Hebreos 4:1-16
4 Ja yuj tak, yuja mito xchʼay ja skʼapjelal bʼa ochel ja bʼa sjijlel ja yeʼn, la kaʼ jkuidadotik,* bʼaxama lek june ja bʼa weʼnlexi oj iljuk mi sbʼajin ja jawi.
2 Yujni ja keʼntiki cha cholji kabʼtik ja lekil rasoniki, jastalni yeʼnle; pe ja yeʼnleʼi mi yilawe slekilal sbʼaja rason yabʼyeʼi, yujni mi ajyiyujile ja junxta skʼuʼajel soka matik skisawe ja rasoni.
3 Pe ja matik jeʼunejtik skʼuʼajeli wani la ochtik ja bʼa sjijlel ja maʼ yaluneji «Ja yuj el jtiʼ ja yajni tajkeloni: ‹Mini oj ochanik ja bʼa jijleli›», ama chʼaktani ja yaʼtel man kujlaji ja luʼumkʼinali.
4 Pes jun parte ja bʼa Yabʼali ja yeʼn yala sbʼaja sjukil kʼakʼu: «Jaxa Dyosi tixa jijli ja bʼa sjukil kʼakʼu bʼa spetsanil ja yaʼteli».
5 Sok cha wa xyala: «Mini oj ochanik ja bʼa jijleli».
6 Ja yujil, yuja ayto skʼana oj ochuke jujuntik, sok ja matik bʼajtan cholji yabʼye ja lekil rasoniki mini ochye yuja skʼokowe abʼali,
7 ja yeʼn cha ya kujlajuk jun kʼakʼu yajni yala ja «yan» jitsan lek tyempo tsaʼan ja bʼa salmo ja David. Jachni jastal alxita: «Ta ja yan waxa maklayex ja jkʼumali, mok cha chʼuʼuybʼuk jawa kʼujolex».
8 Pes lekbʼi ijukexta yuja Josué bʼa jun lugar bʼa jijlel, ja Dyosi mixani oj yal ajyi mas tsaʼan bʼa jun pilan kʼakʼu.
9 Ja yuj wanto xkan jun skʼakʼujil sábado bʼa jijlel sbʼaja xchonabʼil ja Dyosi.
10 Yujni ja winik maʼ ochel ja bʼa sjijlel ja Dyosi cha jijlelni ja bʼa yaʼteli, jastalni cha jijlel ja Dyos ja bʼa yaʼteli.
11 Ja yujil, la jkʼuluktik ja janekʼ wa xbʼobʼkujtiki bʼa ochel ja bʼa jijlel jaw, bʼa jachuk mini june oj snoch ja junxta sjejel bʼa skʼokjel abʼali.
12 Yujni ja yabʼal ja Dyosi sakʼan ay sok ayni yip. Masni ay yej yuj chikan jas espada bʼa xchabʼil lado ay yej sok wa xmukxi man yojol jun winik bʼa jachuk xchiktesel ja jas ay ja bʼa yojoli sok ja bʼa juera,* sok wa xkʼot man yoj stsʼajkanal sok man xchijnakʼil sbʼakel.* Sok wani xbʼobʼ xchiktes ja spensariki sok ja jas wa skʼana oj skʼuluk ja skʼujoli.
13 Sok mini jun jasunuk bʼa kʼulubʼal nakʼan ay ja bʼa stiʼ sat ja yeʼni, pes yibʼanal ja jastik junuki bʼasani ay sok chikani ay lek ja bʼa stiʼ sat ja maʼ tʼilan oj katikyi kuenta.
14 Ja yuj tak, yuja ayni kiʼojtik jun niwan mero olomal sacerdote bʼa ochta ja bʼa* satkʼinali, ja Jesús, ja Yunin ja Dyosi, mokni katikan yaljel jaman lek sbʼaja yeʼn.
15 Yujni ay kiʼojtik jun mero olomal sacerdote bʼa wani xbʼobʼ snaʼ jyajulaltik yuja jpaltatiki, pes yujni kʼulubʼal probar jastal keʼntik bʼa yibʼanal jasunuk, pe ja yeʼn mini ayiʼoj mulal.
16 Ja yuj tak, la mojxukotik sok spetsanil jkʼujoltik ja bʼa trono bʼa lekil kʼujolal mi xbʼajintiki bʼa oj jejukitik yajulal kʼujol sok lekil kʼujolal mi xbʼajintik ja bʼa mero styempoʼil wa xkʼana jkoltajeltiki.
Notaʼik
^ Jach kanel ja bʼa griego: «la xiwkotik».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «stutanil sbʼakel».
^ Ma «ekʼta skʼuts ja».
