Hebreos 1:1-14
1 Ayxa jitsan tyempo, ja Dyos skʼuman ja matik ekʼpaxtakujtik bʼa jitsan ekʼele sok bʼa tuktukil modo yuja alumaniki.
2 Ja wego, ja bʼa xchʼakulabʼil ja kʼakʼujik it, skʼumunejotik yuj jun Uninal, ja maʼ yayi sdote yibʼanal ja jastik junuki sok ja maʼ ya makunuk bʼa skʼulajel ja jastal wa xtax ja tyempoʼiki.*
3 Sok yeʼnani ja xojobʼil ja slijpelal ja Dyosi sok wani xchiktes ja jastalni mero kʼotel ja yeʼn, sok yeʼn yipunej yibʼanal ja jastik junuk soka yabʼal jel yipi. Sok yajni yata sakbʼukotik ja bʼa jmultiki, tixa kulani ja bʼa stojol skʼabʼ ja Niwan Dyos bʼa satkʼinali.
4 Ja yuj ja yeʼni masto ekʼxel yuja anjeliki, yujni akʼubʼalyi jun bʼiʼilal bʼa masto jel chaʼanyabʼal yuja sbʼajeʼi.
5 Jun sjejel, ¿maʼ anjeliluk aljiyabʼ jun ekʼele yuja Dyosi: «Weʼnani ja jkeremi; jaxa wego ja keʼn kʼotelon wa tat»? Ma ¿chomajkil: «Keʼn oj kʼotkon stat sok jaxa yeʼn oj kʼot kunin»?
6 Sok yajni oj sjek yajkʼachil ekʼele ja bʼajtan Yunin ja bʼa luʼumkʼinali, wa xyala: «Sok yibʼanal ja yanjelik ja Dyos oj koʼuke sbʼaj tinan».
7 Chomajkil, ja yeʼn wa xyala sbʼaja anjeliki: «Ja yanjeliki, wa xya pax ikʼ asonil,* sok jaxa yaʼtijumiki, wa xya pax yajlubʼil kʼakʼ».
8 Pe sbʼaja Uninali wa xyala: «Ja Dyosi yeʼn kʼotel wa trono bʼa tolabida, sok jaxa sbaraʼil* jawa Gobyerno jani ja sbaraʼil ja bʼa jas toji.*
9 Ayajtay ja bʼa toji sok awilkʼujolan ja bʼa jas malo. Ja yuj ja Dyosi, jawa Dyosi, yeʼn stsaʼawa soka aseyteʼi sok masto ya gustoʼaxan ke yuja wa mojiki».
10 Cha wa xyala: «Ja bʼa skʼeʼulabʼili, kala Kajwal, weʼn wa ochuk ja simientoʼil ja luʼumi, jaxa satkʼinali jani ja skʼulbʼen jawa kʼabʼi.
11 Ja yeʼnleʼi ojni chʼayuke, pe ja weʼn ojni ajyan sakʼan; ja yeʼnleʼi ojni chʼakuke jastal jun kʼuʼal
12 sok jaxa weʼn oja bʼal-e jastal jun pal kʼuʼal, jastalni jun kʼuʼal, sok oj tukbʼuke. Pe ja weʼn mi la tukbʼi, sok mini ay stikʼanil jawa jabʼiliki».
13 Pe ¿maʼ anjeliluk aljiyabʼ jun ekʼele yuja Dyosi: «Kulanan bʼa stojolil jkʼabʼ masan xkaʼa jastal sbankoʼil wa wok jawa kontraʼiki»?
14 ¿Mi maʼ kʼotele ikʼ ason* yibʼanal ja yeʼnleʼi bʼa wa xyaʼteltaye ja Dyosi, bʼa jekubʼale bʼa oj skoltaye ja matik oj sbʼajuke ja koltaneli?
Notaʼik
^ Kʼela ja bʼa Yaljelik cholubʼal, Ja jastal wa xtax ja tyempo.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Jun bara bʼa wa stojolan ja xchol yiʼoj jun rey.
^ Ma «ja bʼa stojolili».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
