanoʼik,* jani soka gobyernoʼiki, soka matik ay xchole, soka gobyernoʼik bʼa luʼumkʼinal it bʼa kʼikʼinal ayi, soka pukujik teye bʼa lugarik bʼa satkʼinali.
13 Ja yujil, lapawik yibʼanal ja yamkʼabʼalik wa xyaʼa ja Dyosi, bʼa jachuk yajni x-eljul ja skʼakʼujil malo, ojni bʼobʼ kuchukawujilex, sok yajni akʼulanexta yibʼanal ja jas tʼilani, yij oj ajyanik.
14 Ja yujil, ajyanik yij ajyelawujilex lapan ja sincho bʼa smeranili, ajyelawujilex lapan ja chaleco takʼin bʼa stojolili
15 sok ajyelawujilex lapan ja xanabʼali sok ajyanik chapan bʼa xcholjel ja lekil rasonik bʼa lamanili.
16 Mi kechanuk ja jastik jaw, cha yamawik ja niwan escudo bʼa skʼuʼajeli, soka escudo jaw oj bʼobʼa tupex yibʼanal ja plechaʼik tsananyuj ja Maʼ jel malo.
17 Cha aʼajyukawujilex lapan ja casco bʼa koltanel sok yaman aʼajyukawujilex ja espada bʼa ipal,* wa xkʼan alxuk, ja yabʼal ja Dyosi.
18 Chomajkil, moka wawexkan yajelyi orasyon bʼa spetsanil ekʼele soka yip ja Dyosi,* yajel makunuk tuktukil tikʼe orasyon sok tuktukil tikʼe spatjel kʼujolal. Yuja jaw, kʼelan jakan ajyanik sok tikʼanxta patawik kʼujolal yuj yibʼanal ja matik tsaʼubʼalexa sbʼaja Dyosi.
19 Cha awikyi orasyon yuj keʼna, bʼa jachuk yajni xjama ja jtiʼi, oj ajuki ja yaljelik bʼa mi oj xiwkon yaljel ja jas jel chaʼanyabʼal wa xjak bʼa Dyosi* sbʼaja lekil rasoniki,
20 kʼotelon jun akʼa rason sbʼaja jaw bʼa mochubʼalon sok kadena, sok bʼa jachuk mini tʼun oj xiwkon yaljel sbʼaja jaw, jastalni sbʼej oj kale.
21 Ja Tíquico yeʼn oj yalawabʼyex yibʼanal, bʼa jachuk ja weʼnlex oj cha naʼex jastal ayon sok jastal wan wajelkuj, ja yeʼn jun hermano jel xyajtaytik sok jun tojil yaʼtijum ja Kajwaltiki.
22 Wa xjekawilex yuja it: bʼa oja naʼex jastal aytikon sok bʼa oj ya kulana kʼujolex.
23 Ja kermanotik jumasaʼ aʼajyukyujile lamanil sok yajalkʼujol bʼa ayiʼoj skʼuʼajel jakel bʼa jTatik Dyos sok bʼa Kajwaltik Jesukristo.
24 Aʼajyuksoke ja lekil kʼujolal mi xbʼajintik yibʼanal ja matik wa syajtaye ja Kajwaltik Jesukristo sok jun yajalkʼujolal bʼa mi xchʼaki.
Notaʼik
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Jach kanel ja bʼa griego: «chikʼ sok bʼakʼet».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Kʼela ja bʼa Yaljelik cholubʼal.
