Hebreos 13:1-25
13 Moka waʼexkan syajtajela bʼajex jastal wa syajta sbʼaj jun pamilya.
2 Mokni chʼayuka kʼujolex bʼa oj ajyuk jamana kʼujolex,* pes stsʼakatal yuja it jujuntik yawe jijluk anjelik ama mi snaʼawe.
3 Ajuluka kʼujolex ja matik teye bʼa preso,* bʼa lajansok ti lutanex soka yeʼnleʼi, sok ja matik ixta wa x-iljiye, pes ja weʼnlexi junxta kuerpo ayex soka yeʼnleʼi.*
4 Ilawik chaʼanyabʼala petsanilex ja nupaneli sok mok maʼ ya kuxbʼuk ja nupaneli, yujni ja Dyosi oj skʼul jusgar ja matik wa xkoʼ mulal sok ixuk winik* sok ja matik wa xchʼaykʼujolan ja nupaneli.
5 Ja bʼa jastal waxa wiʼajex jawa sakʼanilexi aʼajyuk libre sbʼaja syajtajel ja takʼini, sok gusto ajyanik soka jastika wiʼojexi. Yujni ja yeʼn yalunej: «Nunka oj kaʼakani sok mini nunka oj jipakani».
6 Ja yuj wani xbʼobʼ kaltik sok spetsanil jkʼujoltik: «Ja Jyoba* yeʼnani ja jkoltanumi. Mini oj xiwkon. ¿Jasa oj bʼobʼ skʼulki ja winiki?».
7 Ajuluka kʼujolex ja matik wa stojowexi, ja matik yaluneja wabʼyex ja yabʼal ja Dyosi, sok yiljel ja slekilal wa xyijan ja smodoʼeʼi, nochowik ja skʼuʼajel yiʼojeʼi.
8 Ja Jesukristo mini xtukbʼi: yeʼn mismo ja eke sok ja yani, sok bʼa tolabida.
9 Moka waʼexkan b’a oj spilex yuja tuktukil sjejel sok mi xnaxi sbʼaji, yujni mas lek yajel yijbʼuk ja kʼujolal soka lekil kʼujolal mi xbʼajixi ke sok waʼelal,* bʼa mi xyilawe slekilal ja matik jaʼ wa xwaj skʼujoleʼi.
10 Ayni kiʼojtik jun altar bʼa mey yiʼoje derecho oj yabʼye ja jas ay ja tiw ja matik wane yaʼteltajel ja Dyos ja bʼa naʼits bʼa karpa.
11 Yujni ja skuerpo ja chanteʼik bʼa wa x-iji och ja xchikʼele ja bʼa lugar sak yuja mero olomal sacerdote jastal majtanal sbʼaja mulali, mini tiʼuk wa stsikji bʼa yojol ja bʼa wane jijleli, tini man bʼa juera.
12 Ja yujil, ja Jesús mini cha ti yiʼaj wokol bʼa yoj chonabʼ bʼa yajel sakbʼuk soka xchikʼel ja chonabʼi, tini bʼa juera.
13 Ja yuj mok kankotik bʼa yojol jijlel, la waj jtatik ja bʼa juera sok la jtekʼtik ja kʼixwel stekʼa ja yeʼn,
14 yujni ja il mey kiʼojtik jun chonabʼ bʼa tolabida, pes jani kongana wanotik slejel ja it jakumto.
15 Yuja yeʼn la jkʼaptikyi tolabida ja Dyos jun majtanal bʼa toyjelal, wa xkʼan alxuk, ja jastik wa x-el ja bʼa jtiʼtiki bʼa wa xcholo jaman lek ja sbʼiʼili.
16 Chomajkil, mok chʼayuka kʼujolex skʼulajel ja bʼa leki sok skʼepjelyi ja tuk ja jasa wiʼojexi, yujni ja majtanalik it jelni lek xyila ja Dyosi.
17 Ajyanik kʼuʼabʼal sok ibʼ kʼabʼal soka matik wa stojowexi, yujni ja yeʼnleʼi wani stalnayex* sok ojni kʼanjukyile kuenta yuja jaw. Jachuk ja yeʼnleʼi gustoxta oj skʼuluke sok mi mala ganaʼuk, yujni ja it oj sjomex ja weʼnlexi.
18 Moka waʼexkan yajelyi orasyon yuj keʼntikon, yujni wa xkʼuʼantikon lek bʼa ay kiʼojtikon jun lekil conciencia,* pes wani xkʼana oj jetikon toj ja jmodotikon bʼa yibʼanal.
19 Pe mastoni wa xkʼana oja kʼulukex ja it: awikyi orasyon bʼa jachuk oj kumxukon mas pronto ja bʼayexi.
20 Ke ja Dyos bʼa lamanil, ja ma’ kʼapjiyi ja chikʼelal bʼa jun trato bʼa tolabida sok ja ma’ ya kʼeʼuk ja bʼa chamwinik ja niwan talnachej, ja Kajwaltik Jesús,
21 ayawilex spetsanil ja jas wa xmakuni awujilex bʼa skʼulajel ja jas wa skʼana sok a-skʼulkitik ja jas lek wa xyila ja yeʼn yuja Jesukristo. Aʼaxukyi stoyjel bʼa tolabida. Amén.
22 Ja wego kermano jumasaʼ, wa xpata akʼujolex bʼa maklayik lek ja yaljelik it bʼa tsatsankʼujolanel, yujni jtsʼijbʼunejawilex jun chʼin karta.
23 Wani xkʼana oja naʼex ke ajita el libre ja kermanotik Timoteo. Ta jakxa mas pronto, lajanxa oj waj kilextikon.
24 Awikyi skoltanel yibʼanal ja matik wa stojowexi sok ja matik tsaʼubʼalexa sbʼaja Dyosi. Wa sjeka akoltanelex ja hermanoʼik bʼa Italia.
25 Aʼajyuka mokex awibʼanalex ja lekil kʼujolal mi xbʼajintiki.
Notaʼik
^ Ma «bʼa sjejelyi lekil kʼujolal ja matik mi xnaxi sbʼaji».
^ Jach kanel ja bʼa griego: «ay skadenaʼile».
^ Ma bʼobʼta «pes lajansok ja weʼnlexi lajan wanex yijel wokol soka yeʼnleʼi».
^ Kʼela ja bʼa Yaljelik cholubʼal, Koʼel mulal sok ixuk winik.
^ Kʼela ja bʼa Yaljelik cholubʼal.
^ Wa xkʼan alxuk, reglaʼik sbʼaja waʼelalik.
^ Ma «mini xyaʼawekan stalnajelex».
^ Ma «jun conciencia bʼa toj».
