Hebreos 3:1-19
3 Ja yujil, hermanoʼik bʼa tsaʼubʼalexa sbʼaja Dyosi sok payubʼalex* bʼa oj wajanik bʼa satkʼinal, pensaraʼanik sbʼaja maʼ wa xnaʼatik sbʼaj* jastal jekabʼanum sok mero olomal sacerdote: ja Jesús.
2 Ja yeʼn* ajyisok toj ja Maʼ tʼojiyuji, jastalni cha ajyi ja Moisés bʼa yibʼanal ja snaj ja Dyosi.
3 Yujni ja yeʼn wa sbʼajin mas oj toyjuk ke yuja Moisés, pes ja maʼ wa xya kʼeʼuk jun naʼits mastoni wa xtoyji ke yuja naʼitsi.
4 Ja smeranili, kada naʼits ayni maʼ yaʼunej kʼeʼuk, pe ja maʼ skʼulunej yibʼanal ja jastik junuki yeʼnani ja Dyosi.
5 Jaxa Moisés ajyini toj jastal jun aʼtijum bʼa yibʼanal ja snaj ja Dyosi sok ja it makuni bʼa oj xchiktes ja* jas oj alxuk tsaʼani,
6 pe ja Kristo ajyini toj jastal jun uninal bʼa yeʼn kajan sbʼaj ja snaj ja Dyosi. Sok keʼntikni kʼotelotik ja snaj ta mi xkaʼatikan man xchʼakulabʼil ja libreʼil kiʼojtik bʼa kʼumanel sok sbʼaja smajlajel wa xtoyo jbʼajtiki.
7 Ja yujil, jachni jastal wa xyala ja yip ja Dyosi:* «Ta ja yan waxa maklayex ja jkʼumali,
8 mok cha chʼuʼuybʼuk jawa kʼujolex jastalni akʼulanex yajni awawex kʼe jkoraja ja bʼa skʼakʼujil wawex ochkon probar ja bʼa desierto,
9 ja bʼa yawe ochkon probar ja matik ekʼpaxtawujilexi ama yilawe ja jastik jkʼulan snajtil ja 40 jabʼili.
10 Ja yuj kijnay ja lame kristyano jaw sok kala: ‹Tolabida wa spila sbʼaj jmok jawa kʼujolexi sok mito xkʼota naʼex sbʼaj ja jbʼeji›.
11 Ja yuj el jtiʼ ja yajni tajkeloni: ‹Mini oj ochanik ja bʼa jijleli›».
12 Kermano jumasaʼ, aʼa kuidadoʼex, bʼaxama lek june ja bʼa weʼnlexi xkʼe ajyukyuj jun skʼujol bʼa malo sok mey yiʼoj skʼuʼajel yuja wa sjitsa sbʼaj soka sakʼan Dyosi.
13 Mas lek, moka waʼexkan stsatsankʼujolajel abʼajex kada kʼakʼu, malan wan ekʼel ja kʼakʼu jaw sbʼiʼil «yan», bʼa jachuk ja yip jel xloʼlani ja mulali mi oj ya chʼuʼuybʼananik mini june bʼa weʼnlex.
14 Yujni ja keʼntiki oj ajukitik meran lek ja jas ajiyi ja Kristo kechani ta mi xkaʼatikan man xchʼakulabʼil ja sjipjel jkʼujoltik ajyelkujtik man skʼeʼulabʼili.
15 Jachni jastal wa x-alxi: «Ta ja yan waxa maklayex ja jkʼumali, mok cha chʼuʼuybʼuk jawa kʼujolex jastalni akʼulanex yajni awawex kʼe jkoraja».
16 Yujni ¿machtik junuk ja smaklaye pe yawe kʼe skoraja? ¿Mi maʼ yeʼnuke yibʼanal ja matik elye bʼa Egipto bʼa tojubʼale yuja Moisés?
17 Chomajkil, ¿machtik yijnay ja Dyos snajtil ja 40 jabʼili? ¿Mi maʼ yeʼnuke ja matik sleʼa smule, ja matik chamyekan ja bʼa desierto?
18 ¿Sok machtik yala yabʼ mi oj ochuke ja bʼa sjijleli? ¿Mi maʼ yeʼnuke ja matik skʼokowe abʼali?
19 Ja yujil, wani xkilatik mini bʼobʼ ochuke yuja ayto skʼanayujile skʼuʼajeli.
Notaʼik
^ Ma «lokubʼalex».
^ Ma «wa xkalatik».
^ Wa xkʼan alxuk, ja Jesús.
^ Ma «oj makunuk jastal testigo sbʼaja».
^ Ma «espíritu santo». Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
