Hechos 6:1-15
6 Jaxa bʼa kʼakʼujik jaw, ja yajni wan pojxel ja nebʼumaniki, ja judíoʼik bʼa wa xkʼumaniye griego kʼe ochuke parte sbʼaja judíoʼik wa xkʼumaniye hebreo, yujni ja biudaʼiki mi x-ajiyile ja rasyon swaʼele bʼa kada kʼakʼu.
2 Ja yuj ja 12 jekabʼanumiki stsomowe yibʼanal ja nebʼumaniki sok yalawe yabʼi: «Mini lekuk ja oj katikonkan ja yabʼal ja Dyos bʼa skʼepjel waʼelal.
3 Ja yuj, kermano jumasaʼ, tsaʼawik ja bʼa weʼnlex juke winike bʼa jel lek xnaji sbʼaje,* bʼa ayiʼoje ja yip ja Dyosi* sok biboʼil bʼa jachuk oj katikan bʼa skʼabʼe ja cholal it jel tʼilani.
4 Pe ja keʼntikoni jani oj waj jkʼujoltikon yajelyi orasyon ja Dyos sok sjejel ja yabʼali».
5 Jelni lek yabʼye yibʼanal ja nebʼumanik ja jas yalaweʼi. Ja yuj stsaʼawe ja Esteban, ja yeʼn kʼotel jun winik bʼa ayiʼoj jun skʼuʼajel jel tsats sok ayiʼoj ja yip ja Dyosi.* Sok cha stsaʼawe ja Felipe, ja Prócoro, ja Nicanor, ja Timón, ja Parmenas sok ja Nicolás, jun winik bʼa Antioquía bʼa mi mero judíoʼuk.
6 Anto tixa yiʼaje och bʼa stiʼ sat ja jekabʼanumiki, sok yajni chʼak yaweyi orasyon, ja jekabʼanumiki tixa yaʼawe kajan ja skʼabʼe bʼa yeʼnle.
7 Sok jachuk, och pukxuk-el ja yabʼal ja Dyosi, sok jel pojxi juntiro ja nebʼumanik ja bʼa Jerusalén. Sok ochye kʼuʼumanil* jun niwan tsome sacerdote.
8 Jaxa Esteban, yuja jel lek x-ilji yuja Dyosi sok bʼutʼel ipal, wa skʼulan niwak milagroʼik* sok jastik jel cham yiljel ja bʼa chonabʼi.
9 Pe jujuntik winike ja bʼa tsome wa sbʼiʼilan winike libre aye, sok jujuntik bʼa Cirene sok bʼa Alejandría, sok jujuntik bʼa Cilicia sok bʼa Asia, waj snikeyi kʼumal ja Esteban.
10 Pe ja yeʼnleʼi mini xbʼobʼ skʼuluke ganar yuja jel snaʼa kʼumanel sok ayiʼoj ja yip ja Dyosi.*
11 Anto smonowe nakʼul jujuntik winike bʼa oj yal-e: «Ja keʼntikoni kabʼtikon wan kʼumanel kistal sbʼaja Moisés sok sbʼaja Dyosi».
12 Sok yuja jaw kʼeye jun kʼumal ja chonabʼi, ja ansyanoʼik sok ja jeʼumanik bʼa leyi. Sok junta chʼaykʼujol kʼotye ja bʼayi, snolkʼabʼine sok yiʼaje och bʼa Sanedrín.
13 Ja tiwi yiʼajejan matik lom sleʼaweyi smul sok yalawe: «Ja winik it mini xyaʼakan yaljel jastik mi lekuk sbʼaja templo sok sbʼaja Leyi.
14 Jun sjejel, kabʼunejtikon wa xyala jabʼi ja tan Jesús Nazareno ojbʼi sjem ja lugar it sok ojbʼi stukbʼes ja kostumbreʼik ya ekankitik ja Moisés».
15 Sok yibʼanal ja matik kulane ekʼ ja bʼa Sanedrín skʼelawe sok yilawe ja sniʼ sati jach jastal bʼa jun anjel.
Notaʼik
^ Ma «jel lek xtajiye tiʼal».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «espíritu santo». Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «kreyenteʼil».
^ Jach kanel ja bʼa griego: «senyaʼik».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
