Filipenses 1:1-30
1 Bʼa sparte ja Pablo sok ja Timoteo, ja smosoʼik ja Kristo Jesús, bʼa spetsanil ja matik tsaʼubʼalexa sbʼaja Dyosi bʼa lajan aye soka Kristo Jesús teye bʼa Filipos, cha jachni ja talnanumik sok ja siervo ministerialiki:*
2 Ja jTatik Dyos sok ja Kajwaltik Jesukristo ayawilex ja lekil skʼujole mi xbʼajintik sok ja slamanile.
3 Tolabida wa xkayi tsʼakatal ja jDyos ja yajni wa xjul jkʼujol bʼa weʼnlex,
4 ja bʼa kada ekʼele wa xpatayi skʼujol yuj weʼnlex. Gustoxtani wa xpatayi skʼujol,
5 pes jani yuja jastika kʼulunejex yuja lekil rasonik* man sbʼajtanil kʼakʼu sok man wego.
6 Pes wani xkʼuʼan lek ja it: ja maʼ kʼe stul jun lekil aʼtel bʼa weʼnlex ojni snochyi man oj xchʼak bʼa skʼakʼujil ja Kristo Jesús.
7 Sbʼejni lek ja jach wa xpensaraʼan bʼa awibʼanalex, pes tini ayex bʼa jkʼujol. Yujni awibʼanalex ja weʼnlexi jmoj jbʼajtikik ja bʼa lekil kʼujolal mi xbʼajintiki, ja bʼa jastal mochanon kadena bʼa preso sok bʼa skoltajel sok yajel kujlajuk ja lekil rason bʼa stiʼ sat ja matik ay xcholi.
8 Ja Dyosi wani snaʼa ke jelni xnaʼawex sok jelni yaj wa xkabʼyex jastalni yaj wa xyabʼyex ja Kristo Jesús.
9 Sok jani it ja jas mi xkaʼakan skʼanjel ja bʼa korasyoni: ke ja syajala kʼujolexi akʼiʼuk mas sok meran snajelil sok yabʼjel stojol tsʼikan lek ja stukili,
10 ke oja naʼex lek jastik junuk ja mas tʼilani bʼa jachuk mi oj ajyuka paltaʼilex sok mi oja wawex slok yok ja tuk man bʼa skʼakʼujil ja Kristo
11 sok ja weʼnlexi oja kʼulukex mas jastik bʼa toj* soka skoltanel ja Jesukristo, bʼa jachuk oj toyxuk sok oj ajuk niwanbʼuk ja Dyosi.
12 Kermano jumasaʼ, wa xkʼana oja naʼex ke yuja jastal wala taxyoni, ja smeranili koltanel bʼa oj pukxuk ja lekil rasonik,
13 yujni spetsanil ja stalnanum ja emperador sok yibʼanal ja tuki wa snaʼawe ke yuja Kristo mochanon soka kadena it.
14 Sok ja wego tʼusan mi spetsaniluk ja kermanotik bʼa Kajwaltiki stsatsankʼujolanunej sbʼaje stsʼakatal yuja mochanon kadena sok masto wane yaljel ja yabʼal ja Dyos sok mini tʼun xiwel.
15 Merani’a, ay jujuntik wane xcholjel sbʼaja Kristo yuj imbidia sok bʼa yajel preba, pe jaxa tuki wa skʼulane sok lekil skʼujole.
16 Ja yeʼnleʼi wane stajel tiʼal sbʼaja Kristo yuj yajalkʼujol, yujni wa snaʼawe ke tsajiyon bʼa skoltajel ja lekil rasoniki;
17 pe jaxa tuki kechan wa skʼulane bʼa oj yawe kʼe kʼumalik, sok mi yuj lekil skʼujole, pes wane slejel modo yajelki wokol ja yajni mochanon soka kadena it.
18 ¿Sok jastal elel kʼote? Pes chikani jastal, ama sok chabʼ karaʼil ma sok spetsanil skʼujole, jani wan taxel tiʼal sbʼaja Kristo, ja jaw wani xya gustoʼaxukon. Chomajkil, ojtoni gustoʼaxukon mas
19 pes wa xnaʼa ja jastal oj elkʼoti jani bʼa jkoltajel yuja waxa patawex kʼujolali sok ja skoltanel ja ipal* akʼubʼalyi ja Jesukristo.
20 Ja it akuerdoni ay soka jas jel xkʼana sok ja smajlajel kiʼoj bʼa mini tʼun jas oj kʼixwukonyuj. Wani xkʼuʼan lek ke mini oj kakan yaljel jaman lek sok jachuk oj jtoy ja Kristo soka jkuerpo, jastalni tolabida jkʼulunej, ama sakʼan ayon ma la chamyon.
21 Pes bʼa keʼna, ta sakʼan ayon sbʼajni Kristo sok ta chamyon sbʼajni jlekilal.
22 Pe ta tito oj ajyukon sakʼan ja bʼa kuerpoʼal* it, ojni satinuk ja kaʼteli. Pe mini wanukon yaljel ja jas oj jtsaʼi.
23 Wanike xkʼana xchabʼil ja jastik it, pes wa xkʼana oj elkon libre sok ajyel soka Kristo, ja it sen mastoni lek.
24 Pe bʼa wa lekilal weʼnlex, mastoni tʼilan ja tito oj ajyukon sakʼan ja bʼa kuerpoʼal it.
25 Ja yujil, yuja wa xkʼuʼan lek sbʼaja jaw, wani xnaʼa ojto ajyukon sakʼan sok oj ajyukona mokex bʼa jachuk oj kʼiʼanik sok gusto oj ajyanik ja bʼa skʼuʼajeli,
26 sok jachuk oja wabʼyex jitsan gustoʼil bʼa Kristo Jesús yuj keʼna ja yajni cha tixa ayona mokex yajkʼachil ekʼele.
27 Kechan ajyanik bʼa jun modo toj sbʼaja lekil rasonik bʼa Kristo, bʼa jachuk, ama xwaj kilex ma mi teyukona mokex, oj kabʼ yabʼalil bʼa weʼnlex sok oj jnaʼ tojni ayex sok junta pensar ayex,* junxta ja jas waxa kʼanawexi, bʼa wanexni tiroʼanel lajan yuja skʼuʼajel sbʼaja lekil rasoniki
28 sok mini tʼun la xiwyexyuj jawa kontraʼexi. Sok ja it wani sjeʼa ke ja yeʼnleʼi oj chʼayjuk snajele pe ja weʼnlexi oja taʼa koltajelex, sok ja it tini jakel bʼa Dyos.
29 Pes yujni ja weʼnlexi mi kechan ajiwilex ja cholal yuj spabor ja Kristo bʼa oj ajyukawujilex skʼuʼajel bʼa yeʼna, cha ajini awilex ja cholal bʼa oja wiʼex wokol yuj yeʼna.
30 Ja yuj wanex stʼaspujel ja junxta lucha awilawex kiʼaj ja keʼni, sok jastalni waxa naʼawex ja wego, wanonto stʼaspujel.
Notaʼik
^ Ma «ja koltanumik bʼa kongregasyoni».
^ Ma «yuja wa koltanelex ja bʼa spukjel ja lekil rasonik».
^ Jach kanel ja bʼa griego: «satinel toj».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Jach kanel ja bʼa griego: «ja bʼa bʼakʼtelal».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
