Filipenses 4:1-23
4 Ja yuj kermano jumasaʼ, ja matik jel xyajtayi sok wanxa xkʼana oj kil-e, ja matik kʼotele jgustoʼil sok kʼotele jastal jkorona, ajyanik toj soka Kajwaltik kala kermano jumasaʼ, jastalni kalunejxa awabʼyex.
2 Wa xpatayi skʼujole ja Evodia sok ja Síntique bʼa aʼajyukyujile ja junxta pensar ja yajni wane yaʼteltajel ja Kajwaltiki.
3 Sok jaxa weʼn, bʼa kʼotela jun meran koltanum,* cha wani xkʼanawi bʼa moka wakan skoltajel ja ixuke it bʼa jel skʼujolanuneje koltanel jmok sbʼaja lekil rasoniki sok ja Clemente sok cha jachni ja tuk jkoltanumik aʼteli, ja matik tsʼijbʼunubʼal ja sbʼiʼile ja bʼa libro bʼa sakʼanili.
4 Tolabida gustoʼaxanik yuja Kajwaltiki. Wa xkalawabʼyex jun ekʼele smoj: ¡gustoʼaxanik!
5 A-snaʼe yibʼanale ke ja weʼnlexi kʼotelex kristyanoʼik bʼa wala ochyex rason. Mojan ay ja Kajwaltiki.
6 Mok jas chamuka kʼujolex. Mas lek, bʼa chikan jastal wala taxyex, sok orasyonik sok spatjel kʼujolal sok yajel tsʼakatal, awik snaʼ ja Dyos ja jastik waxa kʼanawexi,
7 sok jaxa slamanil ja Dyos, bʼa masto ekʼxel lek yuja janekʼ wa xbʼobʼ yabʼ stojol jun kristyano, oj stalnay jawa kʼujolexi sok jawa pensarex yuja Kristo Jesús.
8 Sok tsaʼanxta kermano jumasaʼ, tikʼanxta pensaraʼanik yibʼanal ja jastik merani, yibʼanal ja jastik jel tʼilani, yibʼanal ja jastik toji, yibʼanal ja jastik saki,* yibʼanal ja jastik wa xnikwani bʼa yajtaneli, yibʼanal ja jastik lek wa xnaʼxi sbʼaji, yibʼanal ja jastik leki sok yibʼanal ja jastik sbʼej oj toyxuki.
9 Kʼulanik ja jasa nebʼawex yuj keʼn sok ajyiwujilex yuj keʼn, cha jachni ja jastik awabʼyex kala sok awilawex jkʼulani, sok jaxa Dyos bʼa lamanil ti oj ajyuka mokexa.
10 Jelni wala gustoʼaxiyon stsʼakatal ja Kajwaltik yuja yajkʼachil ekʼele wan chamela kʼujolex jmoki. Ama wani chamela kʼujolex jmok ajyi, mini ataʼunejex modo bʼa sjejel ajyi.
11 Mi wa xkala ja it yuj wan ekʼel jbʼaj nesesida, pes jnebʼunej ajyel gusto chikan jastal wala taxyon.
12 Jnebʼunej ajyelsok tʼusan sok jnebʼunej ajyelsok jitsan. Bʼa yibʼanal sok bʼa chikan jastal wala taxyon jnebʼunej ja jas kechanta jujuntik wa snaʼawe: ja ajyel bʼutʼeli sok ja stekʼjel waʼin, ja ajyelkuj jitsan sok ja mi jas ajyelkuji.
13 Ayni kip sbʼa yibʼanal stsʼakatal ja maʼ wa xyaki ja kipi.
14 Pe ja weʼnlexi jel leka kʼulanex yuja akoltayonex ja bʼa ekʼeleʼik mas wokoli.
15 Ja weʼnlex filipenseʼik, cha wani xa naʼawex, yajni awabʼyex sbʼajtanil ekʼele ja lekil rasoniki sok elyon ja bʼa Macedonia, mini jun kongregasyon skoltayon sok skʼulan resibir ja koltanel kaʼa, kechani weʼnlex;
16 pes yajni teyon bʼa Tesalónica ja weʼnlexi ajekawex jastik junuk wa xmakunikuj, mini kechanuk jun ekʼele, chabʼni ekʼele.
17 Mi yuj wanukon slejel majtanalik, pes wani xkʼana ke ja lekila waʼtelexi aya jitsanbʼuk ja jasa nolunejexi.
18 Pes ayni kiʼoj yibʼanal ja jas wa skʼulankuj palta sok masto jitsan. Ayni kiʼoj yibʼanal ja jas wa xmakunikuji, yujni ja Epafrodito yaki ja jasa jekawexkiʼi: jun majtanal bʼa jel x-ajbʼani yikʼil, bʼa gustoxta wa xyiʼaj ja Dyosi.
19 Jaxa jDyosi, yeʼn oj yawilex yibʼanal ja jastik oj makunuka wujilexi pe jani soka jitsan srikesa yuja Kristo Jesús.
20 Atoyxuk bʼa tolabida ja jTatiki sok ja jDyostiki. Amén.
21 Tixa wawexkiyi skoltanel yibʼanale ja matik tsaʼubʼalexa sbʼaja Dyosi bʼa lajan aye soka Kristo Jesús. Ja hermanoʼik teye jmoki wa sjeka akoltanelex.
22 Yibʼanale ja matik tsaʼubʼalexa sbʼaja Dyosi, pe mastoni ja matik teye bʼa snaj ja César, wa sjeka akoltanelex.
23 Aʼajyuka mokex ja lekil skʼujol mi xbʼajintik ja Kajwaltik Jesukristo yuja jel puesto* wala ajyiyexi.
Notaʼik
^ Jach kanel ja bʼa griego: «meran jmoj bʼa yuko».
^ Ma «asyado».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
