Juan 15:1-27
15 «Keʼnon ja meran steʼil uva, jaxa jTati yeʼn ja tsʼunumani.
2 Ja yeʼn wani skʼutsu-el spetsanil ja skʼabʼik mi satini tey bʼa keʼn, sok yibʼanal ja skʼabʼik bʼa wa satini wani xajla* bʼa oj satinuk mas.
3 Ja weʼnlexi asyadoxa ayex stsʼakatal yuja yaljelik kaluneja wabʼyexi.
4 Ajyanik lajan jmok, jaxa keʼn oj ajyukon lajana mokex. Jastalni ja skʼabʼ uva mi xbʼobʼ satinuk ja stuchʼili, yujni tʼilan staʼunej sbʼaj soka steʼili, ja weʼnlexi cha mini xbʼobʼ satinanik ta mi la ajyiyex lajan jmoki.
5 Keʼnon ja steʼil uva sok weʼnlex ja skʼabʼi. Ja maʼ wa x-ajyi lajan jmoki, sok ja keʼn lajan wala ajyiyonsok, ja jaw jelni satini. Yujni ta pilan ayex jmok, mini jas xbʼobʼa kʼulukex.
6 Ta ay maʼ mi lajan wa x-ajyi jmok, wani xkʼutsxi-el jastal jun skʼabʼ teʼ sok wa xtaki. Ja skʼabʼik jaw wa stsomxi, wa xjipxi bʼa kʼakʼ sok wa stsikxi.
7 Ta lajan wala ajyiyex jmok sok ti wa x-ajyi amokex ja kabʼali, kʼanawik chikan jasa sok ojni ajukawilex.
8 Ja jTati wani xtoyji yajni tolabida jitsan wala satiniyex sok waxa jeʼawex kʼotelex jnebʼumanik.
9 Jastalni syajtunejon ja jTati, ja keʼn cha jyajtunejexniʼa; ajyanik ja bʼa syajal jkʼujoli.
10 Ta waxa kʼuʼanex ja jmandariki, ojni ajyanik ja bʼa syajal jkʼujoli, jastalni ja keʼn jkʼuʼunejyi ja smandarik ja Tatali sok ajyelon ja bʼa syajal skʼujoli.
11 Ja keʼn kaluneja wabʼyex ja jastik it bʼa oja wabʼyex ja junxta gustoʼil wa xkabʼ ja keʼn* sok jachuk jelxani gusto oj ajyanik juntiro.
12 Jaʼ it ja jmandari: yajta abʼajik ja weʼnlexi jastalni jyajtunejex ja keʼn.
13 Ja maʼ wa xyaʼa ja sakʼanil yuja yamigoʼiki masni jel niwan ja syajal skʼujoli.
14 Ja weʼnlexi kʼotelexni kamigoʼik ta waxa kʼulanex ja jas wa xkalawabʼyexi.
15 Mixa xkalawabʼyex mosoʼik, yujni ja mosoʼali mi snaʼa ja jas wa skʼulan ja yajwali. Wa xkalawabʼyex kamigoʼik, yujni kaluneja wabʼyex yibʼanal ja jastik kabʼunej yalunej ja jTati.
16 Mini weʼna tsaʼawonex, keʼnani jtsaʼawex. Ja keʼn jekunejex bʼa oj wajanik sok moka waʼexkan satinel sok aʼalbʼuk ja sat oja waʼexi. Sok jachuk ja Tatali oj yawilex chikan jas waxa kʼanawex ja bʼa jbʼiʼili.
17 Wa xkalawabʼyex ja jastik it bʼa jachuk oja yajta bʼajex.
18 Ta wa xyilkʼujolanex ja luʼumkʼinali, naʼawik ja it: yilkʼujolanonta bʼajtan ja keʼn yuja weʼnlexi.
19 Lekbʼi teyex bʼa sparte ja luʼumkʼinali, ojni syajtayex ja luʼumkʼinali yujni sbʼajex yeʼna. Pe yuja keʼn jtsaʼunejex ja bʼa luʼumkʼinali, sok mi sbʼajukex ja luʼumkʼinali, ja yuj wa xyilkʼujolanex.
20 Aʼa tʼabʼana kʼujolex ja jas kalawabʼyexi: ja mosoʼali mi mas ekʼxel yuja yajwali. Ta ja yeʼnle yiʼajeta jpatik, ojni cha yiʼ apatikex ja weʼnlexi; ta ja yeʼnleʼi skʼuʼaneta ja jas kaluneji, ojni cha skʼuʼuke jawa bʼajexi.
21 Yuja jbʼiʼili, ja yeʼnleʼi oj skʼulukawilex yibʼanal ja jastik iti, yujni mi snaʼawe sbʼaj ja Maʼ sjekawoni.
22 Lek mokxta jakon sok mokxta kalyabʼye, mini oj ajyuk smule. Pe ja wego mini xbʼobʼ yal-e mey smule.
23 Ja maʼ wa xyilkʼujolanon ja keʼn cha wani xyilkʼujolan ja jTati.
24 Lek mokxta jkʼuluk bʼa stiʼ sate ja jastik mi maʼ skʼuluneji, mini oj ajyuk smule; pe ja wego yilawoneta sok yilkʼujolanoneta, sok cha yilkʼujolaneta ja jTati.
25 Pe ekʼ ja it bʼa oj kʼotuk ja yaljelik tsʼijbʼunubʼalkan ja bʼa sLey ja yeʼnleʼi: ‹Mini jun sbʼej ja yilkʼujolanoneʼi›.
26 Yajni xjak ja koltanum oj jekawilex bʼa sparte ja Tatali, ja ipal* bʼa smeranili, ja it wa xjak bʼa Tatali, yeʼnani oj xchol bʼa keʼna;
27 jaxa weʼnlexi cha tʼilani oja cholex bʼa keʼna, yujni ajyelex jmok man skʼeʼulabʼil».
Notaʼik
^ Jach kanel ja bʼa griego: «wa xya ajyuk asyado».
^ Ma «bʼa ti oj ajyuka mokex ja gustoʼil kiʼoji».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
